Un Fruta Colo di Oro cu un Pasado Interesante

DI E CORESPONSAL DI SPIERTA! NA FIDJI

TAWATA aña 1789. E boto habri di 7 meter tawata manera un feneta riba lama grandi, y carga cu homber. Su pasaheronan tawata suak door di hamber, y nan tawata agota ya cu nan tawatin varios dia ta saca awa for di e boto y a la bes lucha contra ola bruto y halto y contra biento fuerte. Ainda nan tawatin cu biaha mas cu 5.000 kilometer riba lama desconoci, yen di rif di coral traicionero. Cuminda tawata scars. Cada homber tawatin mag di come solamente 30 gram di pan (buscuchi di barco) pa dia hunto cu un tiki awa. Aparentemente e hombernan ei tawatin masha tiki chens di sobrevivi.

Den poco mas cu un siman, nan a pasa den hopi cos: rebelion riba lama, bandona den un boto sin timon, y un di nan a ser mata den un atake di nativonan. Tambe nan a confronta tormentanan feros y apenas a logra scapa di canoanan cu a persigui nan for di e islanan conoci e tempo ei como Islanan Canibal.

Kico a atrae e hombernan aki na e parti leu y peligroso aki di Oceano Sur Pacifico? Ki mishi nan asina leu for di nan cas na Inglatera, un pais di hofi- y hardinnan bon ordena? E obheto di nan buskeda tawata e remarcabel palo di breadfruit of fruta di pan. (Esaki ta famia di e fruta di pan cu nos conoce na Antiya.) Laga nos splica con e bunita palo aki cu su fruta nutritivo a hunga un papel clave den e relato aki y den otro biahenan heroico di descubrimento cu a tuma luga hopi mas prome cu esaki.

Kisas bo a identifika e hombernan den boto di e relato ariba como e sobrevivientenan di e notorio rebelion riba e barco Bounty. E barco di marina Britanico aki di 215 tonelada, bou di mando di Capitan William Bligh, a sali for di Inglatera rumbo pa Tahiti. Na su yegada einan, Bligh a tuma abordo un grupo di “pasahero” hopi remarcabel: casi 1.000 yiu di e palo di fruta di pan. E matanan den pochi aki tawatin e potencial di cubri e gasto di nan pasashi door di produci fruta nutritivo colo di oro unabes nan wordo estableci den nan hogar nobo na e colonianan Britanico den Caribe.

Nan a cuminsa cu e proyecto aki a base di e conseho cu Sir Joseph Banks a duna gobierno Britanico. Gobierno tawata busca urgentemente un fuente nobo di cuminda pa e catibonan cu tawata traha den e cunucunan di caña. Banks, kende e tempo ei tawata traha como consehero pa e Hardinnan Botanico di Kew serca di Londen, Inglatera, a nabega anteriormente como specialista di mata hunto cu Capitan James Cook riba esaki su prome biahe di exploracion di Oceano Pacifico.a Tanto Banks como Cook a premira posibilidadnan prometedor pa e palo di fruta di pan.

Aunke Banks no a compaña Bligh personalmente, el a prepara un plan con pa cuida e matanan riba barco durante e biahe largo riba lama, dunando atencion special na nan necesidad di awa fresco. Algun escritor ta kere cu ta e atencion y awa cu nan a duna e matanan na abundancia—a costo di e tripulante—kisas a pone e tripulacion malcontento rebela. Serca di e costa di Tonga, mainta tempran dia 28 di april 1789, Bligh cu 18 homber cu a apoy’e, a ser poni den un boto sin timon bou di menasa di spada. E tripulacion rebelde probablemente a hiba di gusto den benta e palonan di fruta di pan den lama pa nan muri.

Sinembargo, Bligh no tawata un homber cu ta entrega facilmente. El a cuminsa cu loke a ser yama “e biahe di mas famoso den boto habri den historia di lama.” Den shete siman trabahoso, el a nabega cu e boto chikito aki mas cu 5.800 kilometer, pasando nortwest meimei di e islanan conoci awe como Fidji, a lo largo di costa oost di New Holland (Australia), y bai te na e refugio di e isla di Timor.

Ora el a regresa Inglatera, Bligh a haya dos otro barco bou di su mando, y despues di esei el a bolbe Tahiti pa recohe palo di fruta di pan. E biaha aki, na aña 1792, si el a logra transporta un 700 “pasahero” den pochi pa e islanan di St. Vincent y Jamaica den Caribe. Te cu awe, palonan di fruta di pan ta prospera einan, produciendo, na moda di papia, un cosecha di oro bou di nan corona di blachinan berde y abundante.

Aunke Bligh su biahe sigur ta un cuenta heroico di sobrevivencia y descubrimento, e ta simplemente un capitulo resien den e historia di fruta di pan. Si e palo di fruta di pan por a papia, ken sa ki historianan lo el a conta di miles di aña pasa ora cu el a compaña nabegantenan di antiguedad riba biahenan grandi di descubrimento!

