Conducta Cu Ta Duna Gloria na Dios
1. Dicon ora nos ta asisti na nos congreso nos ta hala atencion di hopi hende?
1 Ora nos ta asisti na nos congresonan, nos ta hala atencion di hopi hende. Den hopi stad, medionan di comunicacion ta informa e comunidad tocante e congreso. Hotel- y restaurantnan ta yena cu Testigonan, y hende cu ta biba den e areanan ey por mira hopi ruman riba caya cu nan badge bisti. Ata aki algun recordatorio cu lo yuda nos duna gloria na Dios pa medio di nos bon conducta mientras cu nos ta na e stad cu ta tene e congreso.—1 Ped. 2:12.
2. Con nos manera di bisti modesto den e stad cu ta tene e congreso por duna gloria na Dios?
2 Bisti na un Manera Modesto: Nos manera di bisti modesto ora nos ta asisti na e congreso hopi biaha ta impresiona hende cu ta observa nos. Pero nos manera di bisti na otro momentonan, manera ora nos ta ‘check-in’ na hotel, ta come den un restaurant, ta haci compras, etcetera, por impresiona hende hasta mas ainda. Aunke nos no tin nodo di bisti na un manera formal na e momentonan ey, nos paña mester ta modesto y digno, no mucho informal. Esnan cu ta observa nos mester por mira e diferencia entre nos y un hende cu no ta creyente. (Rom. 12:2) Ademas, ta bon pa nos bisti nos badge pasobra asina nos ta duna publicidad na e congreso, crea oportunidad pa duna testimonio y yuda otro rumannan identifica nos.
3. Con nos por demostra pasenshi y cortesia?
3 Pasenshi y Cortesia: Awendia hopi hende ta egoista y malagradecido. Pesey ora nos ta mustra pasenshi y cortesia, nos ta cay na agrado di otro hende, specialmente e personal di hotel y restaurant. (2 Tim. 3:1-5) Ora di warda asiento of para den rij pa haya publicacion nobo, ta bon pa nos busca, no nos mes beneficio, sino esun di otro hende. (1 Cor. 10:23, 24) Un homber interesa a bisa despues cu el a asisti na su prome congreso: “Mi no ta corda niun di e discursonan di e dia ey, pero e bon conducta di e Testigonan a keda graba den mi mente.”
4. Dicon ta bon pa nos pensa pa duna un man na congreso si nos por?
4 Boluntarionan Dispuesto pa Sirbi: Cristiannan berdadero semper ta cla pa yuda. (Sal. 110:3) Abo por duna un man na congreso? Na un luga cu a tene un congreso, casi 600 ruman a duna un man pa limpia e luga prome cu e congreso. E personal di e luga a keda impresiona y a bisa: “Esaki ta e cos di mas sorprendente cu nos a yega di mira. Nos no por a kere cu tur e hendenan aki ta boluntario.” Nos ta spera ansiosamente riba e congreso di districto 2013 y e oportunidad di no solamente scucha y siña di Dios sino tambe di dun’e gloria.
[Preguntanan di Estudio]
[Cuadro na pagina 3-6]
Recordatorionan pa Congreso di Districto 2013
◼ Orario di Programa: Lo habri e portanan for di 12:00 p.m. Tur e tres dianan e musica di introduccion lo cuminsa 1:20 p.m. Na e momento ey, nos tur mester tuma asiento pa asina e programa por cuminsa na un manera digno. Riba diabierna y diasabra e cantica y oracion di conclusion lo ta 8:50 p.m. y riba diadomingo 7:35 p.m.
◼ Parkeermento: Luganan di parkeer lo ta gratis y lo ser ocupa segun e orden di yegada. Luganan di parkeer sa ta limita, pues ta bon pa nos bay mas tanto posibel hunto den un auto en bes di cada hende bin cu su mes auto.
◼ Wardamento di Asiento: Bo por warda asiento solamente pa esnan cu ta biba den cas cu bo y esnan cu bin den e mesun vehiculo cu bo of esnan cu bo ta studiando cu ne actualmente. Asiento pa rumannan di edad y esnan enfermo ta limita, pues kisas no ta posibel pa tur miembro di nan famia sinta hunto cu nan. Laga e asientonan aki pa e rumannan di edad y esnan enfermo y esnan cu ta yuda nan.—1 Cor. 13:5.
◼ Cuminda: En bes di bandona e sitio di congreso pa bay busca cuminda durante pausa, bin cu algo light pa come. Bo por bin cu un jug chikito cu por bay bou di bo stoel. No ta permiti pa bin cu jug grandi di picknick, ni nada di glas na e luga di congreso.
◼ Donacion: Nos por mustra aprecio pa e trabounan envolvi pa haci e congreso di districto posibel mediante nos contribucion boluntario pa e obra mundial na e congreso. Skirbi tur cheque na nomber di “Watch Tower.”
◼ Remedi: Si bo ta uza remedi, corda bin cu nan, ya cu esakinan lo no ta disponibel na congreso. Personanan diabetico cu ta uza hangua mester benta esakinan afo na un manera responsabel, ya cu nan ta cay bou di desperdicio peligroso. No benta nan den coy sushi na e luga di congreso ni na hotel.
◼ Sapato: Tur aña ta sosode accidente pa motibo di sapato inapropia, specialmente sapato hilchi halto. Pa preveni accidente, ta bon pa bisti sapato comodo y modesto; esey lo yuda bo cana sin peliger riba trapi y areanan di subida; asina lo bo evita tambe cu bo sapato ta pega den rooster, etcetera.
◼ Hende Cu Tin Problema cu Oido: Lo transmiti e programa riba un frecuencia FM. Pa bo por scucha e programa, lo bo tin cu trece un radio di bateria y earphone.
◼ Stroller di Baby y Stoel: No trece stroller di baby ni stoel grandi cu por stroba otro hende na e sitio di congreso. Loke si ta permiti ta asiento di mucha, manera e tipo cu ta uza den auto, cu ta keda safe den un asiento banda di e mayor.
◼ Perfume: Mayoria di congreso ta tuma luga den edificionan cera cu ta depende di sistema di ventilacion. Pesey, lo ta amoroso di nos parti pa limita uzo di perfume y colonia fuerte cu lo por causa reaccion alergico cerca esnan cu tin problema respiratorio of otro problema parecido.—1 Cor. 10:24.
◼ Formulario Por Fabor Atendé (S-43): Uza un formulario Por Fabor Atendé pa duna informacion relaciona cu cualkier persona cu mustra interes como resultado di testimonio informal durante e congreso. Por entrega formulario yena sea na e Departamento di Literatura of na e secretario di bo congregacion ora bo ta bek den bo congregacion.
◼ Restaurant: Honra Jehova su nomber mediante bo bon conducta na restaurant. Bisti na un manera cu ta klop pa un cristian. Corda laga tip si esey ta e custumber local.
◼ Servicio di Boluntario: Si bo kier traha como boluntario, meld na e Departamento di Servicio di Boluntario na e congreso. Mucha bou di 16 aña cu kier yuda por haci esaki, pero bou di guia di un mayor of voogd of un adulto aproba pa un di nan.