Dos Manera Nobo pa Predica den Area Publico
1. Ki ehempel e cristiannan di prome siglo a pone pa nos?
1 E cristiannan di prome siglo no a predica solamente di cas pa cas. Nan a predica na luganan publico tambe. (Echo. 20:20) Por ehempel, nan a bay na e tempel caminda nan tabata sa cu nan lo a haya hopi hende. (Echo. 5:42) Ora apostel Pablo tabata na Atenas, el a predica tur dia na e hendenan riba plasa. (Echo. 17:17) Awendia, sirbishi di cas pa cas ta keda e manera principal cu nos ta plama e bon noticia. Sinembargo, nos ta predica tambe den parkeerplaats, negoshi, parke, caya druk y na cualkier otro luga caminda cu nos por haya hende pa papia cu ne. Aunke tur publicador ta haya animacion pa predica na luganan publico caminda ta posibel, hopi di nos lo tin e oportunidad di uza dos manera nobo y emocionante pa predica den area publico.
2. For di november 2011, nos rumannan a cuminsa purba cu cua manera nobo pa predica den area publico?
2 Un Manera Special pa Predica den Area Publico den Stadnan Grandi: Manera e Anuario 2013 na Spaño ta bisa na pagina 16 y 17, for di november 2011, nos rumannan a purba cu un manera nobo pa predica den e areanan publico di New York. Nan a pone algun mesa y stand cu bunita posternan y literatura den diferente idioma na luganan strategico di e stad caminda tin hopi hende ta trafica na pia. Tur dia, miles di hende ta pasa na e luganan ey, incluso esnan cu ta biba den edificionan bon proteha y esnan cu hopi biaha ta dificil pa haya na cas. E resultado tabata impresionante. Den un luna, e rumannan a distribui 3.797 revista y 7.986 buki. Hopi di esnan cu a pasa na e mesanan a pidi pa un estudio di Bijbel. E meta principal tabata pa cuminsa estudio di Bijbel. Pesey, asina cu e rumannan a haya un adres, nan tabata pas’e mesora pa e congregacionnan corespondiente pa nan por rebishita e persona interesa.
3. Con lo bay expande e manera nobo aki di predica den areanan publico?
3 En bista di e bon resultado cu e manera nobo aki tabatin, a dicidi pa cuminsa cu ne na otro stadnan grandi, rond mundo. Cada sucursal ta dicidi den cua stad na e paisnan cu ta cay bou di nan lo por uza e manera nobo aki di predica. Por lo general, lo scoge stadnan cu tin stacion grandi di transporte publico, hopi oficina of apartamento caminda tur dia miles di hende ta trafica na pia. E sucursalnan lo tuma contacto cu e congregacionnan cu lo participa den e manera nobo aki di predica y lo duna nan mas instruccion. Por lo general, lo uza pionero special y regular pa e trabou aki, aunke cu den algun luga pioneronan auxiliar tambe lo por participa.
4. Con e rumannan ta predica na e manera special aki den stadnan grandi?
4 Con pa Predica na e Manera Aki: Por lo general, e pioneronan cu ta predica na e manera special aki den stadnan grandi ta warda te ora un hende bin na e mesa of stand di literatura. Ora e persona yega cerca, e pionero ta anim’e pa scoge cualkier publicacion cu e ta haya interesante. Ademas, e pionero ta cla pa uza Bijbel pa contesta cualkier pregunta cu e persona por tin. Si e persona scoge algun literatura, e pionero no ta menciona e areglo di donacion. Pero si e persona mes puntra con nos obra ta ser financia, e ora ey e pionero ta splic’e cu e por manda su donacion na e adres cu tin den e literatura. Si ta posibel, e pionero por puntr’e: “Bo ta desea pa un persona bishita bo na cas?” Of, “Bo tabata sa cu ademas di nos publicacionnan, nos ta ofrece estudio di Bijbel gratis tambe?”
5. Con e manera di predica aki a duna un pareha goso y satisfaccion?
5 E manera nobo aki ta duna goso y satisfaccion. Un pareha casa a skirbi: “Tur dia ora nos ta para na e mesa y ta mira miles di hende cana pasa, nos ta realisa cuanto esfuerso ta ser haci pa alcansa hende rond mundo. Si, e echo cu nos ta mira asina tanto hende y ta compronde cuanto interes Jehova tin den cada un di nan ta fortalece nos determinacion pa mantene e trabou di predica na prome luga den nos bida. Nos ta imagina nos mes cu Jehova ta analisa curason di e personanan cu ta cana pasa e mesa pa wak ken ta esnan digno. Nunca prome nos a sinti cu nos ta traha asina estrecho cu e angelnan.”
6. (a) Cua manera nobo pa predica den area publico hopi congregacion ta organisando, y dicon esaki no ta mescos cu e manera special pa predica den areanan publico den stadnan grandi? (b) Con congregacionnan por coopera cu otro ora di predica den area publico?
