Pregunta di Lector

Ta berdad cu Yosef (Hose), un fiel sirbido di Yehova, a uza un copa special di plata pa busca señal, manera Genesis 44:5 ta parce di indica?

No tin motibo pa kere cu Yosef a practica ningun forma di adivinacion, of wakmento di destino.

Bijbel ta mustra cu Yosef a compronde bon cla kico tin tras di e uzo di arte magico pa haya sa futuro. Anteriormente, ora nan a pidie interpreta e soñonan di farao, bes tras bes Yosef a insisti cu ta Dios so por ‘duna di conoce’ kico tin den futuro. Como resultado di esei, Farao mes a keda combenci cu ta e Dios cu Yosef a adora—e berdadero Dios y no podernan sobrenatural—a yuda Yosef haya sa detayenan tocante futuro. (Genesis 41:16, 25, 28, 32, 39) Den e Lei cu Yehova a duna Moises despues, el a prohibi hende di recori na magia of adivinacion, confirmando asina cu ta E so ta predeci futuro.—Deuteronomio 18:10-12.

Pakico anto Yosef a duna e impresion pa medio di su cria cu e tawata uza un copa di plata pa “adivina”, of busca señal?a (Genesis 44:5) Nos tin cu considera e circunstancianan bou di cua el a haci e declaracion aki.

Pa motibo di un gran scarsedad di cuminda, e rumannan di Yosef a biaha bai Egipto pa busca alimento. Añanan anterior, e mesun rumannan aki a bende Yosef como esclabo. Awor, sin cu nan tawata sa, nan a pidi yudansa for di nan propio ruman, kende a bira e administrado di cuminda di Egipto. Yosef no a revela su mes na nan. En bes di esei, el a dicidi di pone nan na prueba. Corectamente, Yosef kier a determina con sinsero nan repentimento tawata. E kier a haya sa tambe si nan a stima y cuanto stimacion nan tawatin pa nan ruman Benjamin y nan tata, Yacob, kende tawatin un cariño special pa Benjamin. Pa e motibo ei, Yosef a uza un triki.—Genesis 41:55–44:3.

Yosef a manda un di su crianan yena e saconan di su rumannan cu cuminda, duna cada un nan placa bek door di hinca esaki den nan respectivo saconan y pone Yosef su copa di plata den Benjamin su saco. Den tur esaki, Yosef a hunga e rol di un administrado di un pais pagano. El a adapta su mes, su accionnan y su estilo di papia na e personalidad di un administrado asina, manera esei lo a aparenta den bista di su rumannan, cu no a sospecha nada.

Ora Yosef a confronta su rumannan, el a sigui hunga su rol, puntrando nan: “Boso no sa cu un homber manera ami di berdad por practica adivinacion?” (Genesis 44:15) Pues, obviamente, e copa tawata djis un parti di e triki. Mescos cu no por wordo bisa cu ta horta Benjamin a horta e copa, nos no por bisa tampoco cu Yosef tawata uz’e pa busca señal.

[Nota]