Siña Comporta Bo Mes Como Esun di Mas Chikito

1, 2. Ki conseho Hesus a duna su apostelnan y dicon?

TABATA aña 32 di nos era. Hesus tabata hunto cu su apostelnan den e districto di Galilea. Na dado momento, a surgi un problema entre su apostelnan; nan tabata discuti tocante ken tabata esun di mas grandi entre nan. E escritor Lucas a relata loke a pasa: “Anto a lanta un discusion entre e discipelnan tocante cua di nan lo tabata esun di mas grandi. Ma Hesus, sabiendo kico nan tabata pensa den nan curason, a pone un mucha chikito para banda di dje, y el a bisa nan: ‘Ken cu ricibi e mucha aki den mi nomber ta ricibi mi tambe, y ken cu ricibi mi, ta ricibi tambe Esun cu a manda mi. Pasobra esun cu ta comporta su mes como esun di mas chikito meymey di boso tur, esey ta esun cu ta grandi.’” (Luc. 9:46-48) Si, cu pasenshi pero na un manera firme, Hesus a yuda su apostelnan mira cu nan mester ta humilde.

² Awor, e conseho aki cu Hesus a duna su apostelnan tabata na harmonia cu e norma- y balornan di e Hudiunan di e tempo ey? No, tabata net lo contrario. E buki Theological Dictionary of the New Testament ta bisa: ‘Den tur asunto, pa e Hudiunan tabata masha importante pa sa ken merece mas honor. Y semper nan tabata masha preocupa pa nan realmente haya e honor cu nan merece.’ Pero Hesus tabata kier pa su apostelnan ta diferente.

3. (a) Kico kiermen comporta nos mes como esun di mas chikito? (b) Dicon tin biaha por ta dificil pa nos comporta nos mes asina? (c) Ki preguntanan e articulo aki lo contesta?

³ E palabra Griego traduci como “esun di mas chikito” ta referi na un persona insignificante of sin autoridad. Un persona asina ta humilde y no ta considera su mes mas importante cu otronan. Hesus a siña su apostelnan cu nan mester ta humilde y modesto manera mucha. Y esaki ta conta tambe pa tur cristian berdadero awe. Pero tin biaha, no ta facil pa comporta nos mes como esun di mas chikito, esta, pa desplega humildad. Debi na imperfeccion, orguyo por pone nos haci esfuerso pa ta mihor cu otronan. Ademas, e mundo di Satanas por influencia nos pa ta egoista, ambicioso of dominante. Awor, kico nos por haci pa nos por tin un actitud humilde? Kico Hesus tabata kiermen ora el a bisa cu ‘esun di mas chikito ta esun cu ta grandi’? Den ki area nos mester desplega humildad?

‘DIOS SU SABIDURIA Y CONOCEMENTO TA PROFUNDO’

4, 5. Kico por yuda nos cultiva humildad? Duna un ehempel.

⁴ Pa nos por ta mas humilde nos mester medita riba Jehova su grandeza. En realidad, “su comprondemento ta inscudriñabel.” (Isa. 40:28) Referiendo na cierto aspecto di Jehova su grandeza, apostel Pablo a skirbi: “O ki profundo e rikesa, sabiduria y conocemento di Dios ta! Ki insondabel su huicionan ta y ki ininvestigabel su camindanan ta!” (Rom. 11:33) Aunke hende su conocemento a aumenta considerablemente den varios area desde cu Pablo a skirbi e palabranan ey casi 2.000 mil aña pasa, loke el a skirbi keto bay ta cierto. Pues, maske cuanto cos nos sa caba, nunca nos ta caba di siña tocante Jehova, su obranan y su camindanan. Si nos ta realisa esey, nos ta keda humilde.

