Sirbi Jehova sin Tin cu Lamenta Awor y den Futuro

1-3. (a) Con algun hende ta sinti tocante e cosnan cu nan a haci of keda sin haci, y con fayonan di pasado por afecta nos? (b) Kico nos por siña for di Pablo su ehempel?

ORA cos no bay den bida manera hende a spera, esey ta duel nan y nan ta sinti un tristeza. Kisas nan ta bisa: “Mihor nunca mi no a haci e cos ey.” Nos tur por pensa riba cosnan cu mihor nos a haci otro. Pero tin hende cu constantemente ta lamenta, of sinti un duele profundo, pa motibo di cosnan cu nan a haci of a keda sin haci. Tin cosnan cu abo a haci of a keda sin haci cu ta duel bo?

² Tin hende cu a comete fayonan grave of a haci hopi cos malo den nan bida. Otronan no a haci cos dje malo ey, pero kisas keto bay nan ta preocupa, pensando cu algun di e decisionnan cu nan a tuma den bida no tabata dje bon ey. Tin hende cu a logra supera nan pasado y sigui cu nan bida. Otronan, constantemente ta sinti nan mes malo pa e decisionnan cu nan a tuma y ta keda pensa “mihor mi a . . . !” (Sal. 51:3) Cua di e hendenan ey abo ta? Lo bo kier sirbi Dios na un manera cu lo no duel bo despues? Tin un ehempel di bida real cu nos por siña for di dje? Si, esey ta e ehempel di apostel Pablo.

³ Pablo a comete fayonan teribel durante su bida, pero tambe el a tuma decisionnan sabi. Su fayonan di pasado a duel e masha hopi, pero tambe el a siña sirbi Dios fielmente y asina a logra exito den su bida. Laga nos wak con su ehempel por siña nos sirbi Dios na un manera cu lo no duel nos despues.

PABLO SU PASADO LAMENTABEL

4. Ki pasado lamentabel apostel Pablo tabatin?

⁴ Tempo Pablo tabata un fariseo hoben, el a haci cosnan cu despues a duel e. Por ehempel, el a encabesa un campaña di persecucion cruel contra e discipelnan di Cristo. Bijbel ta bisa cu un poco despues cu persiguidonan a mata Esteban, “Saulo [conoci despues como Pablo] a cuminsa ataca e congregacion violentamente. E tabata drenta un cas tras di otro, lastra tanto homber como muher saca pafo y laga cera nan den prizon.” (Echo. 8:3) Segun Albert Barnes, un linguista biblico, e palabra Griego traduci como ‘ataca violentamente’ ta indica e celo y furia cu Saulo tabatin ora el a participa den e persecucion. Barnes a bisa cu “Saulo a habraca e iglesia manera un bestia salbahe.” Como un Hudiu devoto, Saulo a kere cu tabata su deber—manda pa Dios—di elimina cristianismo. Pues, el a menasa y persigui e cristiannan cu un crueldad brutal, y e “tabata dicidido pa caba cu nan, . . . sea homber of muher.”—Echo. 9:1, 2; 22:4.a

5. Splica con Saulo a stop di persigui e discipelnan di Hesus y cuminsa predica tocante Cristo.

⁵ Pablo tabatin intencion di bay Damasco, saca e discipelnan di Hesus for di nan cas y lastra nan hiba Jerusalem pa confronta e rabia di e Sanedrin. Sinembargo, su plan a fracasa pasobra en realidad e tabata lucha contra Hesus, Cabes di e congregacion cristian. (Efe. 5:23) Riba caminda pa Damasco, Hesus a confront’e y un luz milagroso for di cielo a hacie ciego. Despues Hesus a mand’e bay Damasco pa warda riba mas instruccion. Nos sa kico a pasa despues di esey.—Echo. 9:3-22.

6, 7. Kico ta mustra cu Pablo tabata bon consciente di su pasado lamentabel?

