Kico Bo Tin Mester pa Compronde Bijbel?
E contesta cu Bijbel ta duna
Bijbel mes ta splica kico bo tin cu haci pa bo compronde su mensahe. Loke Dios ta bisa den su Palabra “no ta mucho dificil pa bo, ni e no ta fuera di [bo] alcance.”—Deuteronomio 30:11, Beibel Santu.
Loke por yuda bo compronde Bijbel
Un actitud corecto. Bo mester acepta Bijbel como e Palabra di Dios. Sea humilde, pasobra Dios no ta gusta hende orguyoso. (1 Tesalonicensenan 2:13; Santiago 4:6) Sinembargo, no kere tur loke bo ta lesa of tende; Dios kier pa bo uza bo “capacidad di pensa.”—Romanonan 12:1, 2.
Pidi Dios duna bo sabiduria. Bijbel ta bisa na Proverbionan 3:5: “No depende riba bo mes comprondemento.” (Beibel Santu) En bes di esey “sigui pidi Dios” pa sabiduria pa compronde Bijbel.—Santiago 1:5.
Studia regularmente. Lo bo saca mucho mas beneficio si bo ta studia Bijbel riba un base regular y no de bes en cuando.—Josue 1:8.
Studi’e a base di topico. Un estudio a base di topico, den cua bo ta analisa loke Bijbel ta bisa tocante un cierto tema, ta un metodo eficaz pa compronde loke Bijbel ta siña. Cuminsa “siña e cosnan fundamental” pa despues sigui cu siñansa mas avansa. (Hebreonan 6:1, 2) Lo bo ripara cu ora bo compara un texto cu otro, varios parti di Bijbel ta splica su mes y hasta clarifica loke “ta dificil pa compronde.”—2 Pedro 3:16.
Busca yudansa di otro hende. Bijbel ta anima nos pa busca yudansa di otro hende cu ta compronde Bijbel mihor. (Echonan 8:30, 31) Testigonan di Jehova ta ofrece un curso di Bijbel gratis. Mescos cu e cristiannan den e prome siglo, testigonan di Jehova ta analisa varios texto di Bijbel pa yuda hende compronde loke Bijbel ta siña realmente.—Echonan 17:2, 3.
Loke bo no tin mester
Siñansa avansa of hopi inteligencia. E 12 apostelnan di Hesus a compronde e Scritura y a siña otro hende, maske algun hende tabata pensa cu nan “no tabatin mucho educacion.”—Echonan 4:13.
Placa. Bo por haya sa kico Bijbel ta siña sin cu e ta costa bo nada. Hesus a bisa su discipelnan: “Boso a ricibi pornada, duna pornada.”—Mateo 10:8.