LES 10

Con Bo Por Sa Cua Ta e Religion Berdadero?

1. Ta un religion berdadero so tin?

Hesus siñando otronan — ‘Tene cuidou cu profeta falso.’—MATEO 7:15.

Hesus a siña su siguidornan con nan tin cu adora Dios; e forma di adora Dios ey ta e religion berdadero. E ta manera un caminda cu ta hiba na bida eterno. Hesus a bisa: “Poco ta esnan cu ta hay’e.” (Mateo 7:14) Dios ta acepta solamente adoracion basa riba e berdad cu nos por haya den su Palabra. Hende cu ta adora Dios asina ta uni den un solo fe.—Lesa Juan 4:23, 24; 14:6; Efesionan 4:4, 5.

2. Kico Hesus a bisa di hende cu ta pretende di ta cristian?

Un lider religioso papiando den iglesia. Despues e ta bendiciona e soldaatnan pa guera. — “Nan ta declara publicamente cu nan conoce Dios ma ta neng’e cu nan obranan.”—TITO 1:16.

Hesus a spierta cu lo bin profeta falso cu lo purba corumpi siñansa cristian. Nan ta duna e impresion di ta adora Dios, y nan iglesianan ta pretende di ta cristian. Pero bo por ripara cu nan no ta cristian. Dicon? Pasobra ta e religion berdadero so ta produci cristian cu ta manifesta bon cualidad y obra cu ta cuadra cu e caminda cristian.—Lesa Mateo 7:13-23.

3. Con bo por sa ken ta adora Dios na e manera corecto?

Laga nos wak cinco aspecto cu ta yuda bo identifica nan:

Hende cu di berdad ta adora Dios tin respet pa su Palabra. Nan ta haci esfuerso pa biba segun principionan di Bijbel. Pues, e religion berdadero ta distinto for di religion cu ta basa riba idea di hende. (Mateo 15:7-9) Hende cu di berdad ta adora Dios no ta predica un cos y haci otro.—Lesa Juan 17:17; 2 Timoteo 3:16, 17.
Hesus su berdadero siguidornan ta honra e nomber di Dios, esta, Jehova. Hesus a duna hende di conoce e nomber di su Tata y di e manera ey el a honra e nomber di Dios. El a yuda hende conoce Dios y a siña nan pidi pa e nomber di Dios ser santifica. (Mateo 6:9) Caminda bo ta biba, cua religion ta haci Dios su nomber conoci?—Lesa Juan 17:26; Romanonan 10:13, 14.
Cristiannan berdadero ta predica tocante e Reino di Dios. Dios a manda Hesus pa predica e bon noticia di e Reino. E Reino di Dios ta e unico speransa pa humanidad. Hesus a papia di dje te na su morto. (Lucas 4:43; 8:1; 23:42, 43) El a bisa cu su siguidornan lo a predica tocante e Reino aki. Si un hende acerca bo pa papia cu bo tocante e Reino di Dios, na cua religion bo ta kere cu e ta pertenece?—Lesa Mateo 24:14.
Hesus su siguidornan no ta parti di e mundo malbado aki. Bo por reconoce nan pasobra nan no ta envolve nan mes den politica ni den manifestacionnan di protesta. (Juan 17:16; 18:36) Tampoco nan no ta imita e custumber- y actitudnan perhudicial di mundo.—Lesa Santiago 4:4.
Cristiannan berdadero ta demostra un amor excepcional pa otro. E Palabra di Dios ta siña nan respeta hende di tur rasa y nacionalidad. Aunke religion falso hopi bes a apoya guera di e nacionnan abiertamente, cristiannan berdadero ta nenga di haci esey. (Mikeas 4:1-3) Mas bien, cu buena gana nan ta uza nan tempo y recursonan pa yuda y anima otro hende.—Lesa Juan 13:34, 35; 1 Juan 4:20.

4. Bo por sa cua ta e religion berdadero?

Cua religion ta basa tur su siñansanan riba e Palabra di Dios, ta honra e nomber di Dios y ta proclama e Reino di Dios como e unico speransa pa humanidad? Cua grupo religioso ta mustra amor pa otro y no ta apoya guera? Kico abo ta pensa?—Lesa 1 Juan 3:10-12.

Pa mas informacion, wak capitulo 15 di e buki Kico Bijbel Ta Siña Realmente?