Hesus A Priminti e Malhechor Cu Lo E Bay Cielo?

E pregunta ey a lanta debi na e promesa cu Hesus a haci na e malhechor cu tabata colga banda di dje. Hesus a bis’e: “Di berdad mi ta bisa bo awe: Lo bo ta cu mi den Paradijs.” (Lucas 23:43) Ripara cu Hesus no a bis’e na unda e paradijs ey lo ta. Acaso Hesus tabata kiermen cu e malhechor lo a bay cielo hunto cu ne?

Laga nos wak prome si e malhechor aki por a bin na remarca pa haya bida den cielo. Hende cu tin e speransa di bay cielo tin cu batisa den awa y cu spirito santo pa nan por bira discipel di Hesus engendra pa spirito santo. (Juan 3:3, 5) Nan tin cu biba tambe na harmonia cu Dios su normanan moral y manifesta cualidadnan manera honrades, integridad y compasion. (1 Corintionan 6:9-11) Ademas, nan tin cu keda fiel na Dios y na Cristo te na fin di nan bida aki riba tera. (Lucas 22:28-30; 2 Timoteo 2:12) Ta solamente ora nan cumpli cu e rekisitonan aki nan por bin na remarca pa haya resureccion y carga e responsabilidad di peso cu ta spera nan den cielo, esta, di sirbi como sacerdote y rey hunto cu Cristo pa mil aña na bienestar di humanidad.—Revelacion 20:6.

Pero, e malhechor colga banda di Hesus a biba como criminal y a muri como criminal. (Lucas 23:32, 39-41) Ta berdad cu el a mustra respet pa Hesus ora el a bisa: “Hesus, corda riba mi ora bo drenta bo Reino.” (Lucas 23:42) Pero, e no tabata un discipel batisa di Hesus ni engendra pa spirito santo. E no tabata hiba un bida husto y recto tampoco. Ta rasonabel anto cu Hesus lo a priminti e homber aki cu lo e reina den cielo hunto cu Su siguidornan cu si a keda fiel te na morto?—Romanonan 2:6, 7.

Pa ilustra esaki: Si un homber pidi bo pordon’e pa motibo cu el a horta bo placa, kisas bo no ta bay denunci’e. Pero lo bo lag’e na encargo di bo negoshi of pidie percura pa bo famia? No, ta hende di confianza so lo bo encarga cu e responsabilidad ey. Mescos tambe, e hendenan cu lo haya bida den cielo tin cu demostra cu nan ta confiabel y cu nan lo pega firmemente na Dios su normanan husto ora nan ta goberna riba humanidad. (Revelacion 2:10) Pesey, maske e malhechor por tabata sincero na ultimo momento ora el a haci un suplica na Hesus, toch e no a bin na remarca pa haya bida den cielo.

Pero Hesus no a bisa e malhechor cu lo e ta hunto cu ne den cielo riba e mesun dia ey? No, pasobra Hesus mes no a subi na cielo riba e dia ey. Mas bien, e tabata tres dia y tres anochi den “bariga di tera”, esta, den graf. (Mateo 12:40; Marco 10:34) Y despues di su resureccion, ainda el a keda 40 dia riba tera prome cu el a subi na cielo. (Echonan 1:3, 9) Pesey, e malhechor no por tabata hunto cu Hesus den cielo riba e dia ey.

Ta cua paradijs e malhechor lo a bay anto? Despues di resureccion, lo e biba den Paradijs aki riba tera bou di gobernacion di Hesus. (Echonan 24:15; Revelacion 21:3, 4) Si bo kier sa mas tocante e paradijs ey y kico ta Dios su rekisitonan, papia cu cualkier Testigo di Jehova.