Wega di Placa un Fasinacion Rond Mundo

JOHN, kende a lanta na Escocia, tawatin speransa di gana premio mayo. “Mi tawata cumpra biyechi tur siman”, e ta bisa. “E tawata costa mi masha tiki placa, pero e tawata duna mi e speransa di haya tur loke mi a yega di desea.”

Kazushige, kende ta biba na Hapon, tawata gusta careda di cabai. “Mi tawata pasa masha dushi mes ora mi tawata hunto cu mi amigonan ta bet riba cabai na e pista di cabai, y tin bes mi tawata gana sumanan grandi di placa”, e ta corda.

Linda, kende ta biba na Australia, ta bisa: “Bingo tawata mi wega faborito. E bicio aki tawata costa mi 54 florin pa siman, pero mi tawata gusta e sensacion cu bo ta sinti ora bo gana.”

John, Kazushige y Linda tawata considera wega di placa como un dibirticion relativamente inofensivo. Cientos di miyones di hende rond mundo tin e mesun punto di bista. Un encuesta Gallup di 1999 a indica cu dos tercera parti di Mericano no ta considera wega di placa como algo malo. Na 1998, Mericanonan cu ta hunga placa a gasta mas o menos 90 mil miyon florin na wega di placa legal. Esaki ta mas placa cu loke nan ta gasta hunto na carchi pa pelicula, musica graba, deporte, parkenan di dibirticion y weganan di video.

Segun un investigacion resien, durante un periodo di un aña, mas cu 80 porshento di e poblacion Australiano a yega di hunga placa por lo menos un biaha, y 40 porshento ta hunga placa tur siman. Adultonan na e pais ei ta gasta un promedio di mas cu 720 florin pa aña na wega di placa. Esei ta mas o menos dos bes e cantidad di placa cu Europeonan y Mericanonan ta gasta na wega di placa. Pues, e Australianonan ta entre e hungadonan di placa mas apasiona na mundo.

Hopi Hapones ta adicto na pachinko, un wega di mashin manera pinball, y nan ta gamble miles di miyones tur aña den e wega. Na Brasil nan ta gasta 7,2 mil miyon florin pa aña na wega di placa, y un gran cantidad di e placa ei ta bai na biyechi. Pero Brasileñonan no ta e uniconan cu ta gusta biyechi. E revista Public Gaming International resientemente a calcula cu tin “306 loteria den 102 pais.” Wega di placa en berdad ta un atraccion rond mundo, y segun algun hende e ta un atraccion cu ta trece hopi beneficio.

Sharon Sharp, un representante di Instituto Publico Cu Ta Investiga Wega di Placa, ta bisa cu di 1964 te 1999, loteria na Merca a produci “225 mil miyon florin di e presupuesto di gobierno. Gran parti di e entrada aki a cuminsa drenta desde 1993.” Nan a designa hopi di e placa aki pa programanan educacional pa publico, parkenan di estado y e desaroyo di facilidadnan publico pa deporte. Tambe e negoshi di wega di placa ta un fuente principal di cupo di trabou, y na Australia so, e ta genera trabou pa mas o menos 100.000 hende den mas cu 7.000 negoshi.

Pesei esnan cu ta na fabor di wega di placa ta argumenta cu ademas di cu e ta un dibirticion, wega di placa legal ta crea empleo, entrada di belasting y ta mehora economia local cu a bai atras.

Pa e motibo ei hopi hende lo por puntra: ‘Kico tin di malo den wega di placa?’ E siguiente articulo lo contesta e pregunta aki. Probablemente lo e por cambia bo punto di bista tocante wega di placa.

[Plachi na pagina 3]

John

[Plachi na pagina 3]

Kazushige

[Plachi na pagina 3]

Linda