Nos Mester Pertenece na un Religion Organisa?

E contesta cu Bijbel ta duna

Si, pasobra Dios kier pa hende bin hunto pa ador’e. Bijbel ta bisa: “Laga nos presta atencion na otro pa nos por stimula otro pa mustra amor y haci bon obra, y no keda sin bay e reunionnan.”—Hebreonan 10:24, 25.

Hesus a indica cu su siguidornan lo ta parti di un grupo organisa ora el a bisa nan: “Na esaki tur hende lo sa cu boso ta mi discipelnan, esta, si boso ta stima otro.” (Juan 13:35) Un di e maneranan principal cu e siguidornan di Cristo por mustra e amor ey, ta ora nan ta asocia cu otro. Pa haci esey, nan ta organisa den congregacionnan cu regularmente ta reuni hunto pa adora Dios. (1 Corintionan 16:19) Hunto nan ta forma parti di un hermandad mundial.​—1 Pedro 2:17.

Djis ta parti di un religion no ta suficiente

Bijbel ta mustra cu hende mester bin hunto pa adora Dios. Sinembargo, niun caminda Bijbel no ta siña cu un hende por agrada Dios djis pasobra e ta pertenece na un religion. Pa un hende tin e aprobacion di Dios, su religion mester tin un influencia den su bida di tur dia. Por ehempel, Bijbel ta bisa: “E forma di adoracion cu ta limpi y sin mancha for di e punto di bista di nos Dios y Tata ta esaki: cuida huerfano y viuda cu ta pasa den tribulacion y mantene bo mes sin mancha di mundo.”—Santiago 1:27.