⁶ Asina cu Pablo a bira un cristian, su norma- y balornan a cambia. En bes di ta un enemigo feroz di cristianismo, el a bira awor un defensor ferviente di cristianismo. Asina mes, despues el a skirbi tocante su mes: “Naturalmente, boso a tende di mi conducta tempo cu mi tabata den hudaismo; mi tabata persigui e congregacion di Dios ferozmente y a purba di caba cu ne.” (Gal. 1:13) Mas despues, el a bolbe menciona su pasado lamentabel ora el a skirbi carta pa e Corintionan, pa e Filipensenan y pa Timoteo. (Lesa 1 Corintionan 15:9; Flp. 3:6; 1 Tim. 1:13) Pablo no a sintie orguyoso di e cosnan ey cu e mester a skirbi tocante su mes, pero tampoco e no a haci manera cos cu nan nunca a sosode. E tabata bon consciente di e fayonan grave cu el a comete.—Echo. 26:9-11.

⁷ E comentarista biblico Frederic W. Farrar a skirbi tocante e papel cu Saulo a hunga “den e obra horibel di persecucion.” Farrar a agrega cu ta solamente ora nos evalua e nificacion teribel di e periodo tristo aki den e bida di Pablo, nos lo por compronde “e peso enorme di remordimento cu e lo mester a sinti, y e cherche cu e lo mester a soporta na man di enemigonan malicioso.” Podise tabatin ocasion cu rumannan di e congregacionnan cu el a bishita—rumannan cu a top’e pa prome biaha—a bis’e: ‘Ta bo ta Pablo anto. No ta bo ta esun cu tabata persigui nos?’—Echo. 9:21.

8. Con Pablo a sintie pa e echo cu Jehova y Hesus a demostra misericordia y amor na dje, y ki les esey ta siña nos?

⁸ Pero Pablo tabata sa cu ta solamente pa motibo di e bondad inmereci di Dios e por a cumpli cu su sirbishi. E ta menciona e cualidad misericordioso ey di Dios un 90 biaha den su 14 cartanan; mas tanto biaha cu cualkier otro escritor di Bijbel. (Lesa 1 Corintionan 15:10.) Pablo tabata masha agradecido mes cu Dios a tene misericordia di dje, y e kier a mustra bon cla cu e bondad inmereci cu Dios a mustra na dje no tabata envano. Pesey el a “traha mas duro” cu tur e otro apostelnan. Kico nos ta siña for di e ehempel di Pablo? E ta mustra cu si nos pone fe den e sacrificio di rescate di Hesus, confesa nos picanan y cambia nos bida, Jehova ta dispuesto pa pordona hasta picanan hopi serio. Esta un bon les esaki ta pa esnan cu ta pensa cu e sacrificio di Cristo no ta conta pa nan pasobra nan picanan ta mucho grandi! (Lesa 1 Timoteo 1:15, 16.) A pesar cu Pablo tabata un persiguido feroz di Cristo, e por a skirbi despues: “E Yiu di Dios . . . a stima mi y a entrega su mes pa mi.” (Gal. 2:20; Echo. 9:5) Si, Pablo a siña cu e mester haci su best den e sirbishi di Dios a pesar di su pasado, pa e no tin nada mas di lamenta despues. Esey ta algo cu abo mester siña haci?

TIN COS CU ABO TA LAMENTA?

9, 10. (a) Dicon algun sirbidor di Jehova por lamenta tocante cierto cos? (b) Dicon no ta bon pa keda preocupa constantemente tocante fayonan di pasado?

⁹ Bo a yega di haci cosnan cu awor bo ta lamenta? Bo a yega di malgasta tempo y energia valioso na actividadnan cu no ta bale la pena? Bo a yega di haci cos cu a causa daño na otro hende? Of tin otro cosnan cu kisas bo ta desea di a haci di otro manera? E pregunta importante ta: Kico bo por haci si bo ta sinti asina?

¹⁰ Hopi hende no ta stop di preocupa! Den un sentido, un hende cu ta preocupa constantemente ta castiga su mes, irita su mes y persigui su mes. Preocupacion ta causa gran ansiedad, pero acaso e ta resolve e problema? No! Esey ta mescos cu purba di bay dilanti den un stoel di zoya door di zoya oranan largo. Bo ta gasta tur bo energia, pero bo no ta bay ni un stap dilanti! En bes di sinta preocupa, lo bo por tin mihor resultado si bo tuma iniciativa pa haci algo al respecto. Por ehempel, bo por pidi e persona cu bo a ofende despensa y purba drecha e relacion. Bo por pensa riba kico a hiba na e mal echo ey, pa asina evita e mesun problema ey den futuro. Pero tin biaha, simplemente bo tin cu wanta e consecuencianan di bo fayo. Bo no ta gana nada cu sigui preocupa! Al contrario, e ta paralisa bo y stroba bo di sirbi Dios plenamente.

