Ora Bo Ta Sinti Cu No Ta Bale la Pena pa Sigui Biba

Adriana di Brazil a admiti: “Tur ora mi tabata sinti mi angustia, pesey mi a pensa cu lo ta mihor pa mi caba cu mi bida.”

BO A yega di sinti bo asina malo cu bo no kier a biba mas? E ora ey bo lo compronde con Adriana a sinti. El a sufri di ansiedad severo y tabata sintie tristo y desespera. Adriana a haya sa cu e tin depresion.

Laga nos wak tambe e ehempel di un hende homber Japones cu yama Kaoru, kende tabata cuida su mayornan enfermo di edad avansa. El a splica: “Na e momento ey, mi tabata sinti agota debi na hopi presion na trabou. Cu tempo, mi a perde mi apetit y mi no por a drumi bon mas. Mi a cuminsa pensa cu lo ta un alivio si mi djis muri.”

Un hende homber Nigeriano cu yama Ojebode a bisa: “Tur ora mi tabata sinti mi tristo, y mi tabata yora pa cualkier cos. Pesey mi tabata busca un manera pa caba cu mi bida.” Danki Dios cu Ojebode, Kaoru y Adriana no a comete suicidio. Pero tur aña, cientos di miles di hende ta comete suicidio.

KEN POR YUDA BO?

Esnan cu mas ta comete suicidio ta hende homber. Mayoria di e hende hombernan aki tabatin berguensa pa pidi yudansa. Hesus a bisa cu esnan cu ta malo mester di dokter. (Lucas 5:31) Pues, si bo ta sinti bo asina deprimi cu bo ta pensa pa caba cu bo bida, por fabor, no sinti berguensa pa pidi yudansa. Hopi hende cu ta sufri di depresion a haya tratamento medico, y esey a yuda nan sinti mas mihor. Ojebode, Kaoru y Adriana a haya yudansa medico, y awor nan tambe ta sinti hopi mas mihor.

Tin biaha dokter ta recomenda pa uza medicina of pa papia cu un terapista of pa haci tur dos pa trata cu depresion. Esnan cu ta sufri di depresion tin mester di famia y amigonan cu ta sostene nan, mustra pasenshi na nan y compronde nan. E mihor amigo cu nos por tin ta Jehova Dios, kende ta percura yudansa den Bijbel pa nos.

TIN UN SOLUCION PERMANENTE?

Hende cu ta sufri di depresion kisas mester haya tratamento medico pa un periodo largo y kisas mester haci cierto cambio den nan bida. Pero si bo ta sufri di depresion, bo por pensa riba e futuro maraviyoso cu tin nos dilanti. Esey ta loke Ojebode a haci. El a bisa: “Mi ta spera ansiosamente riba cumplimento di Isaias 33:24, cu ta bisa cu lo yega e dia cu niun hende riba Tera lo bisa ‘mi ta malo.’” Mescos cu Ojebode, e promesa di Dios di un “Tera nobo”, unda lo no tin “dolor” mas, por consola nos. (Revelacion 21:1, 4) E promesa ey ta nifica tambe cu lo no tin niun problema emocional ni mental mas. Bo sintimentonan cu ta causa dolor lo disparce pa semper y “lo no wordo recorda mas ni bin na memoria.”—Isaias 65:17.

Texto di Bijbel Cu Ta Duna Bon Conseho

Dios ta compronde loke bo ta sinti.

“Ami ta SEÑOR bo Dios, kende ta sostene bo man drechi, kende ta bisa bo: ‘No tene miedo, lo mi yuda bo.’” —Isaias 41:13.

Jehova ta compronde loke nos ta sinti mas mihor cu cualkier otro hende y e kier yuda nos.

Medita riba e Palabra di Dios.

“[Elias] a pidi pa e muri, y a bisa: ‘Ta basta; awor, o SEÑOR, tuma mi bida.’”—1 Reynan 19:4.

Ojebode a bisa: “Medita riba Bijbel a yuda mi. Mi a realisa cu profeta Elias a sinti mescos cu mi.”

Siña for di ehempelnan cu tin den Bijbel.

“Mi [Hesus] a suplica Dios pa bo [Pedro], pa bo fe no debilita.” —Lucas 22:32.

Despues cu apostel Pedro a nenga Hesus tres biaha, e tabata sinti cu e no por mas y el a cuminsa yora amargamente. Kaoru a bisa: “Pedro su experencia a yuda mi mira cu Jehova y Hesus a compronde loke Pedro a sinti y esey a anima mi.”

Bo sintimentonan cu ta causa dolor lo disparce pa semper y “lo no wordo recorda mas ni bin na memoria.”—Isaias 65:17