E Palo di Fruta di Pan Su Prome Biahenan

Arkeologonan ta kere cu varios ola di migracion a tuma luga den parti west di Pacifico, y cu esun mas resien a cuminsa rond di aña 1500 prome cu nos era.b Cuminsando den suitost Asia, e pueblo Lapita a uza embarcacionnan cu a consisti di dos canoa grandi pega na otro pa migra atraves di paisnan conoci awe como Indonesia, Nueva Guinea, Nueva Caledonia, Vanuatu y Fidji y asta mas leu te den parti central di Oceano Pacifico. E biahenan aki a encera hazañanan realmente asombroso di orientacion, si tuma na cuenta cu algun di e biahenan entre e islanan a nifica nabega centenares di kilometer riba lama grandi.

E pueblo Lapita su embarcacionnan di dobel canoa por a carga un cantidad grandi di hende hunto cu bestia, cuminda y un variedad di simiña, stek y mata den pochi. Segun cu e pueblo Lapita a plama den henter Pacifico, nan a descubri y pobla e islanan di Melanesia, Polinesia y Micronesia den nort y Nueva Zelandia den suit. Nan a plama manera e olanan di lama, y cu tempo nan a yega te na Isla di Pasco y Hawai.c Unda cu nan a bai, nan tawatin hunto cu nan e “pasaheronan” mas sobresaliente, esta, e palo resistente di fruta di pan.

Un Alimento Nutritivo y di Hopi Uzo

Awe na Fidji, mescos cu na hopi otro parti di mundo, fruta di pan tin hopi balor como un alimento nutritivo y barata. Algun variedad di e palo ta resistente y ta produci hopi fruta, tin bes tres biaha pa aña pa 50 aña largo, asta ora no tin bon condicion di clima. Ora bo fula e fruta e ta manera pan, y tur su variedadnan tin diferente sabor. Por lo general hende ta bisa cu e ta smak un tiki pan y un tiki batata. Por hereb’e den awa, stom e, pon’e den forno of has’e, y hopi bes nan ta trah’e como desert. Por sec’e y mul’e manera hariña di funchi. Anto si casc’e y fermenta e fruta, e ta keda bon pa añanan.

Por lora e blachinan di e mata rond di productonan manera pisca of galiña pa mantene nan awa y sabor ora di cushina nan. Asta e simiña bo por come y e ta smak noot. Nan sa recohe e lechi di e palo y mucha gusta cou e como bals. Mira cuanto uzo e tin! Pesei no ta dificil pa compronde dicon algun hende di e islanan di Pacifico ta gusta e palo di fruta di pan.

Ledua, kende ta biba na Fidji, ta conta nos cu ora menciona fruta di pan esaki ta trece recuerdonan grato y tambe desagradabel di su infancia. Su famia tawatin cinco palo grandi di fruta di pan. Tawata Ledua su trabou pa bari nan blachinan den cura, un tarea cu e tawatin rabia riba dje. Di otro banda, hopi bes despues di scol e cu su rumannan tawata piki e frutanan y bende nan mas tanto posibel di cas pa cas. Anto nan mayornan tawata uza e placa pa cumpra cos cu nan tawatin mester pa bai asambleanan cristian, manera cuminda, carchi di bus of sapato nobo.

Kisas bo ta biba den un di e hopi partinan di mundo cu awor ta anfitrion di e “pasahero” aki cu a biaha leu y cu tin un nomber impresionante: Artocarpus altilis. Kisas antes bo no a considera e creacion maraviyoso aki como un tesoro of ni sikiera como un articulo di balor of di beyesa. Sinembargo, hopi hende cu ta biba den Pacifico ta haya cu ora menciona fruta di pan, esei ta laga nan corda riba hazañanan grandi riba lama y di biahenan di descubrimento, tanto di e pueblo Lapita como di Capitan Bligh.

[Nota]

[Cuadro/Plachi na pagina 25]

Un Palo Cu Ta Produci Hopi Regalo

E palo maduro di fruta di pan ta un palo semper berde y espectacular. El a origina den e selvanan di Maleisië. Como miembro di e famia di palo Moraceae, e ta un pariente di palo di figo y di moerbei y jackfruit. Ora e palo madura, e por alcansa un haltura di 12 meter. Bo por corta e yiunan cu e ta saca na su raiz y planta nan. E palo di fruta di pan ta produci flornan macho y embra distinto for di otro y den troshi separa. Den mondi e flornan aki ta depende di un raton djanochi chikito cu ta come fruta, pa polinisa nan y plama nan simiña. Despues e flor ta desaroya bira un fruta grandi rondo of oval, tamaño di un milon chikito, casca berde y paden colo hel manera oro.

Tambe e palo di fruta di pan ta produci blachi masha grandi, lombrante, colo berde scur, cu ta duna dushi sombra contra e solo tropical cayente. Su palo ta suave y liviano, y ta ser uza pa traha mueble y canoa, mientras cu nan sa uza e casca paden dje palo pa traha un tipo di tela, conoci rond Pacifico como tapa. E lechi di e palo nan ta uza pa seal cos contra awa, y den algun luga nan a yega di uz’e pa pega weso fractura y asta como lijm pa coi parha.

[Plachi na pagina 24]

Pintura di Robert Dodd di e rebelion riba e barco “Bounty”

[Reconocemento]

Libreria Nacional di Australia, Canberra, Australia/Bridgeman Art Library

[Plachinan na pagina 26]

Por prepara fruta di pan na hopi diferente manera