Evita e Trampa di Wega di Placa

“Wega di placa no a afecta mi salu fisico, y semper mi a controla e cantidad di placa cu mi tawata gasta na wega di placa. Pero mi ta admiti cu ki ora cu mi tawata cumpra loteria, semper mi tawata scohe loke mi a considera mi numbernan di suerte.”—Linda.

HOPI persona cu ta hunga wega di placa ta cuminsa kere den number di suerte of amulet di suerte. Kisas nan no ta kere cu nan ta tuma nan supersticionnan na serio, pero toch nan ta sigui bai nan tras.

Algun hende cu ta hunga wega di placa ta asta haci oracion na Dios, y pidie pa e yuda nan gana. Pero Bijbel ta mustra cu Dios ta condena esnan cu ta bisa cu nan ta ador’e ma ta “pone mesa pa [e dios] Fortuna.” (Isaias 65:11) Si, Dios ta odia practicanan cu ta promove creencia supersticioso den suerte. Wega di placa di mes ta anima hende pa confia ciegamente den doña Fortuna.

Tambe wega di placa ta promove amor pa placa abiertamente. Den e sosiedad di awendia cu cada bes ta menos interesa den cosnan spiritual, placa a bira un dios substituto, y wega di placa un forma popular di ador’e. E catedralnan nobo ta e casinonan impresionante, y e credo nobo ta cu golosidad ta bon. Investigadonan a descubri cu e gran mayoria di hende cu ta bai casino ta bisa cu nan ta bai, no pa entretene nan mes of pa motibo di e ambiente, sino pa gana “hopi hopi placa.” Pero Bijbel ta spierta: “Amor pa placa ta raiz di tur sorto di maldad, y algun hende, door di desea esaki, a desvia for di e fe, y a traspasa nan mes cu hopi dolo.”—1 Timoteo 6:10.

Na 1 Corintionan 6:9 y 10 Bijbel ta bisa bon cla: “No laga nan gaña boso; ni . . . adorado di dios falso . . . ni esnan golos pa placa . . . lo no hereda e reino di Dios.” Golosidad no ta djis un malesa social cu ta debilita; e ta un malesa spiritual cu por tin consecuencia fatal. Pero tin cura pa e malesa aki.

Nan A Haya Forsa pa Cambia

Kazushige, cu a wordo menciona den e prome articulo, ta corda: “Hopi bes mi a purba stop di hunga wega di placa. Mi a realisa cu e gamblemento cu mi amigonan na pista di cabai tawata cabando cu mi bida di famia. Semper mi tawata perde tur e placa cu mi a gana. Asta mi a perde e placa cu mi casa a spar pa e nacemento di nos di dos yiu, y finalmente mi a cuminsa uza e placa di e compania cu mi tawata traha p’e. Esei a pone cu mi a perde respet pa mi mes. Hopi bes mi esposa tawata yora y roga mi pa mi stop di hunga wega di placa, pero hewon mi no por a stop.”

Despues Kazushige a cuminsa studia Bijbel cu Testigonan di Yehova. E ta bisa: “Mas mi a lesa Bijbel, mas confiansa mi a haya cu ta existi un Dios y cu lo mi beneficia si mi scuch’e. Mi a yega na e decision cu lo mi stop di hunga wega di placa cu e yudansa cu Dios ta duna. Pa mi sorpresa, no solamente mi a stop di hunga wega di placa sino tambe mi a cuminsa odi’e. Awor ora mi pensa bek riba e angustia cu mi bicio di wega di placa a causa mi famia, mi curason ta haci dolo. Mi ta sumamente gradicido na Yehova Dios cu El a yuda mi kita for di mi adiccion na wega di placa y cu el a yuda mi haya proposito den bida!”—Hebreonan 4:12.

Asina tambe, John (menciona tambe den e prome articulo) a cuminsa studia Bijbel. E ta corda: “Mi studio di Bijbel a yuda mi reevalua mi sircunstancianan. Pa prome bes, mi por a mira e daño cu mi bicio na wega di placa tawata causa tanto na ami mes como na mi famia. Mi a bin compronde cu wega di placa ta promove un actitud egoista y di golosidad den hende, cualidadnan cu Yehova ta odia. Segun cu mi a sigui studia, mi amor pa Yehova a duna mi e forsa necesario pa libra di e bicio di wega di placa. Mi a cuminsa hunga wega di placa door cu mi tawata soña cu un miho bida. Awor cu mi a stop di hunga wega di placa y mi ta felis sirbiendo Yehova, e soño ei a bira realidad.”

John su esposa, Linda, tambe a dicidi di stop di hunga wega di placa. “No tawata facil”, e ta bisa. “Pero despues cu ami cu mi casa a cuminsa studia Bijbel cu Testigonan di Yehova, mi a siña enfoca riba e cosnan mas importante den bida. Mi a siña no solamente pa stima e cosnan cu Dios ta stima sino tambe odia e cosnan cu E ta odia, entre otro, tur forma di golosidad. Ademas di disfruta di un bida yen di proposito, mi tin mas placa den mi cartera.”—Salmo 97:10.

Door di desaroya un amistad intimo cu Yehova Dios, abo tambe por haya e forsa y sabiduria necesario pa evita e trampa di wega di placa. Si bo haci esei, bo situacion financiero, y bo salu emocional y spiritual lo mehora. E ora ei lo bo tin e placer di experencia pa bo mes e berdad di e palabranan na Proverbionan 10:22: “E bendicion di SEÑOR ta haci rico, y E no ta agrega tristesa na dje.”

[Comentario na pagina 11]

Golosidad no ta djis un malesa social cu ta debilita; e ta un malesa spiritual cu por tin consecuencia fatal

[Cuadro/Plachinan na pagina 9]

Wega di Placa y Cos Sobrenatural

Den un raport na e Comision Nacional Cu Ta Studia e Impacto di Wega di Placa, investigadonan na e Universidad di Duke a referi na un conexion cu ta existi entre e manera cu nan ta haci propaganda pa wega di placa, y e creencia den cos sobrenatural. E raport ta bisa: “Hopi propaganda [di loteria] ta enfoca abiertamente riba rikesa y pocesionnan material . . . Sinembargo, den e casonan aki no ta trata di traha duro y persevera pa haya cosnan material sino di wordo sirbi door di genionan y lampi magico, materialismo basa riba speransa, soño y supersticion. Anto tur manager di loteria sa cu hopi di nan miho clientenan ta gamble a base di supersticion personal, mapa di astrologia, informacion di hende cu ta practica adivinacion y ‘bukinan di soño’ hopi respeta cu tin un lista di number cu ta coresponde cu nomber, fecha y soño. Agencianan di loteria no ta enfatisa cu tur number tin mes tanto chens di sali y cu ora bo ta hunga numbernan popular e cantidad di placa cu bo ta spera di gana hopi bes ta bira menos door cu bo ta haya mas cu un ganado. En bes di esei, nan ta prefera di anima clientenan pa scohe (y pega na) numbernan personal significativo.”

[Plachinan na pagina 10]

“Mi amor pa Yehova a duna mi e forsa necesario pa libra di e bicio di wega di placa.”—John

“Ademas di disfruta di un bida yen di proposito, mi tin mas placa den mi cartera.”—Linda

[Plachinan na pagina 10]

“Pa mi sorpresa, no solamente mi a stop di hunga wega di placa sino tambe mi a cuminsa odi’e.”—Kazushige