Amor den Accion un Trabou di Ausilio Maratonico

RICHARD VARA, redactor bakia di e corant Houston Chronicle, no ta un persona cu ta ser impresiona facilmente, pero aña pasa si esei a sosode. “Nunca mi no a mira un cos asina!” el a sclama. “Mi no por kere mi bista.” Lee P. Brown, alcalde di Houston, (Texas, Merca) a expresa e mesun sintimento. El a bisa: “Mare tur hende na Houston por a mira loke boso a haci. Mi ta sumamente impresiona.” Kico tawata e topico di nan comentario? E redactor y e alcalde tawata papia di e trabou di ausilio cu Testigonan di Yehova a haci na Houston. Kico e trabou aki a encera? Dicon e tawata necesario? Y kico a hacie asina impresionante? Pa haya e contesta, laga nos cuminsa na principio.

E Piyo Inundacion di Houston

Na principio di juni 2001, Allison, un tormenta tropical feros a asota e area plat di suitost Texas. Al final, riba diabierna 8 di juni, Allison a basha den un periodo di 24 ora, un meter di awasero torencial riba Houston, e di cuater stad mas grandi di Merca.a Den poco tempo, e awa cu tawata subi a drenta tienda, oficina y miles y miles di cas. Careteranan principal rond di e stad a bira riunan violento cu a tapa autonan bandona y trucknan grandi. E awa tawata asina halto cu ni trucknan di brandweer ni otro vehiculonan di rescate no por a pasa riba e careteranan inunda. Mester a manda busca yudansa di helicopter y vehiculonan militar pisa pa rescata hende.

Finalmente, ora shelo a claria riba dialuna 11 di juni, tawata bisto cu Allison a causa varios morto y masha hopi daño material. Bintidos hende a perde nan bida, entre nan dos Testigo di Yehova: Jeffrey Green, un anciano cristian, y su cuña Frieda Willis.b Ademas, alrededor di 70.000 cas a sufri daño, haciendo e inundacion aki un di e piyo desasternan cu hamas a asota un stad grandi asina. De echo, e daño material di 5 mil miyon dollar cu Allison a causa, a hacie e tormenta tropical mas costoso den historia Mericano.

Un Avalancha di Boluntario

E habitantenan tawata den shock. Un di e dunadonan di ausilio a bisa: “Nan cama tawata muha. Nan tapijt tawata muha. Nan potretnan di baby a bai perdi.” Hopi di e mas cu 16.000 Testigonan di Yehova cu tin den e area di Houston a sufri perdida. Ocho Salon di Reino y centenares di cas di Testigonan di Yehova a sufri daño. Algun di e casnan aki a yena cu varios centimeter di awa, otronan tawatin awa te na dak. Na tur, mas cu 80 congregacion di Testigonan di Yehova a ser afecta. Sinembargo, no a laga e victimanan aki pa nan cuenta. Un par di dia despues di e inundacion, un avalancha di boluntario a bini al rescate. Con esaki a sosode?

Asta prome cu e awanan di e inundacion a cuminsa baha, ancianonan cristian di e congregacionnan di Testigonan di Yehova na Houston a drenta accion. Un anciano a conta: “Nos a bel y bishita nos rumannan. Caba nos a calcula e daño, y pa dialuna 11 di juni, nos a compila un raport completo cu a menciona tur esnan cu a sufri perdida, e cantidad di casnan cu a sufri daño y con grandi e daño tawata. Anto nos a manda e raport aki pa e sede di Testigonan di Yehova na Brooklyn, New York.” Un par di dia despues, e oficina di sucursal di Testigonan di Yehova na Merca a instala un comite di ausilio cu a consisti di ocho anciano cristian di Houston y a percura e fondonan financiero pa duna ausilio. Kico tawata e tarea di e comite? Yuda e victimanan recupera emocionalmente y tambe drecha e casnan daña di Testigonan di Yehova. Tawata trata di mas cu 700 cas!

‘Con nos ta bai takel e tarea inmenso aki?’ e miembronan resien nombra di e Comite di Ausilio di Houston 2001 di Testigonan di Yehova a puntra nan mes. Nan tawata traha te anochi laat pa forma un plan inicial y a invita e mas cu 160 congregacionnan di Testigonan cu tin den e area di Houston pa yuda. E presidente di e comite a conta: “E reaccion tawata tremendo. Mas cu 11.000 Testigo a skirbi nomber, y a ofrece nan tempo, labor y ofishi pa yuda sin cu nan lo a ricibi pago pa esei.”

