Hobennan Sa Puntra . . .

Dicon Mi Ta Sinti Cu Mi Mester Ta Perfecto?

“Door cu mi tata tawata meneer di scol, tur hende tawata spera pa mi haya bon punto so. Tin biaha mi tawata yora te ora mi pega soño.”—Leah.a

“Ami ta un perfeccionista. Mi mester ta bon mes den un cos of hacie den un manera completamente diferente for di otro hende, sino mi no ta mira pakico hacie.”—Caleb.

ABO TA sinti cu semper bo mester ta perfecto? Bo ta precupa constantemente cu maske cuanto esfuerso bo haci, nunca bo no ta mucho satisfecho cu bo mes? Bo ta un hende cu no por acepta ningun critica? Ora cosnan sali malo, bo ta culpa bo mes, acusando bo mes di ta bobo, inferior of indigno? Si bo kier pa algo wordo haci na drechi, bo ta sinti cu ta abo mes tin cu hacie? Sa sosode cu bo tin asina tanto miedo di fracasa cu bo ta pospone cosnan of para bo actividadnan?

Kico di bo relacion cu otro hende? E echo cu bo no tin amigo ta pasobra ningun hende cu bo conoce no ta suficiente perfecto? Bo ta demasiado precupa tocante otro hende su fayonan? Si bo contesta si, riba cualkier un di e preguntanan aki, e ora ei lo bo ta luchando cu algo cu yama perfeccionismo. Y si esei ta e caso, no ta abo so tin e problema aki. E ta un caracteristica comun di hobennan, specialmente hobennan talentoso y exitoso.b

Kico ta haci hende perfeccionista? Te ainda ta teoria so tin. E buki Perfectionism—What’s Bad About Being Too Good? (Perfeccionismo—Ta Malo pa Ta Mucho Bon?) ta bisa: “Perfeccionismo no ta un enfermedad; bo no ta pega cu ne. Perfeccionismo no ta algo hereditario; bo no ta nace cu ne. Ta kico ta haci hende perfeccionista anto? Algun experto ta kere cu perfeccionismo ta desaroya durante infancia. Un combinacion di presion di famia, presion di e hende mes, presion social, presion di medionan di comunicacion y e gana di imita personahenan popular irealistico ta pone algun hende precupa, sinti nan culpabel y traha mucho duro henter nan bida.”

Sea cual sea e causa, e gana di ta semper perfecto por perhudica bo. Laga nos analisa kico ta perfeccionismo y pakico e por ta dañino pa bo.

Kico Ta Perfeccionismo?

Perfeccionismo ta encera mas cu djis trata na briya of haya satisfaccion den un trabou bon haci. Na Proverbionan 22:29, Bijbel mes ta elogia un homber cu ta ‘habil den su trabou.’ Tambe Bijbel ta papia faborablemente di un cantidad di persona cu a bira hopi habil riba varios tereno. (1 Samuel 16:18; 1 Reinan 7:13, 14) Pesei no tin nada malo den purba briya den un cos y pone metanan halto pero realistico. Pues bo tin mag di ‘bisa bo mes cu bo trabou ta bon.’—Eclesiastes 2:24.

Sinembargo, e hende perfeccionista ta perde chens di haya e satisfaccion ei. Su manera di mira logro ta fundamentalmente insaludabel. Algun experto ta bisa cu perfeccionismo tin di aber cu “metanan inalcansabel (esta, perfeccion), y un falta constante di satisfaccion, maske con bon e prestacion por ta.” Door di esei, perfeccionismo ta “un fuente cronico di stress cu hopi bes ta laga e persona sinti cu el a fracasa.” Pesei un fuente ta defini perfeccionismo como “e creencia iracional cu bo ambiente mester ta perfecto.” E ta “un actitud persistente cu kico cu bo purba haci den bida mester ta al pie de la letra y sin desviacion, fayo of inconsistencia.”

Pero Hesus no a bisa: “Boso mester ta perfecto, mescos cu boso Tata celestial ta perfecto”? (Mateo 5:48) Si, pero Hesus no tawata kiermen cu bo por ta perfecto den e sentido absoluto di palabra. Por cierto, Bijbel ta siña nos cu “tur [hende] a peca y ta falta e gloria di Dios.” (Romanonan 3:23) Kico Hesus tawata kiermen anto? Den Bijbel e palabra “perfecto” ta transmiti e idea di ser completo. (Mateo 19:21) Ora Hesus a bisa cu nos mester ta perfecto, e tawata papiando tocante amor y animando su siguidonan pa nan ta mas completo den mustra amor. Con? Door di amplia nan amor pa inclui asta nan enemigonan. Segun e escritor di Bijbel Lucas, Hesus a bisa: “Sea misericordioso, mescos cu boso Tata ta misericordioso.”—Lucas 6:36.

