No Laga Bo Programa Druk Stroba Bo
1. Dicon algun publicador ta vacila pa ofrece estudio di Bijbel?
1 Algun publicador cu ta hopi ocupa ta vacila pa ofrece un estudio di Bijbel. Pa bo conduci un estudio di Bijbel bo mester tin tempo. Bo tin cu prepara, bay studia cu e persona y yud’e vence su problemanan personal. Apostel Pablo a bisa cu el a comparti su alma pa yuda e hendenan na Tesalonica siña conoce Jehova. (1 Tes. 2:7, 8) Pero con nos por conduci un estudio hasta si nos tin un programa hopi druk?
2. Con nos amor pa Jehova lo motiva nos pa uza nos tempo?
2 Saca Tempo pa Sirbi Jehova: Ta berdad cu nos tin cu saca tempo pa sirbi Jehova. Tur siman nos ta asisti na nos reunionnan, sali den sirbishi, lesa Bijbel y haci oracion. Un persona casa, maske e ta hopi ocupa, gustosamente ta saca tempo pa dedica na su esposo of esposa. Nos cu ta stima Jehova mester ta hasta mas contento ainda pa uza nos tempo pa ador’e. (Efe. 5:15-17; 1 Juan 5:3) De echo, Hesus a bisa cu un parti importante di nos adoracion ta e trabou di haci discipel. (Mat. 28:19, 20) Ora nos medita riba e punto ey, nos lo sinti nos mas motiva pa cumpli cu e responsabilidad di conduci un estudio di Bijbel.
3. Si debi na algun circunstancia nos haya nos stroba, kico nos por haci pa sigui cu un estudio di Bijbel?
3 Pero kico nos por haci si trabou, maleza cronico of asignacion teocratico ta stroba nos di bay un estudio? Den e casonan ey algun publicador sa conduci nan estudio di Bijbel via telefon of computer. Esnan cu tin un maleza cronico ta pidi e studiante pa bin studia na nan cas. Algun ta palabra cu publicador confiabel pa percura pa e studiante ora cu nan mes no por bay studia cu ne.
4. Ki bendicion nos ta ricibi ora nos ta conduci estudio di Bijbel?
4 Pablo a sinti hopi goso ora el a duna di su tempo y energia pa siña otronan e berdad. (Echo. 20:35) Ora el a mira fruta di su trabou na Tesalonica, el a gradici Jehova pa esey. (1 Tes. 1:2) Nos tambe por haya hopi goso y satisfaccion den sirbishi si nos no laga nos bida druk stroba nos di conduci estudio di Bijbel.