⁵ Laga nos tuma Leoa como ehempel. Ora el a realisa cu nunca e por siña tur cos encuanto Dios su creacion, esey a yud’e mira su mes como esun di mas chikito. Tempo cu Leo tabata hoben, e tabata fascina cu ciencia. Como cu e tabata kier a siña mas tanto posibel di nos universo, el a cuminsa studia astrofisica. Pero el a yega na e conclusion cu ciencia so no por yuda hende compronde tur cos tocante e universo y pesey el a cambia di estudio. El a cuminsa studia ley y, cu tempo, el a bira abogado y hues. Algun tempo despues, e cu su esposa a cuminsa studia Bijbel cu Testigonan di Jehova; nan a progresa y batisa. Kico a yuda Leo desaroya un actitud humilde pa asina e por comporta su mes como esun di mas chikito maske e tabata un persona cu bon educacion? Leo a bisa: “Mi a realisa cu, maske cuanto nos siña tocante Jehova y e universo, ainda nos tin hopi mas pa descubri.”

6, 7. (a) Con Jehova ta pone un maraviyoso ehempel di humildad? (b) Den ki sentido Jehova su humildad por haci un persona “grandi”?

⁶ Un otro manera cu nos por cultiva humildad ta di reflexiona riba e echo cu Jehova mes ta desplega humildad. Pensa riba esaki: Bijbel ta bisa cu “nos ta compañero di trabou di Dios.” (1 Cor. 3:9) Imagina bo! Jehova, e Dios Haltisimo, kier pa nos coopera cu ne. E ta duna nos e honor di cumpli cu nos sirbishi, uzando su Palabra, Bijbel. Si, aunke ta Jehova mes ta percura pa e simianan crece, toch el a duna nos e privilegio grandi di planta y muha. (1 Cor. 3:6, 7) Esey no ta un ehempel maraviyoso di humildad? No tin duda, Jehova su ehempel di humildad mester anima cada un di nos pa comporta nos mes como esun di mas chikito.

⁷ Dios su ehempel di humildad tabatin un efecto profundo riba e salmista David, kende a canta na Jehova: “Bo a duna mi e escudo di bo salbacion, y bo gentileza [“humildad”, NW] ta haci mi grandi.” (2 Sam. 22:36) Asina David a reconoce cu si no tabata pa e echo cu Jehova a desplega humildad y a presta atencion na dje, lo e no por a haci tur e cosnan grandi cu el a haci na Israel. (Sal. 113:5-7) Mescos ta conta pa nos. Dicon? Pasobra tur cualidad, capacidad, habilidad of responsabilidad special cu nos tin, nos “a ricibi” di Jehova. (1 Cor. 4:7) Ora Hesus a bisa cu esun cu ta comporta su mes como esun di mas chikito ta bira “grandi”, e tabata kiermen cu e persona aki ta bira un sirbidor mas valioso pa Jehova. (Luc. 9:48) Laga nos wak dicon.

‘ESUN DI MAS CHIKITO MEYMEY DI BOSO TA GRANDI’

8. Dicon esnan cu ta forma parti di Dios su organisacion mester ta humilde?

⁸ Pa nos por ta feliz den e organisacion di Dios y sigui guia cu nos ta haya mediante su organisacion, ta masha importante pa nos ta humilde. Tuma por ehempel Petra, un mucha muher hoben cu a lanta den un famia Testigo di Jehova. Como cu Petra kier a haci cos na su manera, el a aleha su mes for di e congregacion. Pero algun aña despues, el a bolbe cuminsa asisti na e reunionnan. Awor, e ta contento cu e ta forma parti atrobe di e organisacion di Dios y cu e por sigui guia di Jehova. Con bin awor si e ta sinti asina? El a skirbi: “Pa mi por a sinti mi na cas den e organisacion di Dios, mi mester a cultiva dos cualidad masha importante: humildad y modestia.”

9. (a) Con un persona humilde ta mira Bijbel y e otro publicacionnan cu nos ta ricibi for di e esclavo fiel y prudente? (b) Dicon esey ta haci e persona ey mas valioso?

