Orienta via Streya

DI E CORESPONSAL DI SPIERTA! NA HAWAI

SIGLONAN prome cu Cristofel Columbus a crusa Oceano Atlantico cu boto, nabegantenan Polinesio tawata biaha miles di kilometer den nan canoanan di palo den Oceano Pacifico. Nan tawata nabega entre e islanan den e triangulo Polinesio. Con e Polinesionan di antes por a descubri e cantidad grandi di grupo di isla cu tin den e region enorme aki? Nan a descubri e islanan aki pa casualidad?

Si e Polinesionan tawatin un destinacion spesifico na mente, con nan por a orienta den nan canoanan, sin mapa, sin compas magnetico of otro instrumentonan cu nabegantenan Occidental tawata uza?

E contesta no solamente ta revela con eficas e metodo Polinesio di nabega tawata, sino tambe ta pone nos admira e ordo y structura di nos mundo y di universo.

E Prome Dos Teorianan

No ta tur cientifico y experto ta cla pa acepta e idea cu e Polinesionan tawata capas pa nabega concientemente di isla pa isla. Thor Heyerdahl, un explorado Norwechi, a specula cu Polinesionan tawata originalmente di Sur America y cu e nabegantenan tawata yega na e islanan di Pacifico door di drif bai cu e coriente di lama y bientonan mas frecuente.

Pa test su teoria, Heyerdahl y su tripulacion di cinco Scandinavo a sali for di e costa west di Peru riba un flota traha di e palo di balsa. Nan a sigui nabega den Oceano Atlantico te ora e coriente di awa cu ta bai den direccion west a hiba nan flota. Ora Heyerdahl y su tripulacion tawatin 101 dia y 7.000 kilometer ta nabega, nan a yega na Raroia den e Archipielago di Tuamotu. Pues den un forma masha impresionante, Heyerdahl a demostra cu ta existi e posibilidad cu e Polinesionan a bini di Sur America door di drif bai cu e coriente di oceano mas frecuente. Pero e test cu Heyerdahl a haci no a combence tur experto.

Un di esnan cu tawatin su dudanan tawata Andrew Sharp, un historiado di Nueva Zelandia. Den su buki Ancient Voyagers in Polynesia cu el a skirbi na aña 1963, el a cita varios descubrimento arkeologico y linguistico pa apoya e punto di bista mas tradicional cu historiadonan y expertonan tin—esta, cu e Polinesionan originalmente a bin di west. Sinembargo, Sharp tambe a rechasa e punto di bista cu Polinesionan tawata nabegantenan habil.

Maske Sharp ta admiti cu ta posibel cu e nabegantenan por a dirigi nan mes ora nan tawata haci biahenan cortico, el a para riba cu e Polinesionan sigur no por tawatin un idea fiho na unda nan tawata bayendo si nan mester a haci un biahe di mas cu 500 kilometer. E ta kere cu cualkier isla cu nan a topa durante nan biahe largo tawata pa puro casualidad.

Biahe di Experimento

Door cu dr. David Lewis, di Nueva Zelandia a pensa cu Heyerdahl y Sharp no a duna debido reconocemento na e exploradonan y nabegantenan Polinesio di antes, el a dicidi di demostra cu e metodo di nabega di antes tawata eficas. Na aña 1965 el a logra haci un biahe di 3.000 kilometer di Tahiti pa Nueva Zelandia den un catamaran moderno sin compas. E unico cosnan cu el a uza tawata streya, solo y e direccion cu olanan halto ta bai. Lewis su biahe a lanta interes di hende den e tecnicanan tradicional di nabega riba lama y den rutanan migratorio di antes. Un persona cu a tuma nota di e logro aki ta Ben Finney.

Finney, un profesor di antropologia na e Universidad di Hawai, a studia diseño y structura di canoa Polinesio di antes pa hopi aña. E cu algun di su coleganan na e Sosiedad di Nabegacion di Polinesio a traha un canoa di 60 pia largo cu bodega dobel. Nan a yam’e Hokule‛a, un palabra Hawaiano cu ta nifica “Streya di Goso.” Maske nan a traha Hokule‛a di materialnan sintetico en bes di materialnan tradicional manera palo di acasia, nan kier a traha un replica di e structura, aparencia y prestacion di e canoa di antes.

E prome biahe di Hokule‛a a tuma luga riba 1 di mei 1976, ora el a sali for di e isla di Hawai, Maui, y a bai rumbo pa Tahiti. Pa motibo cu e arte Polinesio di orienta riba lama cu yudansa di streya a bai perdi, nan mester a busca expertonan di nabegacion pafo di Islanan di Hawai. Pues, nan a scohe Mau Piailug, un maestro den e campo di nabegacion di Micronesia, pa guia Hokule‛a durante su prome trip. A dura 31 dia pa Hokule‛a completa su biahe di varios mil kilometer pa Tahiti.

