Con Nos Por Yega na Curason di Miembronan di Famia Cu No Ta Testigo?

“BAY CAS cerca bo famianan, y conta nan tur loke Jehova a haci pa bo y con el a tene misericordia di bo.” Esaki ta loke Hesucristo a bisa un homber cu kier a bira su siguidor. Tempo cu Hesus a papia cu e homber aki, probablemente Hesus tabata na Gadara, un stad cu tabata situa zuidoost di Lama di Galilea. Hesus su palabranan a mustra cu e tabata sa cu hende tin e deseo natural di comparti asuntonan interesante of importante cu nan famia.—Mar. 5:19.

Awe tambe, hopi hende tin e deseo ey, aunke den cierto cultura e ta mas bisto cu otro. Pesey, ora un hende bira un sirbidor di e Dios berdadero, Jehova, generalmente e kier comparti su fe nobo cu su famianan. Pero con e mester haci esey? Con e por yega na curason di su famianan cu tin un otro religion of cu no ta kere mes den Dios? Bijbel ta duna conseho practico y realistico.

“NOS A HAYA E MESIAS!”

Den prome siglo, Andres tabata un di e prome hendenan cu a identifica Hesus como e Mesias. Y ken el a bay conta mesora? Bijbel ta bisa: “Prome, Andres a topa Simon, su mes ruman, y el a bis’e: ‘Nos a haya e Mesias!’ (cu traduci ta nifica: ‘Cristo’).” Andres a hiba Simon Pedro cerca Hesus; di e manera ey, el a duna Pedro oportunidad di bira discipel di Hesus.—Juan 1:35-42.

Un seis aña despues, tempo cu Pedro tabata na Jope, el a haya invitacion pa bay Cesarea na cas di Cornelio, un oficial di ehercito. Ken Pedro y esnan cu tabata hunto cu ne a topa na cas di Cornelio? Bijbel ta bisa: “Naturalmente, Cornelio tabata spera nan, y el a combida su famia- y amigonan mas yega pa nan tambe por tabat’ey.” Di e manera ey, Cornelio a duna su famianan oportunidad di scucha Pedro y tuma un decision a base di loke nan a tende.—Echo. 10:22-33.

Kico nos por siña for di e manera cu Andres y Cornelio a trata nan famianan?

Tanto Andres como Cornelio a tuma iniciativa pa yuda nan famianan. Andres mes a introduci Pedro na Hesus, y Cornelio a invita su famianan pa bin tende loke Pedro tabatin di bisa. Pero ni Andres ni Cornelio no a pone presion riba nan famianan ni a uza astucia pa pone nan bira siguidor di Cristo. Kico nos por siña for di esaki? Ta bon pa nos sigui nan ehempel. Kisas nos por papia cu nos famianan y crea oportunidad pa nan cera conoci cu e berdad di Bijbel y cu nos compañeronan di fe. No obstante, nos tin cu respeta nan libertad di scoge y evita di pone presion riba nan. Pa nos por sa con nos por yuda nos famianan, laga nos wak e ehempel di Jürgen cu Petra, un pareha casa di Alemania.

Petra a studia Bijbel cu testigonan di Jehova y cu tempo el a batisa. Su esposo, Jürgen, tabata un oficial di ehercito. Na prome instante, Jürgen no tabata contento cu e decision cu su esposa a tuma. Pero cu tempo, el a realisa cu testigonan di Jehova ta siña hende e berdad. Pesey, e tambe a dedica su bida na Jehova, y awe e ta sirbi como anciano den congregacion. Awor, ki conseho e ta duna pa yega na curason di famianan cu no ta Testigo?

Jürgen a bisa: “Nos no mester pone presion riba nos famianan ni cansa nan cu asuntonan spiritual. Esey por pone nan bira hasta mas contra di e berdad. Kisas ta mihor pa nos uza tacto y predica tiki tiki na nan. Un otro manera cu nos por yuda nos famianan ta laga nan cera conoci cu rumannan di nan edad y cu tin mesun interesnan cu nan. Si nos haci esey, lo bira mas facil pa papia cu nan y yuda nan.”

Apostel Pedro y e famianan di Cornelio a acepta e berdad mesora. Pero tabatin hende den prome siglo cu tabatin mester di mas tempo pa tuma un decision.

KICO DI HESUS SU RUMAN HOMBERNAN?

