Con Mi Por Haya Sa Cua Ta e Religion Berdadero?
E contesta cu Bijbel ta duna
Pa haya sa ken tin e religion berdadero, Bijbel ta uza e siguiente ilustracion: “Na nan fruta boso lo reconoce nan. Acaso hende sa piki druif for di mata di sumpiña of figo for di mal yerba?” (Mateo 7:16) Ta facil pa bo mira e diferencia entre un mata di wendruif y un mata di sumpiña. Asina tambe bo por distingui religion berdadero for di religion falso si bo wak e siguiente fruta- of caracteristicanan.
E religion berdadero ta siña e berdad basa riba Bijbel, no idea di hende. (Juan 4:24; 17:17) Esaki ta inclui e berdad tocante alma y e speransa di biba pa semper den paradijs riba Tera. (Salmo 37:29; Isaias 35:5, 6; Ezekiel 18:4) Ademas, e religion berdadero no ta keda sin saca na cla kico ta religion falso.—Mateo 15:9; 23:27, 28.
E religion berdadero ta yuda hende conoce Dios y ta siña nan su nomber, Jehova. (Salmo 83:18; Isaias 42:8; Juan 17:3, 6) E no ta siña cu Dios ta un persona leu of misterioso, mas bien e ta siña cu Dios kier pa nos tin un amistad cu ne.—Santiago 4:8.
E religion berdadero ta mustra cu salbacion ta posibel solamente pa medio di Hesucristo. (Echonan 4:10, 12) Su miembronan ta obedece e mandamentonan di Hesus y ta haci esfuerso pa sigui Hesus su ehempel.—Juan 13:15; 15:14.
E religion berdadero ta focus riba e Reino di Dios como e unico speransa pa humanidad. Su miembronan ta conta otro hende tocante e Reino.—Mateo 10:7; 24:14.
E religion berdadero ta demostra amor sincero. (Juan 13:35) E ta siña hende pa respeta tur rasa, cultura, idioma y background. (Echonan 10:34, 35) Como cu su miembronan stima tur hende, nan no ta bay guera.—Mikeas 4:3; 1 Juan 3:11, 12.
E religion berdadero su cleronan no ta haya un salario, y no ta duna titulonan impresionante na niun di su miembronan.—Mateo 23:8-12; 1 Pedro 5:2, 3.
E religion berdadero ta keda neutral y no ta mete den asunto politico. (Juan 17:16; 18:36) No obstante, miembronan di e religion berdadero ta respeta y obedece gobierno, y ta sigui e mandamento biblico: “Duna Cesar loke ta di Cesar, ma Dios loke ta di Dios.”—Marco 12:17; Romanonan 13:1, 2.
E religion berdadero ta un manera di biba, no ta djis un ritual of formalidad. Su miembronan ta sigui e normanan halto di Bijbel den tur aspecto di nan bida. (Efesionan 5:3-5; 1 Juan 3:18) Toch nan no ta mir’e como un carga, mas bien nan ta contento di por sirbi “e Dios feliz.”—1 Timoteo 1:11.
Esnan cu ta practica e religion berdadero no ta hopi. (Mateo 7:13, 14) Hopi bes hende ta menosprecia, haci bofon y persigui nan pa motibo cu nan ta haci e boluntad di Dios.—Mateo 5:10-12.
No djis pasobra e ta haci bo sinti bon e ta e religion berdadero
Ta peligroso pa scoge un religion djis pasobra e ta haci bo sinti bon. Bijbel a profetisa cu hende “lo rondona nan mes cu maestronan [religioso] cu ta conta nan loke nan tin gana di tende.” (2 Timoteo 4:3) Di otro banda, Bijbel ta anima nos pa sigui e religion “cu ta limpi y sin mancha for di e punto di bista di nos Dios y Tata”, hasta si e religion ey ta mal mira.—Santiago 1:27; Juan 15:18, 19.