Experencia

◼ Australia: Tempo John tabata mucha, e tabata bay misa, pero despues, e homber bon siña aki a bira un “fiel ateista.” Un pionero a lag’e cu e foyeto Bida Ta Obra di un Kreador? y na e siguiente bishita el a laga e foyeto El origen de la vida. Pa por a cultiva John su interes, e pionero a sigui trece e ultimo revistanan y tabata resalta cualkier articulo di creacion of profecia di Bijbel. Ora e pionero a sinti cu John tabata cla, el a ofrec’e e buki E Bijbel​—⁠e Palabra di Dios of e palabra di hende? Despues di lesa e buki, John a cuminsa yama su mes un “agnostico manso.” Riba un dia e pionero a mustra John e buki Bijbel Ta Siña. Hunto cu ne el a trata paragraf 8 di pagina 20 y paragraf 13-⁠16 di pagina 23-⁠24. E textonan menciona den e informacion a haci asina un impresion riba John cu el a bisa: “Kisas mi tin cu duna Bijbel un chens mas.”

◼ Mexico: Un meneer a bisa un publicador cu e no ta kere cu Bijbel ta inspira pa Dios. E publicador a bis’e cu lo e kier mustr’e dicon Bijbel si ta inspira di Dios. Loke e meneer a siña for di Bijbel, despues di algun bishita, a cuminsa molestia su consenshi. Ora el a siña tocante e normanan moral di Dios, el a keda hopi impresiona. El a bisa e publicador: “Na prome instante ora ami cu bo tabata lesa Bijbel hunto, e consehonan a parce manera di cualkier otro buki y nan no a haci un impacto riba mi. Pero awor si, specialmente su consehonan encuanto moralidad, ta molestia mi consenshi.”

◼ Merca: Un dia, un pareha cu tabata participa den e actividad special di predica den area publico den stadnan grandi, a topa un señora di Taiwan. E tabata kere den Dios pero a sinti cu Bijbel ta pa hende di paisnan occidental. El a bin na e stand di literatura pasobra aunke e tabata bon para financieramente, el a sinti un bashi. El a pensa cu Bijbel lo por a yud’e haya un proposito den bida. E pareha a cuminsa studia cu ne for di e buki Bijbel Ta Siña hunto cu e foyeto Cómo hallar paz y felicidad duraderas. En bes di studia capitulo 2 di e buki, nan a bay den e foyeto y trata e seccion titula: “Una guía para toda la humanidad.” Despues di analisa e prome seis paragrafnan den e seccion ey, e señora a bisa cu el a keda asombra cu Bijbel ta asina unico compara cu otro bukinan religioso. Despues di considera profecianan di Bijbel cu a cumpli, el a bisa: “Mi no ta kere cu tin niun otro buki cu ta asina exacto.”

◼ Japon: Aunke un doño di cas a bisa un publicador cu e no ta kere den Dios, e publicador a sigui hacie algun bishita cortico y mustr’e e articulonan den ¡Despertad! titula “¿Casualidad o diseño?” Pocopoco, e homber su punto di bista a cambia, y el a cuminsa admiti cu kisas tin un Creador. Awor e ta kere cu tin un Dios, y e publicador ta studia cu ne for di e foyeto Dios Tin Bon Noticia pa Nos!

◼ Canada: Un ruman muher a laga nos ultimo revistanan cu un señora cu net tabata sali for di cas y cana bay su auto. Ora e ruman muher a bishit’e bek, e señora a bis’e directamente cu e no ta interesa y cu e no ta kere den Dios. E ruman muher a dicidi di no entrega pero a hiba e foyeto Cómo lograr una vida llena de satisfacción p’e. Ora e ruman muher a topa e señora na cas, el a bis’e cu aunke e tabata sa cu e señora no ta kere den Dios, el a keda pensa riba dje pasobra e ruman tabata sa cu e ta un mama soltero. El a bay den e foyeto na paragraf 6 di pagina 4, cu ta splica unda hende por haya bon conseho. Anto el a anima e señora pa lesa e sugerencianan den les 2 encuanto con pa lanta yiu. Cu mucho gusto e señora a tuma e foyeto.