Exodo 20:12—“Honra Bo Tata y Bo Mama”

Honra boso tata cu boso mama, pa asina boso por biba largo riba e tera cu Jehova,a boso Dios, ta bay duna boso.—Exodo 20:12, Traduccion di Mundo Nobo.

“Honra bo tata y bo mama, pa bo dianan wordo prolonga den e tera cu SEÑOR bo Dios ta duna bo.”—Exodo 20:12, Beibel Santu.

Splicacion di Exodo 20:12

Dios a manda e Israelitanan di antiguedad honra nan mayornan. Y el a agrega un promesa na e mandamento aki, esta, cu nan lo por biba largo. Esey a duna e Israelitanan mas motibo pa obedece e mandamento ey. Aunke e Ley di Moises, esta, e leynan cu Dios a duna e Israelitanan, no ta conta pa cristian, Dios su normanan no a cambia. E berdadnan basico riba cua e leynan ey ta basa te awe ta valido ainda, y pesey nan ta importante pa hende cristian.—Colosensenan 3:20.

Yiunan—sin importa nan edad—ta honra nan mayornan ora nan ta respeta nan y obedece nan. (Levitico 19:3; Proverbionan 1:8) Despues, hasta ora e yiunan bira adulto y tin nan mes famia, nan ta sigui stima nan mayornan y yuda nan. Por ehempel, nan ta haci sigur cu nan mayornan ta sigui haya bon cuido ora nan edad subi, y hasta ta yuda nan financieramente si ta necesario.—Mateo 15:4-6; 1 Timoteo 5:4, 8.

Tuma nota cu yiu Israelita mester a honra nan tata y tambe nan mama; asina nan a reconoce e papel importante cu mama tin den famia. (Proverbionan 6:20; 19:26) Awe tambe, yiu mester haci mescos.

Pero e mandamento pa honra bo mayornan tabatin cierto excepcion. Yiu Israelita no mester a obedece nan mayornan—ni niun otro hende—si esey a nifica desobedece Dios. (Deuteronomio 13:6-8) Awe tambe, cristiannan “tin cu obedece Dios na prome luga, y no hende.”—Echonan 5:29.

Den e leynan cu Dios a duna Israel, el a priminti cu yiu cu honra nan mayornan lo tin bida largo y cu lo bay bon cu nan den e tera cu Dios a duna nan. (Deuteronomio 5:16) Di e manera ey, nan lo a evita di haya mesun castigo cu yiu adulto cu a desobedece Dios su ley y a rebeldia contra nan mayornan. (Deuteronomio 21:18-21) Tempo a pasa, pero e principionan tras di e leynan ey no a cambia. (Efesionan 6:1-3) Sin importa ki edad nos tin, nos mester duna cuenta y rason na nos Creador. Y Dios lo cumpli cu su promesa: Yiu cu ta obedece Dios y nan mayornan lo tin bida largo. Es mas, nan tin e speransa di biba pa semper.—1 Timoteo 4:8; 6:18, 19.

Contexto di Exodo 20:12

E mandamento na Exodo 20:12 ta ocupa un luga clave riba e lista di Dies Mandamento. Con asina? (Exodo 20:1-17) E mandamentonan prome cu ne ta papia di e obligacionnan cu e Israelitanan tabatin cu Dios, por ehempel, cu nan mester a adora Dios so. E mandamentonan despues di dje ta papia di e obligacionnan cu e Israelitanan tabatin cu otro hende, por ehempel, cu nan mester tabata fiel na nan casa y no horta. Pesey, tin hende ta mira e mandamento pa “honra bo tata y bo mama” manera un brug, pasobra ora nos obedece e mandamento ey, nos ta cumpli cu nos obligacion cu Dios y nos obligacion cu otro hende.