6 E Trabou di Predica den Area Publico Cu Cada Congregacion Por Organisa: Fuera di e manera special pa predica den area publico den stadnan grandi, tin un manera nobo mas di predica na luganan publico cu hopi cuerpo di anciano ta organisa pa nan teritorio. E manera nobo aki ta encera cu publicadornan ta uza mesa of stand portatil pa pone literatura na luganan den teritorio di nan congregacion caminda tin hopi hende ta pasa. Esaki no ta mescos cu e manera special pa predica den areanan publico den stadnan grandi caminda rumannan di diferente congregacion ta predica den e mesun areanan druk di e stadnan cu sucursal scoge. (Wak e cuadro “Bon Cooperacion Ta Necesario.”)
7. Si e ancianonan determina cu ta practico pa predica di e manera aki na luganan publico den nan teritorio, con nan lo por organisa esey?
7 E ancianonan lo analisa y determina si den nan teritorio tin luganan caminda hopi hende ta trafica na pia y si ta practico pa predica na e luganan ey. Por ehempel, rumannan lo por pone mesa of standnan portatil di literatura na luganan, manera stacion di bus, parke, caya cu ta druk, centro comercial, campus, aeropuerto of luganan caminda ta tene actividadnan anual. Lo ta bon pa pone e mesa semper na e mesun luga, e mesun dianan y ora. Experencia ta mustra cu ta mihor pa pone un mesa na un centro comercial y no caminda cu tin un negoshi grandi so, ya cu e hendenan cu ta bishita e negoshi ey normalmente ta concentra solamente riba loke nan a bin haci na e negoshi. Riba trottoir caminda hopi hende ta pasa kisas ta mihor pa uza un stand chikito di literatura. Ancianonan lo por download for di nos website algun file special cu ta contene algun idea con pa traha e standnan pa pone e revistanan E Toren di Vigilancia y ¡Despertad! y e buki Bijbel Ta Siña. E filenan aki ta ser uza specialmente pa e manera aki di predica. E publicadornan cu ta participa den e forma di predicacion aki tin cu sigui e mesun metodo di e manera special pa predica den area publico den stadnan grandi. Ademas, nan tin cu sigui e instruccionnan cu nan ta ricibi di e superintendente di sirbishi. Si nan topa un persona cu mustra interes pero cu no ta biba den nan teritorio, mesora nan mester yena e formulario Por Fabor Atendé (S-43-PA) y entreg’e na e secretario.
8. Hasta si den bo congregacion no tin areglo specifico pa predica na luganan publico, con bo por participa toch den e forma di sirbishi aki?
8 Abo Tambe Por Predica na Luganan Publico: Tin congregacion cu no tin ningun luga den nan teritorio caminda hopi hende ta trafica na pia y pesey nan lo no uza mesa of stand di literatura pa predica. Sinembargo, hasta den e congregacionnan ey ta bon pa anima publicadornan pa predica na luganan publico. Por ehempel, tin area di negoshi, centro comercial chikito, pacus of tienda cu sa ta druk den boso teritorio? Tin parke of plasa caminda hende sa reuni? Sa tin actividadnan publico den boso teritorio? Si ta asina, abo tambe por predica den e areanan ey.
9. Dicon nos mester haci esfuerso pa predica na hende na unda cu nan ta?
9 Ta Jehova su boluntad pa “tur sorto di hende ser salba y yega na un conocemento exacto di e berdad.” (1 Tim. 2:4) Ta pesey nos tin cu haci nos maximo esfuerso pa hiba e mensahe di Reino na mas tanto hende posibel prome cu e fin yega. (Mat. 24:14) Den hopi teritorio ta dificil pa haya hende na cas. Kisas ta na luganan publico so nos por haya un chens di papia cu nan. Esey lo por ta e unico oportunidad pa algun di nan scucha e bon noticia. Pesey, laga nos predica na hende na unda cu nan ta y asina cumpli cu nos sirbishi cabalmente.—2 Tim. 4:5.
[Cuadro na pagina 5]
Bon Cooperacion Ta Necesario
Informenan ta indica cu tin publicadornan di diferente congregacion ta predica den e mesun parkeerplaats, parada di bus, den e mesun cayanan y dilanti di e mesun negoshinan. Ademas, publicadornan di diferente congregacion ta laga revista den e mesun lobby, sala di espera of laundry y ta predica den e mesun negoshinan. Aunke e publicadornan no ta predica na e mesun ora, esaki por fada e comerciantenan y e hendenan den e barionan ey. Pesey, ora di predica den area publico, ta mihor pa cada congregacion haci esey den nan mes teritorio.
Si tin publicador cu kier predica den un area publico den teritorio di un otro congregacion, nan mester papia cu nan superintendente di sirbishi. E superintendente di sirbishi, na su turno, lo por tuma contacto cu e superintendente di sirbishi di e otro congregacion pa haya permiso. Caminda tin congregacion di diferente idioma ta predica den e mesun teritorio, e superintendentenan di sirbishi mester comunica cu otro pa evita situacionnan cu por pone e hendenan den e teritorio rabia cu nos innecesariamente. Si tin bon cooperacion, tur cos lo por tuma luga “decentemente y na un manera ordena.”—1 Cor. 14:40.