Pero un perfeccionista ta carga e ilusion cu ta posibel pa ta perfecto den e sentido absoluto di palabra. Pesei kisas e ta spera demasiado di otro hende. Segun e buki Never Good Enough—Freeing Yourself From the Chains of Perfectionism (Nunca Satisfecho—Libra Bo Mes for di e Cadenanan di Perfeccionismo), un perfeccionista ta “un persona cu ta laga e manera cu otro hende ta haci nan trabou frustr’e . . . Na su opinion, e hendenan rond di dje no ta worry pa haci un bon trabou, ni sinti nan orguyoso di loke nan ta haci.”

Carly, por ehempel, ta bai bon na scol. Nan a hinc’e den un programa pa studiantenan talentoso. Sinembargo, e no ta bai mucho bon cu otro hende. Door cu e kier pa tur cos ta perfecto, el a perde mayoria di su amigonan. E di: “Mi ta kere cu nan tawata demasiado imperfecto.”

Kisas otronan ta busca perfeccion, no den otro hende, sino den nan mes. E buki Nunca Satisfecho ta splica cu hende asina ta sinti cu “ni nan mes ni nan accionnan no ta suficiente bon . . . , y [nan] ta precupa specialmente cu loke otro hende ta pensa di nan.”

E Problema di Purba Ser Perfecto

Pesei, en bes di ta algo saludabel y beneficioso, e afan pa ta perfecto sa ta insaludabel y perhudicial. Y na luga di briya, un punto di bista asina ta promove fracaso. Un homber cristian cu yama Daniel ta corda con duro el a traha pa oranan largo riba un presentacion oral cu e tawatin cu duna dilanti un klas na un Salon di Reino local di Testigonan di Yehova. Hopi di e hendenan cu tawat’ei a elogi’e pa su bon presentacion. Despues, cu tacto e instructor a duna Daniel algun sugerencia util. Bijbel ta anima nos pa “scucha conseho y acepta disiplina.” (Proverbionan 19:20) Pero en bes di acepta e critica constructivo, Daniel a sinti manera el a fracasa. E ta corda: “Mi tawata kier pa tera habri guli mi.” Pa hopi siman e no por a drumi anochi.

Nos ta mira anto cu perfeccionismo por stroba e proceso di siña. Den un articulo cu a aparece riba un Website specialmente pa hobennan, un hobensita cu yama Rachel a skirbi: “Ora mi a cuminsa bai scol secundario mi tawata determina pa siña bon. Semper mi tawata haya bon punto so y mi no a mira pakico esei mester a cambia.” Pero poco tempo despues Rachel a bin ripara cu e tawatin problema cu algebra y a haya “apenas” un voldoende. Rachel a bisa: “Pa tur otro mucha esaki tawata un bon punto, pero pa ami si . . . e tawata un berguensa. Mi a drenta panico y cuminsa precupa . . . Mi tawatin miedo di pidi mi maestro yuda mi pasobra mi a pensa cu si mi a admiti cu mi tawatin mester di yudansa cu huiswerk, esei lo a nifica cu lo mi a reconoce cu mi no a compronde e les. . . . Na dado momento mi a casi combence mi mes cu pa mi fracasa miho mi muri.”

Miedo di faya a pone algun hoben asta pensa di comete suicidio. Afortunadamente, mayoria hoben no ta hinca den nan cabes pa haci algo drastico asina. Pero manera e experto di salu mental Sylvia Rimm ta remarca, kisas nan ta trata na evita di fracasa door di no risca mes. Segun Rimm, algun perfeccionista “no ta entrega nan asignacionnan, nan no ta orguyoso di nan trabou, nan ta lubida nan huiswerk y nan ta bin cu excuse.”

Di otro banda, otro hobennan por bai den extremonan pa garantisa exito. Daniel ta confesa: “Mi tawata traha te anochi laat riba proyectonan di scol pa nan sali perfecto.” E problema ta cu por lo general e extremonan ei ta contraproducente. Un studiante cu tin yen di soño no por presta mucho bon.

Nada straño anto cu nan a conecta perfeccionismo cu rabiamento cronico, falta di balor propio, sintimento di culpa, pesimismo, mal habito di comemento y depresion. Pero piyo ainda, perfeccionismo por perhudica bo spiritualmente. Por ehempel, Bijbel ta manda cristiannan papia cu otro hende tocante nan fe. (Romanonan 10:10; Hebreonan 10:24, 25) Sinembargo, un hoben cu yama Vivian no tawata duna comentario na reunionnan cristian pasobra e tawatin miedo cu lo e no a haya e palabranan corecto. Un señora jong cu yama Leah tawatin e mesun miedo ei. E ta bisa: “Si mi bisa algo robes, otro hende lo saca mal conclusion tocante mi. Pesei mi ta prefera di keda keto.”

Ta bisto anto cu e gana di ta perfecto ta dañino y insaludabel. Y si bo ta mira den bo mes cualkier un di e caracteristicanan cu e articulo aki ta trece dilanti, kisas lo bo tin cu haci algun cambio den bo manera di pensa. Un futuro articulo lo splica con bo por haci esei.

[Nota]

[Plachi na pagina 12]

Miedo di faya ta stroba algun hoben di caba nan tareanan

[Plachi na pagina 13]

Perfeccionismo por causa depresion y falta di balor propio