Beskem y Boluntario

Un par di dia despues di e inundacion, boluntarionan a cuminsa traha riba e casnan di e victimanan, kitando tapijtnan muha, flur y muraya daña, cashinan yen di awa, portanan tur troci y tur otro cos cu a susha cu e awa di inundacion contamina cu awa di riolering. Un boluntario a bisa: “Nos no a precupa solamente pa drecha cas di nos rumannan, sino tambe pa proteha nan salu.” Como cu beskem venenoso lo a cuminsa crece unbes tras di muraya y den cashi, e prome cos cu nan mester a haci ta desinfecta e casnan completamente.

Pa siña haci e trabou na un manera safe, varios Testigo a pidi training serca e Agencia Federal pa Combati Calamidad (FEMA), un agencia gubernamental cu ta specialisa den trata cu desaster. Despues di esei, cada Testigo entrena pa FEMA a invita dies boluntario pa bai cu ne na un cas cu a sufri daño. Einan e ta siña nan con pa desinfecta e cas debidamente. E siguiente dia, cada un di e dies boluntarionan ei resien entrena, na nan turno ta bai cu dies otro boluntario. Un boluntario a conta: “Den un par di dia tawatin centenares di hende cu tawata sa con pa haci e trabou aki.” E beskem simplemente no por a plama mes lihe cu e creciente cantidad di boluntario! Pensionadonan y teenagernan cu tawatin vakantie di scol tawata traha den dia. Anochi, otro boluntarionan a tuma over y a sigui cu e trabou. Den seis siman tur e casnan contamina dje Testigonan tawata limpi y safe.

Un Centro di Coordinacion y Shete Centro Regional

Entretanto e comite di ausilio a cumpra un cantidad grandi di gipsplaat y tonelada di otro material di construccion. Pero unda por a warda nan? E bosero di e comite di ausilio a relata: “Ora manager di un compania a tende di nos necesidad, el a ofrece nos un luga di deposito gratis. E luga tawatin un superficie di 5.000 meter cuadra!” Fuera di warda material di construccion, e deposito tawatin suficiente luga pa pone oficina. No a tarda hopi cu el a bira e centro di coordinacion di e trabounan di ausilio, caminda un 200 pa 300 boluntario tawata traha den dia, anochi y weekend.

Como cu e casnan cu a sufri daño tawata situa den un area masha grandi, nan a establece centronan regional di ausilio den shete Salon di Reino. Den weekend cada centro tawata cancan di boluntario. (Wak e cuadro “Centro di Actividad.”) Hopi di e boluntarionan ei a yega di traha hunto riba construccion di Salonnan di Reino den e region. De echo, tawatin boluntario cu ofishi di construccion for di 11 Comite di Construccion Regional di Arkansas, Louisiana, Oklahoma y Texas, cu a bin duna un man.c Den cada centro regional, e trahadonan di ofishi, cu a inclui carpinte, ferfdo y pipefitter, a dirigi cosnan y a train otro personanan.—Wak e cuadro “Programa di Training.”

Un Plan y un Banco di Dato

E boluntarionan a traha segun un plan di construccion cu a consisti di shete fase. Nan a entrega material di construccion na e casnan den cuater cargamento, y a programa e trabou di reparacion pa tuma luga den tres weekend. Di e manera aki nan lo a completa henter e trabou di ausilio den mas o menos seis luna.

Pa e plan por funciona, e comite a forma 22 departamento, incluso di compra, acomodacion, transporte y logistica. Tur departamento a ricibi yudansa di e informacion cu tawatin den un banco di dato extenso cu e boluntarionan a desaroya. Prome cu e trabounan di reparacion a cuminsa, e boluntarionan a pasa dies dia hincando informacion den computer. Un boletin di noticia a bisa: “Tawata un maraton di hinca dato.” Sinembargo, na final di e “maraton” ei nan tawatin un coleccion di datonan util na nan disposicion. Cu un solo click di e mouse di un computer, e banco di dato a mustra ki ora cualkier un di e 11.000 boluntarionan lo tawata disponibel, ki habilidad of ofishi e tawatin, y con pa tuma contacto cu ne. Cu un otro click, nan a mira e posicion di e reparacionnan, e permitnan di construccion cu nan tawatin mester y otro detayenan di e casnan cu a sufri daño. E banco di dato ei a bira conoci como “e curason di e trabou di ausilio.”

Yen di Emocion y Gratitud

Boluntario experencia den construccion di cas a bishita e casnan cu tawata seco y sin beskem pa determina kico mester haci pa drecha e daño. E bosero a splica: “E boluntarionan aki tawata calcula e cantidad di material cu lo tawatin mester te den e detaye di mas chikito: asta e cantidad di clabo. Nos no kier a malgasta e fondonan ni material cu nos a ricibi como donacion.” Na mesun tempo tawatin otro boluntario cu a bai busca e permitnan necesario di construccion serca funcionarionan di gobierno.

