Un Bida cu Sentido—Hesus Ta Mustra e Caminda

MANERA nos a mira den e articulo anterior, Hesus a hiba un bida cu sentido. Pues, si nos kier pa nos bida tin sentido, nos mester imita su ehempel y sigui su consehonan.

De echo, manera e texto cita ariba ta indica, ta Jehova ta urgi nos pa cana manera Hesus a cana, esta, pa imita Hesus su ehempel y biba di acuerdo cu su siñansanan. Ora nos ta haci esey, nos lo haya Dios su aprobacion y nos bida lo tin mas sentido.

Hesus su siñansanan a inclui principionan cu por yuda nos cana manera el a cana. Nos por haya hopi di e principionan aki den un di su famoso discursonan. Laga nos analisa tres di e principionan aki y mira con nos por aplica nan den nos bida.

PRINCIPIO: “Feliz ta esnan cu ta consciente di nan necesidad spiritual.”—Mateo 5:3.

CON E PRINCIPIO AKI TA YUDA NOS HIBA UN BIDA CU SENTIDO?

Hesus a indica cu di naturaleza hende tin un necesidad spiritual. Ta pesey nos kier haya contesta pa preguntanan, manera: Dicon nos ta na bida? Dicon tin tanto sufrimento? Dios ta realmente interesa den nos? Tin bida despues di morto? Pa nos bida por tin sentido, ta importante pa nos haya contesta pa e preguntanan ey. Hesus tabata sa cu e unico fuente confiabel cu por contesta e preguntanan aki ta e Palabra di Dios. Den un oracion, Hesus a bisa su Tata: “Bo palabra ta e berdad.” (Juan 17:17) E Palabra di Dios realmente por satisface nos necesidad spiritual?

EXPERENCIA DI BIDA REAL:

Esa tabata e cantante principal di un banda popular y tabata cerca di bira un artista di rock. Pero toch e tabata sinti cu su bida tabata bashi. El a bisa: “Aunke mi tabata sinti mi bon den e banda, mi bida tabata falta sentido.” Cu tempo, Esa a conoce un Testigo di Jehova. Esa a sigui conta: “Mi a hacie masha hopi pregunta, y su contestanan logico basa riba Bijbel a lanta mi curiosidad. Pesey mi a bay di acuerdo pa e duna mi les di Bijbel.” Loke Esa a siña a conmov’e y a motiv’e pa dedica su bida na Jehova. El a bisa: “Den pasado mi tabata pasa di un problema pa otro y di un crisis pa otro. Awor, mi bida tin berdadero proposito.”a

PRINCIPIO: “Feliz ta esnan misericordioso.” —Mateo 5:7.

CON E PRINCIPIO AKI TA YUDA NOS HIBA UN BIDA CU SENTIDO?

Misericordia ta encera mustra compasion, bondad y consideracion na hende. Hesus a mustra misericordia na hende cu tabata den necesidad. Motiva pa compasion, el a tuma iniciativa pa libra nan di nan sufrimento. (Mateo 14:14; 20:30-34) Nos bida lo por tin mas sentido si nos imita Hesus den mustra misericordia, pasobra ta esnan cu ta mustra misericordia na otro hende lo ta feliz. (Echonan 20:35) Nos por mustra misericordia na otro hende mediante nos palabra- y obranan di bondad. Asina nos por ofrece alivio na esnan cu mester di nos yudansa. Pero di berdad nos lo sinti nos mihor ora nos ta mustra misericordia?

EXPERENCIA DI BIDA REAL:

Maria cu su casa, Carlos, ta un bon ehempel den mustra misericordia. Maria su tata ta viudo y awor e ta malo na cama. Nan a tum’e den nan cas pa cuid’e. Nan a yega di pasa varios anochi sin por a drumi, y na algun ocasion nan a haya nan ta hasta core bay hospital cu ne debi na su atakenan di sucu. Nan ta admiti cu tin ora nan sa sinti nan hopi cansa. Pero nan ta feliz, manera Hesus a bisa, pasobra nan ta haya un gran satisfaccion dunando Maria su tata e cuido cu e tin mester.

PRINCIPIO: “Feliz ta esnan pacifico.” —Mateo 5:9.

CON E PRINCIPIO AKI TA YUDA NOS HIBA UN BIDA CU SENTIDO?

E expresion Griego traduci como “esnan pacifico” ta nifica literalmente “esnan cu ta haci paz.” Pero con hende cu ta haci paz por tin un bida cu mas sentido? Entre otro, esaki ta yuda nos disfruta di un mihor relacion cu e hendenan rond di nos. Pesey ta bon pa nos aplica e conseho biblico aki: “Si ta posibel, te asina leu cu ta depende di boso, keda na paz cu tur hende.” (Romanonan 12:18) “Tur hende” ta inclui miembro di famia y otro hende cu no tin e mesun creencianan cu nos. Pero, di berdad nos bida lo tin mas sentido ora nos ta na paz cu “tur hende”?

EXPERENCIA DI BIDA REAL:

Pa Nair, no tabata facil mantene paz, pasobra a traves di añanan el a pasa den hopi dificultad, specialmente den su famia. For di dia cu su esposo a bay lag’e, mas o menos 15 aña pasa, e so mester a lanta su yiunan. Un di su yiu hombernan a bira adicto na droga, y hopi bes e tabata bira agresivo y menasa Nair y Nair su yiu muher. Nair ta convenci cu ta loke el a siña for di Bijbel a dun’e e forsa p’e mantene paz, hasta bou di e circunstancianan dificil ey. En bes di pleita, e ta haci esfuerso pa ta bondadoso y comprensivo. (Efesionan 4:31, 32) E echo cu Nair a siña ta pacifico a yud’e tin un bon relacion cu su famia y tambe cu otro hende.

TENE CUENTA CU FUTURO

Si nos sigui Hesus su consehonan, nos lo haya felicidad y satisfaccion den bida. Pero pa nos bida por tin berdadero sentido, ta importante pa nos sa kico futuro lo trece cu ne. Al fin y al cabo, cuanto sentido bida lo por tin si e unico cos cu ta spera nos ta di bira bieu, bira malo y despues muri? No obstante, esey ta e realidad di bida aworaki.

Pero tin bon noticia. Jehova tin hopi bendicion prepara pa tur esnan cu ta haci esfuerso pa “cana mescos cu Hesus a cana.” Jehova a priminti cu pronto lo e trece un husto mundo nobo, caminda hende fiel lo biba manera e tabata kier pa nan biba: pa semper y cu salud perfecto. Su Palabra ta bisa: “Tende! E tent di Dios lo ta cu humanidad, y lo e biba hunto cu nan, y nan lo ta su pueblo. Y Dios mes lo ta hunto cu nan. Y lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”—Revelacion 21:3, 4.

Maria, e señora di 84 aña di edad, menciona den e prome articulo di e serie aki, ta alegra den e speransa di mira e palabranan ey bira realidad. Kico di abo? Lo bo kier sa mas tocante e bida cu nos lo disfruta di dje bou di e Reino di Dios, esta, e berdadero bida? (1 Timoteo 6:19) Si esey ta e caso, bo por puntra e Testigonan di Jehova den bo area of skirbi e editornan di e revista aki.b