Pregunta di Lector

Acaso Proverbionan 22:6 ta un garantia cu si mayornan instrui nan yiunan cristian corectamente, nan lo no aparta for di e caminda di Jehova?

E versiculo aki ta bisa: “Instrui un mucha den e caminda cu e mester cana, y asta ora cu e bira bieu e lo no aparta su mes for di dje.” Mescos cu ora bo dobla un taki, esei ta influencia su forma segun cu e ta crece bira un palo, asina muchanan instrui corectamente ta mas inclina na sigui sirbi Jehova ora nan bira grandi. Manera tur mayor sa, e tipo di educacion ei ta tuma basta tempo y esfuerso. Pa mayornan por haci nan yiunan discipel cristian, nan mester instrui, spierta, anima y disciplina e muchanan cuidadosamente y tambe pone un bon ehempel pa nan. Anto nan mester haci esaki na un manera consistente y amoroso pa hopi aña largo.

Pero esaki ta nifica cu si un mucha stop di sirbi Jehova, ta e instruccion cu e mayornan a duna no tabata bon? Den algun caso, berdad mayornan kisas tabata deficiente den nan esfuerso pa lanta nan yiunan den e disciplina y instruccion di Jehova. (Efesionan 6:4) Di otro banda, e proverbio no ta un garantia cu dunamento di bon instruccion lo produci yiunan cu ta fiel na Dios. Mayornan no por pone nan yiunan bira loke nan como mayor ta desea. Mescos cu hende grandi, mucha tin boluntad liber y na final di cuenta ta nan tin cu scohe nan propio rumbo den bida. (Deuteronomio 30:15, 16, 19) A pesar di e esfuersonan di mas sincero di mayornan, tin yiu ta bira infiel, mescos cu Salomon a bira infiel siendo cu e mes a skirbi e versiculo cu nos ta tratando. Asta Jehova tabatin algun yiu cu a resulta infiel.

Pues e versiculo aki no kiermen cu den tur caso un mucha “lo no aparta su mes for di dje”, pero cu por lo general esaki lo ta e resultado. Ki un gran animacion pa mayornan! Mester ta un estimulo pa nan di sa cu nan esfuerso sincero pa instrui nan yiunan den e caminda di Jehova lo produci bon resultado. Ya cu mayornan ta hunga un papel importante y tin gran influencia riba nan yiunan, lo ta bon pa nan tuma nan papel na serio.—Deuteronomio 6:6, 7.

Asta ora yiunan stop di sirbi Jehova, mayornan cu a haci nan best den instrui nan yiunan por carga e speransa cu nan yiunan lo recobra nan sano huicio. E berdad cu tin den Bijbel ta poderoso, y yiunan no ta lubida lihe e instruccion cu nan a haya di nan mayornan.—Salmo 19:7.