‘Mi Yudansa Ta Bin for di Yehova’

Haci Sacrificio Personal Ta Trece Yehova Su Bendicion

UN HOMBER ta biaha riba bais den e selvanan di Camerun. Pa oranan largo e ta core canto di camindanan inunda y tambe door di lodo afin di por bai fortalece otro hende. Pa duna les na un grupo aisla, algun hende na Zimbabwe ta cana 15 kilometer atrabes di riunan cu a bai over, cargando nan sapato- y pañanan riba nan cabes pa nan no muha. Na un otro luga, un señora ta lanta cuat’or di marduga pa bishita y duna les di Bijbel na un verpleegster kende tin tempo pa haci esei solamente mainta tempran.

Kico e hendenan aki cu ta haci asina tanto esfuerso tin en comun? Nan tur ta ministernan di tempo completo di Testigonan di Yehova cu ta participa den e trabou di siña hende e berdad biblico. Entre nan tin pionero special y regular, misionero, superintendente biahero y miles di boluntario na casnan di Betel rond mundo. Hacimento di sacrificio personal ta e caracteristica cu ta distingui nan.a

Motivacion Corecto

Testigonan di Yehova ta haciendo caso di e conseho cu apostel Pablo a duna Timoteo: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.” (2 Timoteo 2:15) Pero kico ta motiva cientos di miles di Testigo pa sirbi como minister di tempo completo?

Ora puntra sirbidonan di tempo completo dicon nan ta haci tanto esfuerso asina den e sirbishi di Yehova, nan contesta tin di aber cu amor pa Dios y pa prohimo. (Mateo 22:37-39) Esei ta completamente na su luga, pasobra maske cuanto esfuerso nan haci, si amor no tawata e motivacion, nan esfuerso lo ta en vano.—1 Corintionan 13:1-3.

Sirbishi Cu Ta Encera Sacrificio Personal

Tur cristian dedica a acepta e yamada aki di Hesus: “Si un hende kier bin mi tras, lag’e nenga su mes ... y sigui mi.” (Mateo 16:24) Nenga nos mes ta nifica cu boluntariamente nos ta somete nos mes na Yehova Dios y Hesucristo como esnan cu ta nos doño y cu ta dirigi nos. Pa hopi hende, esaki a hiba na un sirbishi di sacrificio personal den e ministerio di tempo completo.

Hopi Testigo ta haci gran esfuerso pa expande nan sirbishi na Yehova. Considera e caso di Júlia di 56 aña, kende ta un pionero regular na São Paulo, Brazil. El a conta: “Un ruman homber Chines a bel mi pa puntra mi si lo mi ta dispuesto pa siña Chines. Debi na mi edad, mi no a pensa pa siña un idioma nobo. Pero despues di algun dia, mi a acepta e reto. Awe, mi por duna un presentacion biblico na Chines.”

E sucursal di Testigonan di Yehova na Peru ta informa: “Den ultimo añanan, cientos di pionero regular a muda bai teritorionan no asigna, desplegando un spirito di curashi y sacrificio. Nan a muda bai pueblonan leu caminda no tin servicionan basico y cupo di trabou ta limita. E rumannan aki, homber y mohe, ta dispuesto pa haci loke sea ta necesario pa nan por keda den nan asignacion. Pero mas importante ainda, nan actividad den e ministerio ta resulta den bendicion den un luga tras di otro. Superintendentenan biahero ta informa cu a logra forma gruponan nobo cu yudansa di e pioneronan regular aki cu ta dispuesto pa haci sacrificio personal.”

Algun cristian a risca nan bida afin di yuda nan rumannan den fe. (Romanonan 16:3, 4) Un superintendente di sircuito den un area di Africa destrosa pa guera ta informa: “Prome cu nos a yega na e ultimo baricada riba e caminda entre e teritorio ocupa pa e rebeldenan y esun controla door di gobierno, ami cu mi casa a haya nos rondona pa cuater comandante militar rebelde y nan bodyguardnan cu tawata kier sa ken nos ta. Ora cu nan a check nos cedula, nan a mira cu nos tawata for di e area controla pa gobierno y nan a cuminsa bira nervioso. Nan a acusa mi di ta un spion. Pesei nan a dicidi di tira mi den un buraco. Mi a splica nan ken nos tawata, y finalmente nan a laga nos bai.” Ki gradicido e congregacionnan tawata cu e pareha aki, dispuesto pa haci sacrificio personal, a logra bishita nan!

Apesar di e dificultadnan cu nan ta encontra, e filanan di e ministernan di tempo completo ei ta sigui aumenta mundialmente. (Isaias 6:8) E trahadonan diligente aki ta aprecia nan privilegio di sirbi Yehova. Miyones di hende cu un actitud similar di haci sacrificio ta alabando Yehova awor. E na su turno ta bendiciona nan abundantemente. (Proverbionan 10:22) E trahadonan diligente ei, teniendo e confiansa cu nan lo sigui haya bendicion y sosten, ta refleha e actitud di e salmista cu a canta: ‘Mi yudansa ta bin for di Yehova.’—Salmo 121:2.

[Nota]

[Comentario na pagina 9]

“Bo pueblo lo pone su mes disponibel den e dia di bo poder.”—SALMO 110:3

[Cuadro na pagina 8]

YEHOVA TA APRECIA SU SIRBIDONAN DEBOTO

“Sea firme, constante, semper abundando den e trabou di Señor, sabiendo cu boso trabou no ta en vano den Señor.” —1 Corintionan 15:58.

“Dios no ta inhusto pa lubida boso trabou y e amor cu boso a mustra pa su nomber.” —Hebreonan 6:10.