Kico Tin di Malo den Wega di Placa?

“Un 290.000 Australiano ta adicto na wega di placa y nan ta responsabel pa un perdida anual di mas cu 5,4 mil miyon florin. Esaki ta un cos desastroso no solamente pa esnan bicia na wega di placa sino tambe pa e 1,5 miyon hende cu segun calculo ta directamente afecta como resultado di baimento failliet, diborcio, suicidio y tempo perdi na trabou.”—J. Howard, prome minister di Australia, 1999.

JOHN, menciona den e articulo anterior, a bira adicto na wega di placa.a El a muda bai Australia caminda el a casa cu Linda, kende tambe ta hunga placa. John a bira mas adicto. E ta bisa: “Prome mi tawata cumpra biyechi, anto despues mi a cuminsa hunga placa riba careda di cabai y hunga placa den casino. Finalmente mi tawata hunga placa casi tur dia. Tin bes mi tawata hunga y perde henter mi salario sin sobra nada pa paga hipotek ni cumpra cuminda pa mi famia. Asta ora mi a gana hopi placa, mi tawata sigui hunga. Ta e sensacion cu mi tawata sinti ora mi gana a haci mi adicto.”

Tin hopi hende cu ta bicia manera John. Ta parce cu tin sosiedadnan completo cu a wordo contagia cu e entusiasmo intenso aki pa hunga wega di placa. E revista USA Today a bisa cu entre 1976 y 1997, tawatin un aumento asombroso di 3.200 porshento den e cantidad di placa cu hende a gasta na wega di placa legal na Merca.

“Antes hende tawata considera wega di placa como un cos socialmente y moralmente malo. Awendia e ta un dibirticion normal den sosiedad”, e corant The Globe and Mail ta bisa. Señalando na un di e motibonan pakico publico a cambia di actitud, e corant ta bisa: “E echo cu hende a cambia nan actitud pa cu wega di placa ta e resultado directo di loke kisas ta e campaña di propaganda mas caro y mas largo cu gobierno a yega di financia den historia di Canada.” Ki impacto esfuersonan pa promove wega di placa tawatin riba algun sosiedad?

Un Epidemia di Adiccion na Wega di Placa

E Departamento di Adiccion na e Facultad di Medicina di Harvard a calcula cu na 1996 tawatin “7,5 miyon Mericano adulto adicto na wega di placa of cu ta hungado descontrola.” Anto tambe tawatin “7,9 miyon Mericano adolecente cu ta bicia na wega di placa of cu ta hungado descontrola.” E cifranan aki a wordo inclui den e raport compila door di e Comision Nacional Cu Ta Studia Impacto di Wega di Placa (NGISC), cu a ser presenta na Congreso Mericano. Segun e raport, kisas e cantidad di hende adicto na wega di placa na Merca en realidad ta hopi mas halto cu e cifranan aki ta indica.

Pa motibo di perdemento di trabou, salu cu ta bai atras, onderstand, y e cantidad di placa cu mester gasta na programanan di tratamento pa adiccion, nan ta calcula cu adiccion na wega di placa ta costa sosiedad Mericano miles di miyones di dollar tur aña. Pero e suma aki no ta indica e prijs cu hende ta paga pa motibo di e bicio di wega di placa, esta, e sacrificio y sufrimento cu famia-, amigo- y coleganan di trabou ta pasa aden pa motibo di ladronicia, fraude, suicidio, violencia na cas y maltrato di mucha. Un estudio Australiano a descubri cu cada adicto na wega di placa por afecta mas cu dies hende directamente. Un raport di e Conseho Nacional di Investigacion na Merca ta bisa cu mas cu “50 porshento di e casanan y 10 porshento di yiu ta experencia maltrato fisico di un hungado di placa descontrola.”

Un Adiccion Contagioso

Mescos cu algun malesa, e bicio di wega di placa ta parce di pasa over di mayor pa yiu. “Yiunan di esnan cu ta adicto na wega di placa tin mas chens di cuminsa participa den conducta delincuente manera huma, bebe y uza droga, y nan ta core riesgo mas grandi di bira adicto na wega di placa of un hungado descontrola”, e raport di NGISC ta bisa. Tambe e raport ta duna spiertamento cu “adolecentenan cu ta hunga wega di placa tin mas chens cu adulto di bira adicto na wega di placa of un hungado descontrola.”

Dr. Howard J. Shaffer, director di e Departamento di Adiccion na e Facultad di Medicina di Harvard, ta bisa: “Cada bes tin mas evidencia cu hobennan ta hunga mes tanto of kisas asta mas tanto wega di placa ilegal cu legal.” Anto relaciona cu e posibilidad cu hungado descontrola di wega di placa tin di haci mal uzo di e tecnologia di Internet, e ta bisa: “Mescos cu humamento di cocaina purifica a cambia loke hende ta experencia ora nan uza cocaina, asina mi ta pensa cu electronica ta bai cambia e manera cu hende ta experencia wega di placa.”

Hopi bes nan ta presenta e negoshi di wega di placa como dibirticion inofensivo. Pero adolecentenan por bira mes adicto na wega di placa cu na droga y esaki por hiba na mal conducta. Un encuesta cu nan a tene na Reino Uni a revela cu di e adolecentenan cu ta hunga placa, “46 porshento a horta nan famia” pa nan por sigui cu nan bicio.

