Dushi Bestia di Cas of Asesino Feros?

DI E CORESPONSAL DI SPIERTA! NA POLONIA

UN PERSONA cu tawata jog ta ser ataca door di un cacho agresivo y despues di esei e ta sangra muri. Un mucha mohe ta ser mata door di su mes Rottweiler. E mayornan di un mucha homber di nuebe aña ta para mira con un Duitse herder di caya ta herida nan yiu mortalmente. Esakinan ta djis un par di e tragedianan cu cacho di rasa puro a causa na Polonia.

Pa evita e tipo di tragedianan ei, autoridadnan den algun luga ta laga hende cria cierto rasa di cacho solamente si nan busca un permit pa nan tin e cacho. Barbara Zaleska, miembro di e Asociacion di Kennel Polaco, ta argumenta cu ora di duna permit mester wak e doño no e cacho, “pasobra ta e doño ta dicidi si cacho di rasa mastif, rottweiler y bullterrier lo bira bestianan agresivo of lo keda amigo di hende.”

Den algun caso hende deliberadamente ta train e cachonan pa ta asesino. Supuestamente e metodonan di e trainernan ta encera bati e cachonan, laga nan pasa hamber y asta tene “training con pa mata.” E training ei ta inclui ataca y scheur popchi. Caba nan ta pone e cacho ataca cachonan mas suak cu lo e mata sigur. Ora e training finalisa, e cacho ta cla pa participa den peleanan real di cacho, pa e delicia di hungadonan di placa y fanaticonan cu gusta dramamento di sanger.

Bijbel ta bisa bon cla con Dios ta mira crueldad contra bestia: “Un hende husto ta cuida bida di su bestia, ma compasion di e malbadonan ta cruel.” (Proverbionan 12:10) Hende cu kier agrada Dios no ta somete bestia na maltrato sadista. Nos por ta contento cu den Dios su mundo nobo lo bin un fin na e practica di train bestia pa bira asesino, sea ta pa sport of pa cualkier otro motibo.—Salmo 37:9-11.