Kico Lo Pasa cu Religion?

E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Tur religion ta bon?

No cabe duda cu den tur religion tin hende sincero cu kier agrada Dios. E ta tuma nota di nan y ta interesa den nan. Pero lamentablemente, tin hende a haci malo den nomber di religion. Den pasado, lidernan religioso hasta a tortura nan oponentenan. (2 Corintionan 4:3, 4; 11:13-15) Segun informenan di noticia, awe tin algun lider religioso cu ta instiga terorismo of apoya guera, of nan ta envolvi den maltrato y abuso sexual di mucha.​—Lesa Mateo 24:3-5, 11, 12.

Ta dos tipo di religion so tin: religion berdadero y religion falso. Esaki ta cuadra cu loke Bijbel ta bisa. Religion falso ta siña cosnan tocante Dios cu no ta berdad. Sinembargo, Jehova Dios kier pa hende sa e berdad tocante dje.​—Lesa 1 Timoteo 2:3-5.

2. Kico lo pasa cu religion?

Dios no kier pa hende ser gaña pa religion cu ta pretende di ta stim’e, ma cu no ta siña hende ken e ta di berdad. De echo, e hendenan di e religionnan ey ta gusta amistad cu e mundo aki controla pa Satanas e Diabel. (Santiago 4:4; 1 Juan 5:19) Segun e Palabra di Dios, religionnan cu ta prefera di ta leal na gobierno humano en bes di na Dios ta manera un prostituta. Bijbel ta yama e prostituta aki “Babilonia e Grandi.” E nomber ey ta deriva for di e stad di antiguedad caminda religion falso a cuminsa despues di e Diluvio di tempo di Noe. Pronto, Dios lo trece un fin repentino na tur religion cu ta gaña y oprimi hende.​—Lesa Revelacion 17:1, 2, 5, 17; 18:8, 23, 24.

3. Con Dios lo bendiciona hende di tur nacion?

E huicio cu lo bin riba religion falso ta bon noticia. Rond mundo, hende lo haya alivio di opresion. Nunca mas religion falso lo gaña humanidad y causa division. E tempo ey, tur hende lo ta uni den adoracion di e unico Dios berdadero.​—Lesa Isaias 11:9; Revelacion 18:20, 21; 21:3, 4.

4. Kico hende sincero mester haci?

Jehova no a lubida e hendenan sincero cu awe ta plama den e religionnan falso cu tin rond mundo. Actualmente, e ta recogiendo e hendenan ey y ta trece nan hunto den union door di siña nan e berdad.​—Lesa Mikeas 4:2, 5.

Cu brasa habri Jehova ta ricibi hende cu kier sirbie y ta laga nan bira parti di su famia. Kisas nos amigo- y famianan no ta keda contento ora nos cuminsa sirbi Jehova, pero nos ta ricibi hopi beneficio si nos persevera. Nos ta cera amistad cu Dios, nos ta haya un “famia” nobo cu ta masha cariñoso y nos lo tin e speransa di haya bida eterno.​—Lesa Marco 10:29, 30; 2 Corintionan 6:17, 18.

Pa mas informacion, wak capitulo 15 y 16 di e buki aki,Kico Bijbel Ta Siña Realmente?, publica pa Testigonan di Jehova.

[Reconocemento pa Potret na pagina 26]

The Complete Encyclopedia of Illustration/J. G. Heck