⁹ Un persona humilde ta balora Jehova su provisionnan, incluso e cuminda spiritual cu e ta percura. Pesey un persona asina ta studia Bijbel diligentemente y ta lesa tur edicion di E Toren di Vigilancia y ¡Despertad! Pues, mescos cu hopi sirbidor di Jehova, e tin e custumber di lesa tur publicacion nobo prome cu e warda nan den su bibliotheek personal. Si nos ta lesa y studia nos publicacionnan basa riba Bijbel, nos ta demostra cu nos ta humilde y cu nos ta aprecia cosnan spiritual. Ademas, esaki lo yuda nos progresa spiritualmente, y Jehova por uza nos mihor den su sirbishi.​—Heb. 5:13, 14.

10. Con nos por comporta nos mes como esun di mas chikito den congregacion?

¹⁰ Un persona cu ta comporta su mes como esun di mas chikito ta “grandi”, of mas valioso, den un otro sentido tambe. Den tur congregacion tin hombernan capacita cu ta ser nombra mediante Jehova su spirito santo pa sirbi como anciano. E hombernan aki ta dirigi diferente actividad teocratico, manera por ehempel reunionnan di congregacion y sirbishi, y ta pastorea e congregacion. Ora nos ta humilde y ta coopera di buena gana cu e ancianonan, nos ta contribui na e goso, paz y union di e congregacion. (Lesa Hebreonan 13:7, 17.) Si bo ta un anciano of sirbidor ministerial, bo actitud ta demostra cu bo ta humilde y cu bo ta contento cu e privilegio aki cu Jehova a duna bo?

11, 12. Ki actitud ta haci nos mas valioso pa Jehova su organisacion, y dicon?

¹¹ Esun cu ta comporta su mes como esun di mas chikito ta “grandi”, of mas valioso pa Jehova su organisacion, pasobra su actitud humilde ta hacie un sirbidor util pa Dios y un bon ruman. Hesus mester a conseha su discipelnan pa nan comporta nan mes como esun di mas chikito pasobra algun di nan a cuminsa pensa mescos cu e hendenan orguyoso di e tempo ey. Lucas 9:46 ta bisa cu “a lanta un discusion entre e discipelnan tocante cua di nan lo tabata esun di mas grandi.” A caso esaki lo por sosode cu nos tambe? Nos tambe por cuminsa pensa cu nos ta mihor cu nos rumannan of cu otro hende? Mayoria di hende den mundo ta orguyoso y egoista, pero nos mester ta diferente. Pesey, laga nos ta humilde y pone Jehova su boluntad na prome luga den nos bida. Asina nos rumannan lo sinti nan bon ora nan ta den nos compania.

¹² Hesus su conseho pa comporta nos mes como esun di mas chikito ta anima nos pa desplega humildad den tur area di bida. Laga nos trata tres area.

HACI ESFUERSO PA COMPORTA BO MES COMO ESUN DI MAS CHIKITO

13, 14. Con un esposo of esposa por comporta su mes como esun di mas chikito, y ki efecto esaki por tin riba nan matrimonio?

¹³ Den matrimonio. Awendia, hopi hende ta pensa riba nan mes. Y pa nan haya loke nan kier, nan ta bay asina leu di trapa derecho di otro hende. Pero un hende cu ta comporta su mes como esun di mas chikito ta sigui e conseho cu Pablo a duna e Romanonan. El a bisa nan: “Laga nos haci esfuerso pa busca e cosnan cu ta promove paz y cu ta yuda edifica otro.” (Rom. 14:19) Si, un persona cu ta comporta su mes como esun di mas chikito ta haci esfuerso pa e ta na paz cu tur hende, specialmente cu su casa.