11. (a) Kico nos mester haci pa ricibi Jehova su misericordia y bondad amoroso? (b) Relaciona cu nos fayonan di pasado, cua ta e receta cu Bijbel ta prescribi pa haya paz mental?

¹¹ Algun hende tin e tendencia di laga nan fayonan di pasado domina nan di tal manera cu nan ta sinti cu nan no ta digno den bista di Dios. Nan ta sinti cu nan a comete mucho fayo of cu nan picanan ta asina teribel cu nan no ta merece Dios su misericordia. Pero sea loke sea un persona a haci den pasado, e por arepenti, cambia y pidi Dios pordon. (Echo. 3:19) Jehova por demostra su misericordia y bondad amoroso na un persona asina, mescos cu el a demostr’e na tantisimo otro hende. Den su gran bondad, lo e pordona ken cu ta humilde, honesto y sinceramente arepenti. Por ehempel, Jehova a pordona Job, kende a bisa: “[Mi] ta arepenti den stof y shinishi.” (Job 42:6) Nos tur tin cu sigui e receta cu Bijbel ta prescribi pa haya paz mental: “Esun cu sconde su picanan lo no prospera, ma esun cu confesa y laga nan lo haya misericordia.” (Prov. 28:13; Sant. 5:14-16) Pues, nos por confesa nos picanan na Dios, pidie pordon y haci tur loke nos por pa corigi nos fayo. (2 Cor. 7:10, 11) Si nos haci e cosnan aki, nos lo por disfruta di e misericordia di Jehova, Esun cu ta “pordona abundantemente.”—Isa. 55:7.

12. (a) Con nos por imita e bon ehempel di David ora nos consenshi ta tormenta nos? (b) Den ki sentido cosnan a “duel” Jehova, y con e punto ey ta anima nos? (Wak e cuadro.)

¹² Un medio poderoso via cua nos por ricibi yudansa di Dios ta oracion. Den un bunita salmo, David a expresa su sintimentonan profundo den un oracion cu a refleha su fe. (Lesa Salmo 32:1-5.) Manera David a admiti, el a keda agota ora el a purba di ignora su consenshi cu tabata conden’e! Aparentemente, esey a afect’e mentalmente y fisicamente, y el a perde su goso pasobra e no a confesa su pica. Ki ora David a haya alivio y pordon? Esey ta ora el a confesa na Dios. Jehova a contesta e oracionnan di David y a dun’e e forsa pa e sigui padilanti cu su bida y logra algo cu ta bale la pena. Asina abo tambe por tin e confianza cu Jehova lo presta atencion na bo suplica si bo resa na dje di curason. Si e fayonan cu bo a comete den pasado ta molestia bo, corigi nan te caminda bo por y despues acepta cu Jehova a scucha bo oracion y pordona bo, ya cu el a duna e siguransa cu e ta haci esey.—Sal. 86:5.

CONCENTRA RIBA FUTURO

13, 14. (a) Riba kico nos mester concentra aworaki? (b) Menciona algun pregunta cu por yuda nos analisa nos situacion actual den bida.

¹³ Hende sa bisa cu bo por compronde bida mirando atras, pero cu bo mester bib’e mirando padilanti. Pues, en bes di keda preocupa tocante pasado, nos mester concentra riba nos situacion actual y riba futuro. Puntra bo mes: Kico mi ta haciendo—of no ta haciendo—aworaki cu aki un par di aña lo mi lamenta cu mi a haci of no a haci? Mi ta sirbiendo Dios fielmente di manera cu lo mi no tin nada di lamenta den futuro?