Apesar di e echonan ya menciona, un asociacion di wega di placa cu tin hopi influencia ta hustifica e echo cu nan ta promove wega di placa bisando: “E gran mayoria di Mericano cu ta gusta hunga wega di placa no ta haya ningun problema at all.” Asta si bo ta sinti cu wega di placa no ta afecta bo financieramente ni fisicamente, ki impacto wega di placa tin riba bo salu spiritual? Tin bon motibo pakico bo no mester hunga wega di placa? E siguiente articulo lo contesta e preguntanan aki.

[Nota]

[Cuadro/Plachinan na pagina 4, 5]

Mi Ta Adicto na Wega di Placa?

Segun e Asociacion Mericano di Psikiatra, e siguiente criterionan na pagina 5 por yuda diagnostica adiccion descontrola na wega di placa. Mayoria di autoridad ta di acuerdo cu si bo ta manifesta algun di e caracteristicanan menciona riba e siguiente pagina, bo ta un adicto na wega di placa, y asta si ta un di nan so, bo ta core riesgo di bira un adicto na wega di placa.

Precupacion Bo ta precupa cu wega di placa, es decir bo kier bolbe pasa den experencianan cu bo tawatin cu wega di placa, bo ta plania con lo bo hunga e siguiente wega, of bo ta pensa riba maneranan pa haya placa pa bo gamble cu ne.

Tolerancia Bo ta sinti cu bo mester aumenta e suma di placa cu bo ta gamble pa bo por logra e emocion desea.

Sintoma di abstinencia Bo ta haya mal beis of ta bira irita ora bo ta purba baha man of stop di hunga placa.

Como medio di escape Bo ta gamble pa bo hui for di problema of haya alivio ora bo ta sinti bo sin salida, culpabel, ansha of deprimi.

Core tras di perdida Despues di caba di perde placa, bo ta bin bek un otro dia pa purba haya bek loke bo a perde. E comportacion aki ta loke nan ta yama coremento tras di perdida.

Gañamento Bo ta gaña bo famia, terapeuta of otro hende pa nan no haya sa con profundo bo a bai den wega di placa.

Perdemento di dominio Bo a purba varios bes pa stop, controla of baha man na hungamento di placa, pero sin resultado.

Actonan ilegal Bo a comete actonan ilegal, manera fraude of ladronicia pa bo por sigui hunga placa.

Bo a pone relacionnan importante na peliger Bo a sea pone na peliger of perde un relacion importante, un oportunidad pa educacion of carera, of trabou pa motibo di wega di placa.

Otro hende a saca bo fo’i preta Bo a depende riba otro hende pa duna bo placa pa alivia un situacion financiero desesperante causa pa wega di placa.

[Reconocemento]

Fuente: National Opinion Research Center na Universidad di Chicago, Gemini Research, y The Lewin Group.

[Cuadro/Plachi na pagina 7]

E Berdadero Mensahe di Propaganda di Loteria

Den un raport presenta na e Comision Nacional Cu Ta Studia Impacto di Wega di Placa, investigadonan na e Universidad di Duke, Merca, ta bisa: “Kisas hende ta considera . . . propaganda pa loteria como educacion den balornan moral. Nan ta siña hende cu hunga wega di placa ta un actividad cu no ta haci daño y cu e ta asta bon.” Ki efecto propaganda di loteria realmente tin riba comunidad? E raport ta bisa: “Probablemente no ta un exageracion pa bisa cu e mensahe di propaganda di loteria ta engañoso ya cu nan ta siña cu exito ta depende di scohe e number corecto. E tipo di strategia astuto aki cu agencianan di loteria ta uza por causa un efecto indesea door cu e ta baha crecemento di economia, cu a lo largo ta baha entrada di gobierno. Pa ta mas spesifico, si propaganda di loteria kita hende su gana di traha, spar, y inverti placa den nan mes educacion y entrenamento, cu tempo esaki lo pone cu crecemento y productividad lo baha. En todo caso, generalmente nos lo no siña nos yiunan di ningun manera cu spera riba un milager ta e manera pa logra exito.”

[Cuadro/Plachi na pagina 8]

Tur Cas Tin un Casino

Awendia en bes di construi establecimentonan nobo di wega di placa, organisacionnan di wega di placa ta crea Web site, loke ta costa masha poco placa na comparacion. E Web sitenan aki por comberti cualkier cas cu ta conecta riba Internet practicamente den un casino. Meimei di añanan ’90 di siglo 20 tawatin aproximadamente 25 site di wega di placa riba Internet. Na 2001 tawatin mas cu 1.200 site, y e entrada di wega di placa riba Internet ta bira dobel cada aña. Na 1997, sitenan di wega di placa a genera 540 miyon florin. Na 1998 nan a genera 1.170 miyon florin mas. Na aña 2000, sitenan di wega di placa riba Internet a gana mas o menos 4 mil miyon florin, y pa 2003 nan ta “spera cu e cifra lo aumenta te na 11,5 mil miyon florin”, corant Reuters ta informa.

[Plachi na pagina 6]

E prijs pa adiccion na wega di placa ta encera cu famianan no tin placa pa cuminda

[Plachi na pagina 7]

E cantidad di hoben cu ta hunga placa ta aumenta di un manera alarmante

[Plachi na pagina 8]

Yiunan di esnan bicia na wega di placa ta core riesgo mas grandi di bira adicto na wega di placa