Kico Lo Bo Tin Gana di Puntra Dios?

ROND mundo tin hende cu tin pregunta importante tocante bida. Abo tambe ta un di nan? Hopi di nan a plantia nan preguntanan na instructornan religioso pero nan no a haya contestanan satisfactorio. Otronan a cana rond cu e preguntanan aki den nan mente. Algun a resa pa haya guia. Ta realmente posibel pa bo haya contesta for di Dios riba asuntonan cu ta confundi bo? At’aki algun di e preguntanan cu hopi hende a bisa cu nan lo tin gana di haci Dios:

Dios, ta ken Bo ta realmente?

Hende ta mira Dios manera nan cultura of e religion di nan mayornan a siña nan. Of kisas nan a forma nan propio opinion. Tin hende ta uza un nomber pa Dios; otronan simplemente ta yam’e Dios. Esei ta realmente importante? Acaso ta existi un solo Dios berdadero cu ta revela na nos ken E ta y con su nomber ta?

Dicon tin asina tanto sufrimento?

Bo por haya cu un persona cu a hiba un bida inmoral of descabeya cu a causa daño na su salu of pon’e keda plambari, ta keha. Pero podise e sa masha bon ta dicon e ta sufri.

Sinembargo, tin hopi hende ta sufri masha pisa sin cu ta nan falta. Algun di nan tin malesanan cronico. Otronan ta lucha contra desbentahanan aparentemente insuperabel pa nan por tin un dak riba nan cabes y suficiente cuminda pa nan famia. Miyones di nan ta victima di crimen, guera, violencia pa loco, desaster natural of inhusticia na man di hende den puesto di autoridad.

Ta di compronde anto cu hopi hende ta puntra: ‘Dicon e condicionnan ei a plama tur caminda asina? Dicon Dios ta permiti tur e sufrimento aki?’

Kico mi ta haci riba e mundo aki? Kico ta e proposito di bida?

Hopi bes e preguntanan aki ta lanta door di e frustracion cu un hende ta sinti pasobra su actividadnan diario no ta dun’e berdadero satisfaccion, y esaki ta e caso di hopi hende. Miyones di otronan ta kere cu di un manera of otro Dios a duna cada hende un destino. Pero ta asina? Si di berdad Dios tin un proposito special pa bo, sin duda lo bo kier sa kico esei ta.

Di tur buki na mundo, tin uno cu ta bisa bon cla cu e ta inspira pa Dios. Y manera lo bo spera di un mensahe cu realmente ta bini di Dios pa henter humanidad, e buki aki ta disponibel den hopi mas idioma cu cualkier otro buki cu a yega di ser skirbi. Ta trata di e Bijbel Santo. Den dje e Creador di shelo y tera, Dios mes, ta revela ken E ta y con ta su nomber. Abo sa su nomber? Bo sa kico Bijbel ta bisa tocante e clase di Persona cu Dios ta? Bo sa kico e ta bisa cu Dios ta spera di bo?

[Reconocemento di plachi na pagina 3]

Sero: Chad Ehlers/Index Stock Photography