Ancianonan, Boso Ta Refresca “Esnan Cansa”?

Angela,a un ruman soltero di 30 y pico aña, ta un tiki nervioso. E ta wardando riba e ancianonan. Kico nan ta bay papia cu ne? El a falta un par di reunion berdad, pero e ta keda hopi cansa despues di traha henter dia cu hende di edad. Fuera di su problemanan di tur dia, e ta hopi preocupa cu e salud di su mama.

Si ta abo tin cu bishita Angela, con lo bo anima e ruman “cansa” aki? (Jer. 31:25) Pero, prome cu e bishita, con bo por prepara pa un bishita di pastoreo edificante?

PENSA RIBA E SITUACION DI BO RUMAN

Nos tur sa sinti nos cansa pa motibo di nos trabou of responsabilidadnan teocratico. Por ehempel, ora profeta Daniel a ricibi un vision cu e no por a compronde, el “a keda agota.” (Dan. 8:27) Con Dios a yud’e? Jehova a manda angel Gabriel cerca dje pa sigur’e cu el a tende su oracionnan. Tambe e angel a bis’e cu pa Jehova ainda e tabata un persona “masha stima.” (Dan. 9:21-23) Mas despues, e palabranan bon scogi di un otro angel a fortalece e profeta cansa.—Dan. 10:19.

Mescos tambe, prome cu bo bishita un ruman cu kisas ta cansa of desanima, tuma tempo pa pensa riba su situacion. Kico ta e problemanan cu e ta pasando aden? Con esakinan por ta cabando cu tur su energia? Ki bon cualidadnan e tin? Richard, un anciano pa mas cu 20 aña caba, a bisa: “Loke mi ta wak na prome luga ta e puntonan fuerte di mi rumannan.” Anto el a agrega: “Ora mi pensa mas profundo riba nan situacion prome cu e bishita, ta bira mas facil pa haya maneranan pa duna nan net e animacion cu nan mester.” Si un otro anciano ta compaña bo, pakico no sinta hunto cu ne pa analisa e situacion di bo ruman?

LAGA BO RUMAN SINTIE COMODO

Probablemente, bo ta di acuerdo cu un ruman por tin berguensa pa expresa su sintimentonan. Por ehempel, un ruman por tin problema pa papia habri cu e ancianonan cu bin bishit’e. Kico bo tin cu haci pa yud’e expresa su sintimentonan? Un smile amigabel y algun palabra di animacion por tin un bon efecto riba dje. Michael, un anciano pa mas cu 40 aña caba, sa cuminsa su bishitanan cu e palabranan aki: “Un di e privilegionan di mas bunita cu un anciano tin ta pa bishita e rumannan na nan cas pa siña conoce nan mihor. Pesey mi tabata anhela pa e dia aki yega.”

Bo por opta pa haci un oracion na principio di e bishita. Ora apostel Pablo a haci oracion, el a resalta e fe, amor y perseverancia di su rumannan. (1 Tes. 1:2, 3) Ora bo laga bo ruman sa kico bo ta pensa di su cualidadnan excelente, bo ta prepara tanto bo curason como esun di dje pa un combersacion edificante. Ademas, bo palabranan por trankilisa e ruman. Ray, un anciano cu tin hopi experencia, a bisa: “Tin biaha, nos tur ta lubida e bon cosnan cu nos ta haci. Pues, ora un hende corda nos riba nan, nos ta sinti nos mucho mas mihor.”

COMPARTI UN DON SPIRITUAL

Mescos cu Pablo, bo por comparti un “don spiritual” den forma di un pasashi di Bijbel, hasta for di un solo versiculo. (Rom. 1:11) Por ehempel, un ruman deprimi por sinti cu e no ta bal nada, mescos cu e salmista cu a compara su mes cu un “saco di cuero [machica] den huma.” (Sal. 119:83, 176) Despues di un splicacion breve di e expresion aki, bo por bisa e ruman cu bo tin e confianza cu e ‘no a lubida’ e mandamentonan di Dios.

Y kico di e ilustracion tocante e moneda di dracma perdi? Lo e no conmove un ruman muher cu a drif bay for di e congregacion of a baha man den su sirbishi? (Luc. 15:8-10) Kisas e moneda cu tabata falta tabata parti di un cadena precioso cu a consisti di hopi moneda di plata. A base di e ilustracion aki, bo por yud’e mira cu e ta un miembro valioso di e congregacion cristian. Despues di considera esey, bo por resalta cuanto Jehova ta interesa den dje como un di su lamchinan.

Por lo general, nos rumannan ta gusta papia tocante Bijbel. Pues, laga nan expresa nan mes; no papia bo so! Despues cu bo lesa un texto cu ta aplica na nan situacion, bo por puntra nan kico nan ta pensa di un cierto palabra of frase di e texto. Por ehempel, despues di lesa 2 Corintionan 4:16, bo por puntra un ruman: “Bo a yega di pasa den un situacion caminda bo a sinti cu Jehova a renoba bo?” E metodo aki por resulta den un bunita “intercambio di estimulo.”—Rom. 1:12.

Tambe bo por anima un ruman door di trata un personahe biblico cu e por compara su mes cu ne. Un ruman cu ta hopi desanima por identifica su mes cu personahenan manera Ana of Epafrodito, kendenan a yega di sinti nan deprimi pero cu a keda precioso den bista di Dios. (1 Sam. 1:9-11, 20; Flp. 2:25-30) Si e oportunidad presenta, pakico no papia di algun bon ehempel biblico?

SIGUI MUSTRA INTERES

Despues di bo bishita, sigui mustra interes den bo rumannan. (Echo. 15:36) Por ehempel, na final di bo bishita bo por haci areglo pa traha hunto cu ne den sirbishi. Ora Bernard, un anciano cu experencia, topa un ruman cu el a bishita recientemente, e ta puntr’e na un manera discreto: “Anto, conta mi, e sugerencianan cu nos a duna bo a yuda?” Ora bo mustra interes personal, bo por determina si e tin mester di mas yudansa.

Awor mas cu nunca, nos rumannan mester sinti cu nos ta interesa den nan, compronde pa nan y stima nan. (1 Tes. 5:11) Pesey, prome cu bo haci un bishita di pastoreo cerca un ruman, tuma tempo pa pensa riba su situacion. Pidi Jehova su guia. Pensa riba ki textonan bo por uza pa yud’e. E ora ey bo por haya e palabranan corecto pa refresca “esnan cansa”!