Ora un Casa Bira Infiel

“Mi kier a muri ora mi esposo a bisa mi cu e ta bay laga mi pa un mucha muher mas jong. Esey tabata hopi inhusto, specialmente ora mi corda riba e sacrificionan cu mi a haci p’e.”—Maria, Spaña.

“Ora mi esposa a bay laga mi, mi a sinti comosifuera un parti di mi a muri. Tur nos soñonan y nos plannan a caba na nada. Tabatin dia cu mi a sinti cu mi ansiedad a kita, pero despues mi tabata bolbe sinti mi deprimi.”—Bill, Spaña.

UN PERSONA por sintie hopi kibra ora su casa bira infiel. Ta berdad cu tin persona ta pordona nan pareha y ta drecha nan relacion cu otro.a Pero sea cu nan drecha nan relacion of no, esnan cu descubri cu nan casa a bira infiel ta sinti un dolor inmenso. Kico por yuda un persona deal cu e dolor ey?

TEXTO DI BIJBEL CU TA DUNA BON CONSEHO

Hopi hende cu a ser traiciona pa nan casa y cu a sinti nan mes hopi kibra a haya consuelo den Bijbel. Nan a haya sa cu Dios ta mira nan lagrimanan y ta sinti nan dolor.—Malakias 2:13-16.

“Den e multitud di mi preocupacionnan den mi, bo consuelonan ta alegra mi alma.”—Salmo 94:19.

Bill a bisa: “Ora mi a lesa e versiculo aki, mi a imagina con Jehova ta consola mi mescos cu un tata amoroso.”

“Bo ta fiel pa esun ku ta fiel.”—Salmo 18:25, BPK.

Carmen, kende su esposo tabata infiel pa varios luna, a splica: “Mi casa a traiciona mi. Pero mi tabata sa cu Jehova nunca lo traiciona mi ni laga mi na caya.”

“No sea ansha tocante nada; mas bien, den tur cos, pa medio di oracion y suplica ... laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason.”—Filipensenan 4:6, 7.

Sasha a bisa: “Mi a lesa e versiculonan aki bes tras bes. Mas mi a haci oracion, mas mi a sinti e paz di Dios den mi bida.”

Tur e personanan cu nos a menciona anteriormente kier a entrega. Pero nan a confia den Jehova Dios, y Bijbel a duna nan forsa. Bill a pone asin’aki: “Mi fe a duna mi bida proposito ora tabata parce cu tur cos ta bayendo malo. Aunke pa un tempo mi a ‘cana den e vaye di sombra’, Dios tabata cu mi.”—Salmo 23:4.

a Pa haya mas informacion tocante pordona ora un casa bira infiel, wak e serie di articulo den e Despertad! di 22 di april 1999, “Cuando el cónyuge es infiel.”

Loke A Yuda Algun Hende den e Situacion Aki

Medita riba textonan di Bijbel cu por anima bo.

Bill a splica: “Mi a lesa e buki di Job y despues e buki di Salmo, y mi a marca tur e partinan cu a pas den mi circunstancia. Mi a ripara cu e escritornan aki a experencia e mesun tipo di dolor y ansiedad cu ami tabata sinti.”

Scucha musica.

Carmen ta corda: “Ora mi no por a drumi anochi, mi tabata scucha musica. Esey a alivia mi masha hopi mes.” Daniel a bisa: “Mi a siña toca guitara y e musica a duna mi un paz mental.”

Desahoga bo mes.

Daniel a bisa: “Mi no tabatin e custumber di papia tocante mi sintimentonan. Pero mi tabatin bon amigo y mi a combersa cu nan tur dia. Mi a laga nan sa con mi tabata sinti. Mi a skirbi nan carta y mi tabata papia cu nan en persona. Esey a yuda hopi.” Sasha a bisa: “E yudansa di mi famia tabata hopi importante. Mi mama semper tabat’ey pa mi. Si mi mester a papia, semper e tabata cla pa scucha mi. Mi tata tambe a laga mi sinti safe y stima, y el a yuda mi recupera pocopoco.”

Sigui haci oracion.

Carmen a bisa: “Mi tabata haci oracion constantemente y mi a sinti cu Dios tabata band’i mi, scuchando mi y yudando mi. Durante e tempo duro aki, mi a hala mas cerca di Dios.”