Den henter Polinesia e biahe exitoso aki a lanta un interes cultural, y un interes den nabegacion y trahamento di canoa di antes. Den e añanan cu a sigui, biahenan similar a wordo haci entre e islanan di e triangulo Polinesio, manera Hawai, Nueva Zelandia (conoci tambe como Aotearoa), Rarotonga (den Islanan Cook), y Isla di Pasco (conoci tambe como Rapa Nui). Hopi di e biahenan aki tawata dirigi door di Nainoa Thompson, un nabegante cu a nace na Hawai y cu a studia bou di direccion di Piailug.

Metodonan di Orienta di Antes

Pero ta con e Polinesionan a logra nabega distancianan di miles di kilometer sin ningun aparato? Segun Dennis Kawaharada di e Sosiedad di Nabegacion Polinesio, solo tawata nan guia principal. Durante dia nan tawata uza e luga caminda solo ta sali y baha como marca exacto pa dirigi nan. Anochi, e nabegantenan tawata uza e luganan caminda streyanan ta sali y baha como marca pa nan sa unda nan tin cu bai cu nan canoa.

Asta ora streya no ta sali ni baha den un cierto direccion cu e canoa ta bai, nan por uza otro streya den shelo como guia. Fuera di e streyanan, tambe nabegantenan ta uza luna y e cinco planetanan visibel como yudansa adicional pa mantene nan curso.

Diesdos or di merdia of riba anochinan nubla ora cu nan no por mira streya, e nabegante por uza como su guia biento y olanan halto (hunto cu e luga caminda solo ta sali y baha), pa e por mantene e canoa riba curso. Segun Kawaharada, “e olanan halto aki ta e olanan di lama cu a wordo ocasiona door di biento of tormenta, pero cu despues ta sigui independiente di loke a causa nan, of e olanan di lama cu ta persisti ora e tormenta a pasa caba.”

Pesei, comportacion di olanan halto ta un marca mas confiabel pa wak riba dje, compara cu olanan cu ta wordo produci door di bientonan local cu ta cambia. Door cu e olanan halto aki ta move den un direccion fiho, e nabegante por orienta su mes y dirigi e canoa den e direccion cu e kier. E direccion den cua e canoa ta move segun cu e ta bai cu of contra olanan halto di oceano, ta duna indicacion na e nabegante si e boto ta bayendo den e direccion corecto.

Evidencia ta indica cu posiblemente e Polinesionan di antes tawata capas pa uza cuerponan celestial y forsa di naturalesa concientemente pa bai miles di kilometer cu nan canoanan den e direccion cu nan a plania. Pero pa sabi cu e nabegantenan tawata, ningun di nan metodonan lo no a funciona si no a existi un orden den naturalesa cu ta goberna e marcanan cu nan ta uza como guia, manera e luganan caminda streya ta sali y baha.

Mas cu 2.700 aña pasa, profeta Isaias a duna elogio na e Magnifico Creador, Yehova Dios, pa e orden cu bo por mira den shelo, ora el a skirbi: “Hisa bo wowo wak ariba y mira ta ken a crea e streyanan aki; Esun cu ta guia nan ehersito segun nan cantidad, ta E ta yama nan tur na nan nomber; pa motibo di e grandesa di su forsa y su poder ningun di nan no ta falta.”—Isaias 40:26; Salmo 19:1.

Tambe e salmista a skirbi bou di inspiracion cu Dios “ta determina e cantidad di e streyanan; E ta yama nan tur na nan nomber.” (Salmo 147:4) E Polinesionan a reconoce e orden cu ta existi entre e streyanan den shelo riba nan cabes y a uza esakinan pa dirigi nan durante nan exploracion inmenso di e Oceano Pacifico. Esaki no ta duna nos mas confiansa cu nos universo ta producto di un Creador cu ta sumamente inteligente y organisa?

[Mapa/Plachinan na pagina 23]

(Pa e texto den su formato completo, wak e publicacion)

Fidji

TRIANGULO POLINESIO

Hawai

Samoa

Tonga

Nueva Zelandia

Islanan Cook

Tahiti

Islanan Marquesas

Archipielago di Tuamotu

Islanan Tubuaï

Isla di Pasco

[Plachi]

Na aña 1993 nan a traha e canoa cu bodega dobel “Hawai‘iloa” cu materialnan mas tradicional cu su ruman mohe “Hokule‘a”

[Reconocemento]

Hawai‘iloa na pagina 21 y 23: © Monte Costa