Varios miembro di Hesus su famia a pone fe den dje tempo cu e tabata predica. Por ehempel, ta parce cu apostel Santiago y Juan tabata primo di Hesus y cu nan mama, Salome, tabata su tanta. Podise Salome tabata un di e ‘hopi hende muhernan kendenan tabata uza nan pertenencianan pa sirbi Hesus y e apostelnan.’—Luc. 8:1-3.

Sinembargo, tabatin otro miembronan di Hesus su famia cu no a pone fe den dje mesora. Por ehempel, na un ocasion, un aña despues di Hesus su bautismo, tabatin un multitud di hende cu a reuni den un cas pa scuch’e. “Pero ora su famianan a tende kico tabata pasa, nan a sali bin busc’e pa bay cu ne, pasobra nan di: ‘El a bira di cabes.’” Algun tempo despues, ora Hesus su mitar rumannan a bis’e unda e mester a bay, e no a contesta nan directamente. Dicon no? Pasobra “en realidad, su rumannan no tabatin fe den dje.”—Mar. 3:21; Juan 7:5.

Kico nos por siña for di e manera cu Hesus a trata su famianan? E no a sintie ofendi ora algun di nan a bisa cu el a bira di cabes. Hasta despues di su morto y resureccion, Hesus a sigui anima su famianan; el a aparece na su mitar ruman Santiago y ta parce cu e suceso aki a yuda convence Santiago y Hesus su otro mitar rumannan cu Hesus realmente tabata e Mesias. Pesey, nan tabata hunto cu e apostelnan y e otro discipelnan den e camber ariba na Jerusalem y a ricibi spirito santo. Cu tempo, Santiago y Judas, un otro mitar ruman di Hesus, a ricibi privilegionan maraviyoso.—Echo. 1:12-14; 2:1-4; 1 Cor. 15:7.

TIN HENDE TA TUMA HOPI TEMPO PA ACEPTA E BERDAD

Mescos cu den prome siglo, awe algun miembro di famia ta tuma hopi tempo pa cuminsa cana riba e caminda cu ta hiba na bida. Tuma por ehempel Roswitha, kende tabata un catolico activo tempo cu su esposo a bira testigo di Jehova na aña 1978. Siendo cu Roswitha tabata convenci di su creencianan, na prome instante e tabata opone su esposo. Pero segun cu añanan tabata pasa, e tabata opone su esposo menos y el a bin compronde cu testigonan di Jehova ta siña hende e berdad. Y na 2003, el a batisa. Kico a motiv’e pa haci cambio? Roswitha su casa no a sintie ofendi ora Roswitha tabata opon’e; mas bien, el a dun’e tempo pa e cambia su opinion. Ki conseho Roswitha tin pa nos? El a bisa: “Nos por logra hopi ora nos tin pasenshi, pasenshi y mas pasenshi.”

Monica a batisa na 1974, y su dos yiu hombernan a bira testigo di Jehova un dies aña despues. Aunke su casa Hans nunca a opone nan, ta te na aña 2006 el a batisa. Mirando bek, ki conseho e famia aki tin pa nos? “Pega lealmente na Jehova y no compromete bo fe.” Ta claro cu constantemente nan mester a sigura Hans cu nan ta stim’e. Y nunca nan a perde speransa cu un dia lo el a acepta e berdad.

E AWA DI E BERDAD TA REFRESCA HENDE

Na un ocasion Hesus a compara e mensahe di e berdad cu awa cu ta duna bida eterno. (Juan 4:13, 14) Nos kier pa nos famianan sinti nan refresca ora nan bebe e awa refrescante y limpi di e berdad. Ta claro cu nos no kier hoga nan. Pesey, nos no ta duna nan demasiado awa tras di otro. Pues, nos manera di splica nan e berdad lo por determina si nan ta sinti nan refresca of cu nan ta hoga. Bijbel ta bisa cu “curason di e husto ta studia bon con pa contesta” y cu “curason di un hende sabi ta guia su boca, y su lipnan ta papia cu conocemento.” Con nos por aplica e conseho aki?—Prov. 15:28; 16:23.

Podise un esposa kier splica su creencianan na su esposo. Si e “studia bon”, of medita prome cu e papia, lo e scoge su palabranan bon y no papia sin pensa. E no mester duna e impresion cu e ta superior of mas husto cu su esposo. Su palabranan bon pensa por ta refrescante y por promove paz. Pa e por papia y actua cu comprondemento, ta bon pa e haci su mes e siguiente preguntanan: ‘Ki ora mi casa ta relaha y mas acercabel? Kico e ta gusta lesa of papia di dje? E ta interesa den ciencia, politica of deporte? Con mi por lanta su interes den Bijbel y na mes momento respeta su opinion y sintimentonan?’

