Bida Por Tin Sentido?

E PALABRANAN aki ta referi na un berdad innegabel, esta, cu nos bida por ta yen di “molester y dolor.” Pesey, kisas bo ta puntra bo mes: ‘Bida tin sentido?’

Tuma por ehempel Maria. Semper e tabata un hende masha activo. Pero awor cu e tin 84 aña di edad, practicamente e no ta sali cas mas. Aunke e ta bon na tino, e no tin hopi forsa mas. Con bida di un hende den un situacion asina por tin sentido?

Pero kico di abo? Bo a yega di puntra bo mes si bo bida tin sentido? Podise bo trabou ta monotono, laf y frustrante. Anto pa colmo ta parce cu niun hende no ta aprecia bo esfuersonan. Hasta si aworaki cosnan ta bay bon cu bo, toch kisas bo ta preocupa cu futuro. Tin ora, bo por hasta sinti bo bandona of deprimi. Talbes tin hopi desacuerdo y pleito den bo famia. Of kisas bo a perde un ser keri den morto. Tuma por ehempel e caso di André. E tabata masha pega na su tata. Pero di un dia pa otro su tata a bira malo y fayece. Pa André, esaki tabata un golpi hopi duro cu a laga un bashi inmenso atras.

Sea cual sea e molester of situacion dificil cu nos ta pasa aden, nos tur kier sa si bida por tin sentido. Pa haya sa esey, nos tin cu analisa bida di un persona cu a biba un 2.000 aña pasa riba tera: Hesucristo. A pesar di tur e obstaculonan cu el a confronta, su bida si tabatin sentido. Si nos sigui su ehempel, nos tambe por tin un bida asina.