BO TABATA SA?

Con e Hudiunan di prome siglo tabata prepara nan mortonan pa entiero?

E Hudiunan tabata dera nan mortonan hopi lihe despues di fayecimento, por lo general riba e mesun dia. Tabatin dos motibo pakico nan tabata haci esey mesora. Di prome, cadaver ta putri lihe den e clima cayente di Medio Oriente. Di dos, hende di e tempo ey tabata pensa cu tabata un falta di respet pa e difunto y pa su famia si a laga hopi dia pasa prome cu dera e curpa.

E Evangelionan y e buki di Echonan ta menciona por lo menos cuater entiero cu a tuma luga riba e dia cu e persona a muri. (Mateo 27:57-60; Echonan 5:5-10; 7:60–8:2) Siglonan mas prome, Jacob su esposa stima Raquel a muri tempo cu Jacob y su famia tabata di biahe. En bes di hiba su curpa bek na e luga caminda nan tabatin nan graf di famia, Jacob a der’e den un graf “na caminda pa ... Betlehem.”—Genesis 35:19, 20, 27-29.

E relatonan di Bijbel relaciona cu entiero ta revela cu e Hudiunan tabata prepara un cadaver masha bon mes pa entiero. Famia y amigonan tabata laba curpa di e difunto, hunt’e cu puiro cu ta hole dushi y zeta di hopi balor y lor’e den paña. (Juan 19:39, 40; Echonan 9:36-41) Anto bisiña y otro hende tabata bin pa expresa nan tristeza y consola e famia.—Marco 5:38, 39.

Nan a dera Hesus segun e custumbernan Hudiu?

Hopi famia Hudiu tabata dera nan defuntonan den cueba y den graf cu nan tabata coba den baranca cu tabata facil pa coba y cu bo tabata haya den varios parti di Israel. Nan tabata sigui e tradicion cu e patriarcanan a establece. Abraham, Sara, Isaak y Jacob tabata entre e hendenan cu nan a dera den e cueba di Macpela, cerca di Hebron.—Genesis 23:19; 25:8, 9; 49:29-31; 50:13.

Nan a dera Hesus den un graf coba den baranca. (Marco 15:46) Por lo general, e entrada di e grafnan ey tabata smal. Parti paden tabatin varios boca, den cua e famia tabata dera su sernan keri. Despues cu e carni a putri caba na nada, nan tabata coge e wesonan seco y pone nan den un cahita di piedra cu yama osario, segun e custumbernan den tempo di Hesus. Di e manera aki, e famia por a traha luga den e graf pa futuro entieronan.

E Hudiunan no tabatin mag di haci preparacion pa entiero riba sabbat ya cu segun e Ley di Moises esey tabata un dia di sosiego. Como cu Hesus a muri mas o menos tres ora prome cu sabbat a cuminsa, Jose di Arimatea y algun hende mas a der’e sin cu nan a caba di prepara su curpa pa entiero. (Lucas 23:50-56) Pa e motibo ey, algun di Hesus su discipelnan a bay na e graf despues di sabbat cu e intencion di completa e proceso.—Marco 16:1; Lucas 24:1.