Pa nos yega na curason di miembronan di nos famia cu no ta Testigo, nos tin cu haci mas cu djis splica nos creencianan na un manera modera: Nos mester apoya loke nos ta bisa cu bon conducta.

DESPLEGA BON CONDUCTA

Jürgen, kende nos a menciona anteriormente, a bisa: “Sea consistente, aplica principionan di Bijbel tur ora bay. Esey ta un bon manera pa hala atencion di un famia di bo aunke e no ta admiti esaki.” Hans, kende a batisa casi 30 aña despues di su esposa, ta di acuerdo cu esaki. El a bisa: “Un conducta ehemplar ta importante pa nos famianan por mira e efecto positivo cu e berdad tin den nos bida.” Si, nos famianan mester por mira cu e berdad ta haci nos diferente for di otro hende na un manera positivo y no negativo.

Apostel Pedro a duna conseho valioso na esposanan cu nan esposo no ta Testigo. El a bisa: “Sea sumiso na boso esposo, ya cu si tin algun cu no ta obedece e palabra, boso por gana nan na e fe pa medio di boso conducta sin papia ni un pia di palabra, como cu nan ta testigo di boso conducta puro compaña pa respet profundo. No laga boso adorno ta di pafo so, esta, vlechtmento di cabey, bistimento di hoya di oro of di paña, ma laga esey ta e hende cu boso ta di paden, cu e adorno cu no ta caba na nada, cu ta consisti di un spirito suave y trankil, loke ta di gran balor den bista di Dios.”—1 Ped. 3:1-4.

Cu e palabranan ey, Pedro a mustra cu un esposa por gana su esposo desplegando bon conducta. Cu e principio biblico ey na mente, Christa, un ruman cu a batisa na 1972, ta purba di yega na curason di su esposo mediante un bon conducta. Aunke su esposo a yega di studia Bijbel cu testigonan di Jehova, e no a progresa. De bes en cuando e ta bay reunion, y e ta bay bon cu e rumannan den congregacion. Nan, na nan turno, ta respeta su derecho di scoge. Con Christa ta purba di yega na su curason?

Christa a bisa: “Mi ta determina pa sigui haci Jehova su boluntad. Na mes momento, mi ta purba di gana mi esposo pa medio di mi bon conducta, ‘sin papia ni un pia di palabra.’ Mi ta haci tur loke mi por pa complace mi casa, basta esaki no ta bay contra principionan di Bijbel. Y ta mas cu claro cu mi ta respeta su boluntad liber y ta laga e asunto den man di Jehova.”

Christa su ehempel ta ilustra e balor di ser flexibel. E ta mantene un bon rutina spiritual; entre otro, e ta asisti regularmente na su reunionnan y ta participa plenamente den sirbishi cristian. No obstante, e ta tene cuenta cu su esposo, pasobra e sa cu su esposo tin derecho di ricibi su amor, tempo y atencion. Ta sabi pa nos tur cu tin famia cu no ta Testigo ser flexibel y demostra comprondemento. Bijbel ta bisa: “Tin un tempo stipula pa tur cos.” Esaki ta inclui e tempo cu nos tin cu dedica na miembronan di nos famia cu no ta Testigo, specialmente nos casa. Ora nos ta pasa tempo hunto cu nos famianan, nos comunicacion cu nan ta mehora. Experencia ta mustra cu ora tin bon comunicacion tin menos chens cu miembronan di famia cu no ta Testigo ta bira jaloers, sinti nan nan so of bandona.—Ecl. 3:1.

NUNCA PERDE SPERANSA

Holger, kende su tata a batisa 20 aña despues di e otro miembronan di famia, a bisa: “Ta importante pa nos demostra cu nos ta stima e miembro di famia cu no ta Testigo y pa nos haci oracion p’e.” Christa a agrega cu ‘nunca lo e perde speransa cu un dia su esposo lo scoge pa Jehova y acepta e berdad.’ Si, nos actitud pa cu nos famianan cu no ta Testigo semper mester ta positivo y nunca nos mester perde speransa.

Nos meta ta pa keda cu un bon relacion cu nos famianan, duna nan chens di siña conoce e berdad y yega na nan curason cu e mensahe di Bijbel. Nos mester haci tur esaki “na un manera suave y cu respet profundo.”—1 Ped. 3:15.