Pakico? ‘Mi Dios, Pakico Bo A Permiti e Cos Aki?’

AINDA Ricardo ta corda con e tawata sinta cu su casa, Maria, den sala di espera.a Ningun di dos tawatin e curashi pa lesa e resultadonan di Maria su ultimo examennan medico. Al final Ricardo a habri e envelop, y nan dos a pasa lihe lihe riba loke e docter a skirbi den su raport. Nan bista a cai riba e palabra “cancer”, y ora nan a caba di realisa nan mes ta kico esei ta nifica, tur dos a cuminsa yora.

Segun Ricardo, “e docter tawata masha bondadoso, pero tawata bisto cu el a realisa e gravedad di e situacion pasobra e tawata blo bisa nos cu nos tin cu confia den Dios.”

Prome cu e tratamento di bestraling a cuminsa, e docter a ripara cu Maria su pia drechi tawata move sin cu e kier. Mas test a revela cu e cancer a plama yega su celebro. Despues di apenas un siman di tratamento, nan a stop cu bestraling. Maria a bin cai den coma y a muri dos luna despues. “Mi tawata contento cu e no a sufri mas”, Ricardo ta splica, “pero mi a sinti su falta asina tanto te cu mi a desea pa mi tambe muri. Hopi bes, mi tawata sclama na Dios: ‘Pakico bo a permiti e cos aki?’”

Tragedia Ta Lanta Hopi Pregunta

Mescos cu Ricardo, hopi hende rond mundo ta haya nan forsa ta confronta e realidad di sufrimento. Hopi bes, ta e inocentenan ta sufri. Pensa riba e gran tristesa causa pa e conflictonan arma constante cu ta tormenta humanidad. Of pensa riba e dolor di hopi cu a bira victima di violacion sexual, abuso di menor, violencia domestico y di otro maldadnan cu hende a comete. Atrabes di historia ta parce cu no tin limite na e inhusticia y dolor cu homber y mohe ta dispuesto di causa otro. (Eclesiastes 4:1-3) Y no lubida e angustia di victimanan di desaster natural of di malesanan emocional, mental y fisico. Pesei no ta nada straño cu hopi hende ta puntra nan mes: “Pakico Dios ta permiti e sufrimento ei?”

Ni pa hende cu tin nan conviccionnan religioso no ta facil pa enfrenta sufrimento. Kisas bo tambe ta puntra bo mes ta pakico un Dios amoroso y todopoderoso a permiti hende sufri. Pa nos por tin pas mental y un bon relacion cu Dios, ta vital pa nos haya un contesta satisfactorio y franco riba e pregunta dificil aki. Bijbel ta duna un contesta asina. Analisa loke e ta bisa den e siguiente articulo.

[Nota]

[Plachi na pagina 3]

Docter tawata blo bisa nos cu nos tin cu confia den Dios