Pakico Testigonan di Jehova No Ta Participa den Guera?

Testigonan di Jehova no ta participa den guera pa e siguiente motibonan:

1. Nos ta obedece Dios. Bijbel ta bisa cu e sirbidornan di Dios “lo bati nan spadanan traha ploeg cu nan” y “nunca mas nan lo train pa guera.”—Isaias 2:4.

2. Nos ta obedece Hesus. Hesus a bisa apostel Pedro: “Hinca bo spada bek na su luga, pasobra ken cu uza spada lo muri pa medio di spada.” (Mateo 26:52) Asina Hesus a mustra cu su sirbidornan no mester uza arma.

   Hesus su discipelnan ta obedece su mandamento pa “no ta parti di mundo” door di keda estrictamente neutral den asuntonan politico. (Juan 17:16) Nan no ta protesta contra gobierno ora nan dicidi di tuma accion militar y nan no ta contra esnan cu ta scoge pa drenta servicio militar.

3. Nos tin amor pa prohimo. Hesus a manda su discipelnan pa “stima otro.” (Juan 13:34, 35) Como resultado nan lo bira un hermandad internacional den cua ningun miembro hamas lo bay guera y bringa contra su ruman.—1 Juan 3:10-12.

4. E cristiannan di prome siglo no a bay guera. E Encyclopedia of Religion and War ta bisa: “E prome siguidornan di Hesus a nenga di bay guera y drenta servicio militar”, pasobra nan a compronde cu esey “no ta cuadra cu e mandato di Hesus pa stima bo prohimo y bo enemigonan.” Asina tambe, Peter Meinhold, un teologo Aleman, a bisa tocante e prome discipelnan di Hesus: “Nan a considera cu bo no por ta un cristian y alabes un soldaat.”

Nos ta contribui na e bienestar di e comunidad

Testigonan di Jehova ta miembronan util den comunidad y no ta forma un peliger pa e siguridad di e pais unda nan ta biba. Nos ta respeta autoridadnan gubernamental di acuerdo cu e siguiente mandatonan biblico aki:

• “Ta sumiso na autoridadnan superior.”—Romanonan 13:1.

• “Duna Cesar loke ta di Cesar, ma Dios loke ta di Dios.”—Mateo 22:21.

Pesey, nos ta obedece ley, paga belasting y coopera cu medidanan cu gobierno tuma pa percura p’e bienestar di pueblo.