TOPICO PRINCIPAL | ANGEL—KICO BIJBEL TA BISA DI NAN?

Kico Bijbel Ta Bisa di Angel?

Lo bo kier sa kico Bijbel ta bisa di angel? Lo bo kier sa ken nan ta, con nan a bin na existencia y kico nan ta haci? E mihor caminda pa haya contesta riba e preguntanan ey ta den Bijbel, e Palabra inspira di Dios. (2 Timoteo 3:16) Pues, laga nos wak kico Bijbel ta bisa.

Mescos cu Dios ta un Spirito, asina tambe, angel ta spirito invisibel cu “no tin carni y weso.” E angelnan fiel na Dios ta biba den cielo y tin acceso directo na Dios.—Lucas 24:39; Mateo 18:10; Juan 4:24.
Den pasado, angel tabata tuma curpa di hende pa cumpli cu cierto asignacion riba Tera cu Dios a duna nan, y ora nan caba, nan tabata kita e curpa di carni ey.—Huesnan 6:11-23; 13:15-20.
Aunke den Bijbel angel ta ser representa pa e sexo masculino y semper nan a tuma curpa di hende homber ora nan a bin na Tera, nan no tin sexo, pues nan no ta ni homber ni muher. Nan no ta casa ni reproduci. Ademas, angel no a bin na existencia originalmente como hende riba Tera, sea como baby, mucha of adulto. Jehova a crea angel, y pesey Bijbel ta yama nan “yiu hombernan di Dios.”—Job 1:6; Salmo 148:2, 5.
Bijbel ta papia di “idioma di hende y di angel”, loke ta mustra cu angel tin nan mes idioma y ta comunica cu otro. Aunke Dios a uza angel pa comunica cu hende, e no ta permiti nos adora angel ni haci oracion na nan.—1 Corintionan 13:1; Revelacion 22:8, 9.
Tin miles di miyones di angel, kisas hasta miyones di miyones.a—Daniel 7:10; Revelacion 5:11.
Angel ta “poderoso den fortaleza”; nan ta mucho mas fuerte cu hende y tin inteligencia sobrehumano. Ademas, nan por biaha hopi mas lihe cu hende of cualkier otro cos den e mundo fisico.—Salmo 103:20; Daniel 9:20-23.
Maske angel ta mucho mas fuerte y sabi cu hende, nan tin nan limitacionnan y tin cos cu nan no sa.—Mateo 24:36; 1 Pedro 1:12.
Jehova a crea angel cu nan propio personalidad, cu cualidadnan manera esnan di Dios y cu boluntad liber. Pesey, mescos cu hende, nan tambe por scoge pa haci bon of malo. Lamentablemente, algun angel a scoge pa rebeldia contra Dios.—Judas 6.

a E expresion original na Griego na Revelacion 5:11 ta referi na “10.000 biaha 10.000.” Pues esey ta duna e posibilidad cu por tin cientos di miyones di angel.

Con Angel di Dios Ta Organisa?

E arcangel, Miguel, ta e hefe di e angelnan, y e tin mas poder y autoridad cu tur otro angel. E Scritura ta indica bon cla cu Miguel ta un otro nomber pa Hesucristo.—1 Tesalonicensenan 4:16; Judas 9.

E serafinnan ta angel cu tin un rango hopi halto debi na nan privilegionan y honor, y nan ta sirbi na e trono di Dios.—Isaias 6:1-3.

E kerubinnan tambe tin puesto halto y tin responsabilidadnan special cu ta estrechamente relaciona cu Dios Todopoderoso, e Persona di mas glorioso. Varios texto di Bijbel ta indica cu nan ta sirbi Dios.—Genesis 3:24; Ezekiel 9:3; 11:22.

E miles di miyones di otro angelnan mensahero ta fungi como agente y representante di e Haltisimo y ta cumpli cu su boluntad.b—Hebreonan 1:7, 14.

b Pa mas informacion tocante angel, wak capitulo 10 di e buki Kico Bijbel Ta Siña Realmente? y tambe e appendix “Ken Ta e Arcangel Miguel?” publica pa Testigonan di Jehova. Bo por download e buki aki for di www.jw.org.