¹⁴ Segun cu e gran tribulacion ta acerca, nos lo no kier ta ansha, pensando: ‘Mi tabatin chens di haci mas den e sirbishi di Dios? Dicon mi no a traha pionero tempo mi tabatin e oportunidad? Kico a stroba mi di haci esfuerso pa bira sirbidor ministerial? Mi a haci tur mi esfuerso pa bisti e personalidad nobo? Mi ta e clase di persona cu Jehova kier den su mundo nobo?’ En bes di solamente preocupa tocante e preguntanan serio ey, nos lo kier uza nan pa analisa nos mes y haci sigur cu nos ta dunando lo mihor di nos mes den e sirbishi di Jehova. Si nos no haci esaki, nos lo por sigui hiba un bida cu lo bay resulta den mas cos pa lamenta.—2 Tim. 2:15.

NUNCA LAMENTA CU BO A SCOGE PA RINDI SIRBISHI SAGRADO

15, 16. (a) Menciona algun sacrificio cu hopi ruman a haci pa pone e sirbishi di Dios na prome luga den nan bida. (b) Dicon nos no mester lamenta of sinti duele pa e sacrificionan cu nos a haci ora nos a pone actividadnan di Reino na prome luga?

¹⁵ Kico di boso cu a haci sacrificio pa por sirbi Jehova den e trabou di tempo completo? Kisas bo a laga un carera prometedor of un negoshi lucrativo pa simplifica bo bida y haya mas tempo pa dedica na actividadnan di Reino. Of kisas bo a keda sin casa of si bo a casa mes, bo a dicidi di keda sin haya yiu pa bo por a cualifica pa e sirbishi di tempo completo, manera sirbishi di Betel, trabou di construccion internacional, trabou di circuito of sirbishi di misionero. Acaso awor cu bo edad a subi den e sirbishi di Jehova, bo mester lamenta of sinti duele cu bo a tuma e decisionnan ey? Bo mester sinti cu e sacrificionan cu bo a haci tabata innecesario of cu bo a haci nan na mal momento? Claro cu no!

¹⁶ Bo a tuma e decisionnan ey pasobra bo ta stima Jehova masha hopi y ta desea di curason di yuda otro hende sirbie. No pensa cu lo bo ta den un mihor situacion awor si bo a hiba bo bida di un otro manera. Bo por tin e gran satisfaccion cu bo a haci loke bo tabata sa ta e cos corecto pa haci den bo circunstancia. Bo por ta contento cu bo a haci bo maximo esfuerso pa sirbi Jehova. Lo e no lubida tur e sacrificionan cu bo a haci p’e. Den e “bida berdadero” cu ta na caminda, lo e recompensa bo cu bendicionnan cu ta hopi mas mihor cu cualkier cos cu bo por imagina!—Sal. 145:16; 1 Tim. 6:19.

CON PA SIRBI DIOS SIN TIN CU LAMENTA DESPUES

17, 18. (a) Ki principio a yuda Pablo sirbi Dios sin tin nada di lamenta? (b) Kico bo ta determina pa haci relaciona cu bo sirbishi na Jehova di pasado, presente y futuro?

¹⁷ Ki principio a yuda Pablo sirbi Dios sin tin nada mas di lamenta despues? Segun Beibel na papiamentu koriente, Pablo a skirbi: “Mi ta lubidá tur loke ta tras di lomba i ta rèk pa gara loke ta mi dilanti. Mi ta pusha bai dilanti pa mi yega na e meta.” (Lesa Filipensenan 3:13, 14.) Pablo no a keda pensa riba e cosnan malo cu el a haci den hudaismo. Mas bien, el a uza tur su energia pa keda fiel na Dios ya asina e por a ricibi e premio di bida eterno.

¹⁸ Nos tur por aplica e principio ey cu nos ta haya den e palabranan di Pablo. En bes di keda preocupa tocante cosnan di nos pasado, cosnan tras di lomba cu nos no por cambia, nos mester rek pa gara loke tin nos dilanti. Ta berdad cu kisas nos no por realmente lubida nos fayonan di pasado, pero nos no tin cu keda castiga nos mes pa motibo di nan. Nos por haci esfuerso pa laga nan tras di lomba, sirbi Dios lo mihor cu nos por awor, y concentra riba e futuro glorioso cu ta spera nos!