¹⁴ Por ehempel, ora ta trata di recreo, un pareha casa kisas no tin e mesun gusto. Podise e esposo ta prefera di keda cas trankil y lesa un buki den su tempo liber. Di otro banda, su esposa kisas ta prefera pa nan bay come un caminda of bishita algun amigo. Si e esposo ta un persona humilde cu ta tene cuenta cu e gusto di su esposa y no ta pensa solamente riba loke e ta gusta, lo ta mas facil pa e esposa respeta su esposo, no ta berdad? Y e esposo, na su turno, tambe lo stima y balora su esposa mas si su esposa ta tene cuenta cu ne y no ta busca semper pa haya loke e kier. Si, ora tanto e esposo como e esposa ta humilde, nan laso matrimonial lo bira mas fuerte.​—Lesa Filipensenan 2:1-4.

15, 16. Segun Salmo 131, kico David a anima e Israelitanan pa haci, y con nos por haci mescos den congregacion?

¹⁵ Den congregacion. Tin hopi hende ta pensa cu nan tin cu haya loke nan kier mesora. Nan no tin pasenshi y nan no ta gusta warda tampoco. Pero ora nos ta humilde, nos no tin problema pa warda, of spera, riba Jehova. (Lesa Salmo 131:1-3.) Si un persona ta humilde y ta warda riba Jehova, lo e tin trankilidad, lo e haya consuelo, felicidad y hopi bendicion. Pesey, nos ta compronde pakico David a anima e Israelitanan pa nan warda riba Jehova cu pasenshi.

¹⁶ Abo tambe por haya consuelo si bo ta warda humildemente riba Jehova. (Sal. 42:5) Podise bo tin gana di sirbi como anciano pa bo por yuda e congregacion mas. (1 Tim. 3:1-7) Ta claro cu bo tin cu pidi Jehova su yudansa mediante spirito santo y haci tur loke bo por pa cultiva e cualidadnan necesario pa sirbi como anciano. Pero kico si ta parce cu bo tin cu warda mas cu otronan? Un persona cu ta comporta su mes como esun di mas chikito ta warda cu pasenshi riba Jehova pa e ricibi mas privilegio den congregacion. Pero mientrastanto, e ta sigui sirbi Jehova cu goso y ta contento cu cualkier asignacion cu e haya.

17, 18. (a) Ki ta e beneficionan di pordona otro y pidi despensa? (b) Kico Proverbionan 6:1-5 ta conseha nos pa haci si, pa un motibo valido, nos no por cumpli cu loke nos a priminti?

¹⁷ Den nos trato cu otro hende. Mayoria di hende tin problema pa pidi despensa. Sinembargo, sirbidornan di Dios ta haci esfuerso pa nan ta humilde; nan ta admiti nan erornan y ta pidi despensa. Ademas, nan ta cla pa pordona otro hende. Orguyo ta causa division y pleito. Pero un persona cu ta cla pa pordona ta promove paz den e congregacion cristian.

¹⁸ Tin biaha por sosode cu, pa un motibo valido, nos no por cumpli cu loke nos a priminti. Den un situacion asina, nos mester desplega humildad y pidi despensa. Anto maske un cristian por culpa un otro persona pa e fayo, si e ta humilde, e no ta haci esey; mas bien, e ta wak unda e mes a faya y ta admiti su eror.​—Lesa Proverbionan 6:1-5.

19. Dicon nos mester ta contento cu Bijbel ta anima nos pa comporta nos mes como esun di mas chikito?

¹⁹ Nos ta masha contento cu Bijbel ta anima nos pa ta humilde, esta, pa comporta nos mes como esun di mas chikito. Pero tin biaha, no ta facil pa desplega humildad. Ma si nos ta reflexiona riba Jehova su grandeza, esey lo motiva nos pa desplega e cualidad maraviyoso aki. Dicon? Pasobra si e mes, siendo e Dios Haltisimo, ta desplega humildad, cuanto mas nos tin cu haci esey! Si nos ta humilde, nos lo ta mas valioso den bista di Dios. Pesey, laga cada un di nos sigui comporta nos mes como esun di mas chikito.