Despues famianan afecta a haya e invitacion pa bini na e deposito pa scohe for di un seleccion limita di tapijt, cashi, linolio y otro articulonan pa remplasa loke nan a perde. E victimanan di inundacion su gemoed tawata yena y hopi bes nan a yora ora nan a mira tur loke a ser percura pa nan. Tambe nan a ricibi conseho for di boluntarionan cu tawata experto den asunto di seguro y reglanan di gobierno. Caba a programa un dia pa drecha e casnan, y riba e fecha exacto cu e gruponan di trahado tawatin mester di e material di construccion, boluntarionan cu a core truck a entrega nan. Un persona cu no ta Testigo a bisa su esposa Testigo ora e rumannan tawata drecha nan cas: “Bo rumannan ta un maravia. Un grupo di trahado ta bai, y un otro ta core yega. Nan ta traha manera fruminga!”

Reparacionnan basico a dura un tres weekend pa cada cas. E presidente di e comite a bisa: “Pero de bes en cuando, esei a dura cinco te asta ocho siman.” Loke tawata pasa ta cu ora nan kita muraya di casnan mas bieu, e boluntarionan hopi bes a ripara cu tawatin daño bieu, y nan no kier a pone muraya nobo sin drecha prome e problemanan bieu aki. Un boluntario cu ta homber di ofishi a bisa: “Tawatin biaha cu nos a mira cu e framenan di palo tawata pesta cu comehein, pues nos tawata haci sigur di elimina e comeheinnan. Nos mester a cambia framenan di hopi cas pa nos por a drecha cosnan. Nos a laga e casnan den bon condicion.” Un victima di inundacion a expresa e sintimento di hopi otro doño di cas ora cu yen di gratitud el a bisa un bishitante: “Mi cas ta miho awor cu ora m’a cumpr’e!”

Cuminda Rapido

Pa percura cuminda pa tur e cantidad di boluntarionan ei, un grupo di Testigo a transforma un luga di deposito tras di un Salon di Reino den un centro di prepara y reparti cuminda. Testigonan di tur parti di Merca a contribui cu frishider, vriezer, dishwasher, stoof y otro aparato di cushina. Tur diasabra y diadomingo, 11 coki y un 200 boluntario tawata prepara miles di tayo di cuminda den e centro. E boluntario cu tawata supervisa e cushina aki a bisa: “Nos tin 19 aña ta prepara cuminda pa proyectonan di construccion di Salon di Reino, pero e proyecto aki tawata mas grandi di loke hamas nos a imagina.”

Nan tawata paketa e cumindanan den 120 baki grandi. Y tawata hinca nan den 60 vehiculo, cu a entrega e cumindanan na tur e centronan regional y esun di coordinacion. Mientras tanto, cada grupo cu tawata traha riba un cas, a manda un boluntario na e centro regional na cua nan ta asigna, pa busca cuminda pa henter e grupo. E boluntarionan tawata come nan cuminda den e cas y despues a sigui mesora cu nan trabou.

Mision Cumpli!

Finalmente, na april 2002, e 11.700 boluntarionan a yega e liña final di un di e campañanan di ausilio di mas grandi cu Testigonan di Yehova a yega di organisa. E boluntarionan a dedica 1.000.000 ora na drecha of reconstrui un total di 8 Salon di Reino y 723 cas. Un di e victimanan di e inundacion a papia pa hopi otro victima ora el a bisa cu lagrima di gratitud: “Mi ta gradici Yehova y e boluntarionan pa tur e yudansa cu nan a duna. Como miembro di un hermandad amoroso mi a haya hopi sosten!”

[Nota]

[Cuadro/Plachi na pagina 15]

CENTRO DI ACTIVIDAD

Ta diasabra mainta 7’or na Centro Num. 4, den parti nortost di Houston. Boluntarionan ta papia cu otro, hari, bebe cofi y come donut den e Salon di Reino. Tin di nan a core centenares di kilometer cu auto for di nan cas pa yega akinan. Pero banda di 7:30 e combersacionnan alegre ta plakia, y e superintendente di e centro regional ta tuma algun minuut pa considera un texto biblico. Tambe e ta anuncia cu diadomingo mainta 7:30 lo tene un Studio di Toren di Vigilancia prome cu e boluntarionan bai na nan luga di traha, y e ta anima tur presente pa participa den e studio door di duna nan comentario sea na Ingles of Spaño. E ta informa cu e sede mundial di Testigonan di Yehova a manda saludo, y e presentenan ta ricibi esei cu un fuerte aplauso.

