Hesus—E Clave pa un Bida cu Sentido

HESUS su bida tabatin sentido? El a lanta den un ambiente humilde, y durante su bida e no tabatin hopi cos material. Realmente, e no tabatin ni sikiera un “caminda pa pone su cabes.” (Lucas 9:57, 58) Ademas, su enemigonan a odi’e, calumni’e y finalmente nan a laga mat’e.

Kisas bo ta pensa: ‘Esey no ta loke mi ta yama un bida cu sentido.’ Pero tin hopi aspecto di Hesus su bida cu ta bale la pena pa analisa. Laga nos analisa cuater di nan.

1. HESUS TABATIN UN PROPOSITO DEN BIDA: HACI E BOLUNTAD DI DIOS.

“Mi cuminda ta pa haci e boluntad di esun cu a manda mi.”—Juan 4:34.

Tanto cu palabra como accion, Hesus kier a haci e boluntad di su tata celestial, Jehova.a E tabatin un gran goso den cumpli cu e boluntad di Dios. Y manera e texto biblico ta mustra, Hesus a compara esey cu su cuminda. Laga nos wak bou di ki circunstancianan el a haci e comparacion ey.

Ora Hesus a bisa e palabranan ey, tabata merdia caba. (Juan 4:6) El a cana henter mainta door di Samaria, un luga yen di sero. Pues, no tin duda cu e tabatin hamber. De echo, su discipelnan mes a urgie: “Rabi, come.” (Juan 4:31) Pero loke Hesus a bisa nan a indica cu e trabou cu Dios a mand’e haci tabata dun’e e forsa cu e tabatin mester. Bo no ta haya cu Hesus a hiba un bida cu tabata bale la pena?

2. HESUS TABATIN UN GRAN AMOR PA SU TATA.

“Mi ta stima e Tata.”—Juan 14:31.

Hesus tabatin un relacion intimo cu su Tata ora e tabata den cielo. E amor cu e tabatin pa su Tata a motiv’e pa siña hende di e cualidadnan, proposito y tambe nomber di su Tata. Hesus a refleha e cualidadnan di su Tata perfectamente, cu echo, palabra y cu su actitud; e tabata endito su Tata. Pesey, ora Felipe a pidie: “Mustra nos e Tata”, Hesus a contest’e: “Esun cu a mira mi, a mira e Tata tambe.”—Juan 14:8, 9.

Hesus a stima su Tata asina tanto cu e tabata dispuesto pa obedec’e te na morto. (Filipensenan 2:7, 8; 1 Juan 5:3) E amor ey a duna su bida berdadero sentido.

3. HESUS A STIMA HENDE.

“Ningun hende no tin un amor mas grandi cu esun cu ta entrega su alma pa su amigonan.”—Juan 15:13.

Nos tin cu reconoce cu debi cu nos tur ta imperfecto nos futuro no ta mucho alentador. Bijbel ta bisa: “Pa medio di un hende [Adam] pica a drenta mundo, y morto pa medio di pica, y asina morto a pasa pa tur hende pasobra nan tur a peca.” (Romanonan 5:12) Pues, riba nos mes, nos no por scapa di e consecuencia di pica, esta morto.—Romanonan 6:23.

Pero nos por ta contento cu Jehova, den su gran amor, a percura e solucion pa humanidad. El a permiti su Yiu perfecto y sin pica sufri y muri pa asina percura e rescate necesario pa libra humanidad for di sclavitud na pica y morto. Si, Hesus, motiva pa amor pa su Tata y pa hende, a duna su bida humano perfecto di buena gana na nos fabor. (Romanonan 5:6-8) Tal clase di amor sin egoismo a duna su bida berdadero sentido.b

4. HESUS TABATA SA CU E TABATIN E AMOR Y APROBACION DI SU TATA.

“Esaki ta mi Yiu stima, esun cu tin mi aprobacion.”—Mateo 3:17.

Esaki ta e palabranan cu Jehova a expresa for di cielo ora cu Hesus a batisa. Asina Jehova a expresa abiertamente cu e stima y cu e ta aproba di su Yiu. Pesey Hesus por a bisa cu tur confianza: “E Tata stima mi.” (Juan 10:17) Sabiendo cu su Tata stim’e y cu e tin su aprobacion, e por a enfrenta oposicion y critica cu curashi. E por a hasta mantene su balansa y stabilidad emocional ora e tabatin cu enfrenta morto. (Juan 10:18) E echo cu Hesus tabata sa cu e tabatin e amor y aprobacion di su Tata definitivamente a duna su bida mas sentido ainda.

Sin duda, Hesus tabatin un bida cu berdadero sentido. Y nos por siña hopi for di Hesus pa nos tambe por tin un bida cu berdadero sentido. Den e siguiente articulo, nos lo trata algun bon conseho cu Hesus a duna su siguidornan tocante con pa hiba un bida cu ta bale la pena.