Ora Bo Tin un Maleza Grave

“Ora dokter a bisa mi cu mi tin cancer den mi long y tripa, mi a pensa cu mi a caba di haya un sentencia di morto. Pero ora mi a yega cas, mi a pensa, okay, no ta loke mi a imagina, pero mi mester busca un manera pa deal cu e situacion.”—Linda di 71 aña.

“Mi ta sufri di un maleza di nervio cu ta causa hopi dolor na banda robes di mi cara. Tin biaha, e dolor severo aki a haci mi depresivo. Hopi biaha, mi tabata sinti mi so y mi a hasta pensa pa comete suicidio.”—Elise di 49 aña.

Un hende homber enfermo den rolstoel ta rondona pa su sernan keri

SI ABO of un ser keri di bo a ser diagnostica cu un maleza cu por causa morto, bo sa cu esey por trece hopi angustia. E problema no ta solamente e enfermedad, sino e stress emocional cu esey ta trece cu ne. Miedo y ansiedad por aumenta debi na stress di cita medico, dificultad pa haya tratamento y e efectonan secundario desagradabel di remedi. E angustia mental cu un maleza grave ta causa por bira insoportabel.

Kico por yuda nos? Hopi hende a haya consuelo ora nan a haci oracion na Dios y lesa relatonan animante den Bijbel. Un otro fuente di consuelo ta e amor y apoyo di famia y amigonan.

LOKE A YUDA ALGUN HENDE DEN E SITUACION AKI

Robert, kende tin 58 aña, a bisa: “Confia den Dios y e lo yuda bo enfrenta bo maleza. Haci oracion na Jehova y expresa loke bo ta sinti. Pidie pa su spirito santo. Pidie yuda bo keda fuerte pa bo famia y pa yuda bo enfrenta bo maleza na un manera calmo.

Ta un gran yudansa ora bo tin e apoyo emocional di bo famia, esta, ora nan t’ey pa bo. Mi ta haya yamada tur dia di un of dos miembro di famia cu ta puntra mi con mi ta sinti. Y mi ta haya animacion di amigonan cu ta biba na diferente pais tambe. Nan ta haci mi sinti hopi mas mihor, y esey ta yuda mi pa mi sigui lucha.”

Bo tin un amigo cu ta malo y bo ta pensa pa bishit’e? Wak kico Linda a bisa: “Un persona cu ta malo kier hiba un bida mas normal cu ta posibel y kisas e lo no kier papia di su maleza tur ora. Kiermen papia cu ne di cosnan cu boso tin custumber di papia cu otro.”

E forsa cu Dios ta duna nos, e consuelo cu Bijbel ta duna nos y e apoyo di famia y amigonan stima por duna nos e confianza cu bida ta bale la pena, hasta ora nos tin un maleza grave.

Texto di Bijbel Cu Ta Duna Bon Conseho

Confia den Dios.

“Mi a busca SEÑOR, y el a contesta mi, y a libra mi for di tur mi temornan. E pober hende aki a sclama y SEÑOR a tend’e.”—Salmo 34:4, 6.

Linda a bisa: “Mi nunca ta haci oracion pa pidi Dios pa cura mi di mi maleza, sino mi ta pidi Dios pa haci mi fuerte pa mi deal cu mi maleza.”

Lesa Bijbel pa bo haya forsa.

“Ningun habitante lo no bisa: ‘Mi ta malo.’”—Isaias 33:24.

Medita riba Dios su promesanan pa futuro. Esey lo duna bo speransa y forsa pa persevera.

Pidi yudansa di bo famia y amigonan.

“Un amigo ta stima tur ora bay, y [ta] un ruman [cu] ta naci pa tempo di adversidad.”—Proverbionan 17:17.

Elise a bisa: “No isola bo mes. Laga bo amigonan yuda bo. Tin biaha lo bo sinti cu bo ta bo so y cu ni Dios no ta scucha bo pero no isola bo mes.”