Caba e superintendente ta duna un informe di e situacion actual di e trabou di ausilio y ta gradici e boluntarionan calorosamente pa e bon spirito cu nan ta manifesta. E ta puntra: “Tin ruman aki cu no sa kico e mester haci of unda e mester bai?” Ningun hende no ta hisa man. “Ken ta keda come?” Mesora tur man ta bai laira, y tur hende ta na harimento. Por ultimo, un ruman ta haci oracion y e 250 boluntarionan—homber, mohe, hoben y bieu—ta bai nan asignacion, cla pa un otro dia largo di trabou pisa.

E mesun cos ta pasa na e otro seis centronan regional y na e centro di cordinacion. Mientras tanto, e otro boluntarionan cu ta traha den e cushina central ta druk ta drei e weyanan riba candela, ya cu pa 12 or di merdia mas cu 2.000 boluntario hambra na tur parti di Houston lo ta cla pa un cuminda cayente!

[Cuadro/Plachi na pagina 16]

PROGRAMA DI TRAINING

Durante e trabounan di ausilio, hombernan di ofishi boluntariamente a dirigi lesnan pa train boluntarionan sin preparacion pa nan por haci tareanan spesifico. Algun boluntario a haya training pa desinfecta cas, otronan a siña con mester instala muraya y cashi, y tambe tawatin cu a siña haci muraya fini y ferf. E Seminarionan di Trahado Cualifica aki a wordo graba riba videocassette, anto a uza e videonan ei na e centronan regional pa train mas boluntario. Un miembro di e comite di ausilio a comenta: “Via e seminarionan aki nos a garantisa e calidad halto di e trabou di reparacion.”

[Cuadro na pagina 18]

“E Berdadero Acto Di Dios”

“Companianan di seguro ta yama desasternan natural un acto di Dios [of force majeure]”, un miembro di e comite di ausilio a remarca. Anto el a agrega: “Sinembargo, e grupo di boluntario cu a traha akinan durante tur e lunanan ei ta e berdadero acto di Dios. Nos hermandad ta un milager!” Durante e trabounan di ausilio aki tawatin 2.500 boluntario of mas presente den weekend pa traha. E presidente di e comite a bisa: “E boluntarionan aki—sin cu nan ta ricibi pago—a cansela vakantie cu nan tawatin plania, a cambia nan programa di famia y a pospone otro asuntonan personal, pa nan por a yuda den un di e trabounan di ausilio di mas grandi cu Testigonan di Yehova a yega di haci.”

E campaña largo di ausilio a rekeri hopi sacrificio. Un boluntario cu a apoya e trabou for di comienso te final, tawatin su empleo normal di 50 ora pa siman. Pero toch el a dedica 40 ora tur siman na e trabou di ausilio. E di: “Yehova a duna mi e fortalesa. Conocinan a puntra mi: ‘Nan ta paga bo pa esei?’ Mi a bisa nan: ‘Lo bo no por paga mi pa haci esaki.’” Den weekend, despues di nan empleo di henter siman, un famia di e estado Louisiana tawata core 400 kilometer pa bin yuda cu e trabou di ausilio, y despues 400 kilometer pa bai cas bek. Hopi boluntario tawata traha for di ora solo sali te ora e baha, y despues tawata bai cas bek cu auto. Un grupo di 30 boluntario di ofishi, cu a core shete pa dies ora pa yega, a bisa: “Tawata bale la pena.” Un otro boluntario tawata baha for di su trabou 3:30 di atardi y despues bai traha como boluntario den e centro di coordinacion te cu 10 or djanochi. Den weekend tambe e tawata yuda. E di: “Mi ta sinti un satisfaccion.”

E boluntarionan aki y tambe tur otro tawata dispuesto pa yuda debi cu nan tawatin amor di ruman, e marca cu ta identifica cristiannan berdadero. (Huan 13:35) Despues cu e alcalde di Houston a bishita e centro di coordinacion di e trabounan di ausilio, esei a conmov’e pa bisa un grupo di Testigo: “Boso ta kere den haci loke Dios ta bisa nos pa haci. Boso ta biba boso creencianan.”

[Plachi na pagina 14]

Awa di inundacion ta invadi Houston, 9 di juni 2001

[Reconocemento]

© Houston Chronicle

[Plachi na pagina 15]

Careteranan a bira riu

[Plachi na pagina 15]

Awa a drenta cas

[Plachinan na pagina 17]

Algun di e miles di Testigonan cu a sirbi como boluntario

[Plachi na pagina 18]

E grupo di cushina a prepara mas cu un cuart miyon tayo di cuminda!

[Reconocemento pa Potret na pagina 13]

NOAA

[Comentario di e plachi na pagina 14]

Hombernan di ofishi ta duna les