E Resureccion di Hesus Ta Nifica Bida!
E RESURECCION di Hesus no ta djis un suceso di pasado cu no tin mucho nificacion pa nos awe. Apostel Pablo a papia di su importancia ora el a skirbi: “Cristo a ser lanta for di morto, e prome fruta di esnan cu a bay sosega. Pasobra ya cu morto a bin pa medio di un hende, resureccion di e mortonan tambe ta bin pa medio di un hende. Mescos cu den Adam tur ta muri, asina tambe den Cristo tur lo haya bida.”—1 Corintionan 15:20-22.
Hesus a ser resucita dia 16 di nisan di aña 33 di nos era, riba e mesun dia cu e Hudiunan tabata ofrece e prome frutanan di nan prome cosecha di trigo na Jehova Dios na e santuario di e tempel na Jerusalem. E echo cu Pablo a bisa cu Hesus ta e prome fruta ta indica cu lo tin mas hende cu lo ser lanta for di morto.
E siguiente palabranan di Pablo ta splica kico a bira posibel pa medio di e resureccion di Hesus. El a bisa: “Ya cu morto a bin pa medio di un hende, resureccion di e mortonan tambe ta bin pa medio di un hende.” Adam a pasa pica y imperfeccion pa nos tur; pesey nos tur ta muri. Sinembargo, Hesus a duna su bida humano perfecto como rescate y asina a habri caminda pa humanidad ser libra for di sclavitud na pica y morto pa medio di e resureccion. Dunando un resumen apropia di e asunto, Pablo a skirbi na Romanonan 6:23: “E salario cu pica ta paga ta morto, ma e regalo cu Dios ta duna ta bida eterno pa medio di Cristo Hesus, nos Señor.”
Hesus mes a splica kico su morto y resureccion ta nifica pa nos. Papiando di su mes, el a bisa: “Mester hisa e Yiu di hende na halto, pa tur hende cu kere den dje por haya bida eterno. Pasobra Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”—Juan 3:14-16.
Imagina bo—bida eterno sin dolor, sufrimento of tristeza! (Revelacion 21:3, 4) Ki un futuro maraviyoso! Un experto riba tereno di Bijbel a bisa: “Santana ta pone nos corda con cortico bida ta, ma e resureccion ta un garantia cu morto ta algo temporal.” Si, e resureccion di Hesus ta nifica bida!