Hobennan Sa Puntra . . .

Con Mi Por Trata cu Fracaso?

“Mi a caba di haya mi raport, y mi a bolbe keda sin hal e mesun cuater vaknan. Mi a purba, pero atrobe, mi a bolbe faya.”—Lauren, 15 aña.

“Definitivamente, pa trata cu fracaso ta un lucha. Ta masha facil pa bo cuminsa pensa negativo.”—Jessica, 19 aña.

FRACASO. Kisas bo no kier ni pensa mes riba e palabra ei. Pero de bes en cuando nos tur ta haya nos confronta cu ne. Sea ta un proefwerk bo a traha malo, of bo a haci algo cu ta duna bo berguensa, of bo a desapunta un persona cu bo stima, of bo a comete un eror serio cu tin di aber cu moralidad, fracaso por ta devastador.

Claro cu tur hende ta faya. Bijbel ta bisa: “Tur a peca y ta falta e gloria di Dios.” (Romanonan 3:23) Sinembargo, algun di nos tin dificultad pa recobra despues cu nos a comete un fayo. Un hoben cu yama Jason a splica esei cu e palabranan aki: “Mi ta hopi critico cu mi mes. Si mi haci un fout kisas hende lo hari y despues mayoria biaha nan lo lubida. Pero ami si no ta lubida, mi ta keda pensa riba mi fayo.”

No necesariamente ta malo pa un persona pensa riba e fayonan cu el a comete, specialmente si esei ta motiva bo pa mehora. Sinembargo, sigui critica bo mes constantemente no ta bon y bo no ta logra nada cu esei. Proverbionan 12:25 ta bisa: “Ansha den curason di hende ta hacie abati.”

Considera e ehempel di un homber den Bijbel cu yama Epafrodito. Nan a mand’e Roma pa sirbi como Pablo su asistent personal. Sinembargo, Epafrodito a bira malo y no por a cumpli cu su asignacion. De echo, finalmente ta Pablo tawata esun cu a cuid’e! Pablo a haci areglo pa manda Epafrodito cas, y a informa e congregacion local cu e homber fiel aki a bira deprimi tambe. Pa ki motibo? Pablo a splica: “Boso a tende cu e tawata malo.” (Filipensenan 2:25, 26) Ora Epafrodito a realisa cu otro hende a haya sa cu e tawata malo y cu e no por a cumpli cu su tareanan, probablemente el a sinti cu el a fracasa. Pues no ta straño cu el a bira deprimi!

Tin cualkier manera pa evita e sintimentonan doloroso aki di fracaso?

Conoce Bo Limitenan

Un manera pa reduci e chens di fracasa ta di pone metanan realistico y modesto pa bo mes. Bijbel ta bisa: “Sabiduria ta serca e humildenan.” (Proverbionan 11:2; 16:18) Un persona modesto of humilde ta conciente di su limitacionnan. Ta berdad cu de bes en cuando ta bon pa test bo mes pa mehora bo habilidadnan. Pero sea realistico. Podise simplemente bo no ta un experto den wiskunde ni bo no tin e agilidad y cordinacion di un atleta sobresaliente. Un yoncuman cu yama Michael ta admiti: “Mi sa cu mi no ta bon den deporte. Pesei mi ta haci deporte si, pero mi no ta bai haci cosnan cu mi sa cu mi no por logra.” E ta splica: “Bo tin cu pone metanan cu ta na bo alcanse.”

Considera e actitud di Yvonne di 14 aña di edad, kende ta sufri di spina bifida (open rug) y paralisis celebral. El a bisa: “Mi no por cana, balia, ni core manera otro muchanan. Y door cu mi no por haci manera otronan ta haci, mi ta sinti mi frustra. Mayoria hende no por echt compronde esei. Pero mi por trata cu mi frustracion.” Su conseho? “No stop. Djis sigui purba. Si bo faya of haci un cos robes, no entrega. Djis sigui haci tur loke bo por.”

Na mesun tempo no tormenta bo mes door di compara bo mes inhustamente cu otro persona. Andrew di 15 aña a bisa: “Mi ta purba evita di compara mi mes cu otro persona pasobra nos ni un no tin e mesun forsa ni habilidad.” Andrew su palabranan ta na harmonia cu e palabranan di Bijbel na Galationan 6:4: “Laga cada un samina su mes obra, y e ora ei e lo tin motibo pa gaba solamente encuanto su mes, y no encuanto un otro.”

Ora Otro Hende Ta Spera Hopi di Bo

Sinembargo, tin bes bo mayornan, maestronan y otro hende ta impone expectativanan halto riba bo. Y bo sa cu maske cuanto esfuerso bo haci, lo bo no por complace nan. Y pa haci e asunto mas piyo, e personanan ei kisas ta expresa nan desilusion cu palabranan cu ta irita of podise asta desanima bo completamente. (Job 19:2) Probablemente bo ta realisa cu bo mayornan y otro hende no ta purba di hurt bo deliberadamente. Manera Jessica a remarca, “hopi bes nan no ta ni realisa cu nan ta haci bo daño. Tin biaha ta djis un mal comprondemento.”

Di otro banda, ta posibel cu nan ta mira algo cu abo no ta mira? Por ehempel, kisas realmente bo ta minimisa bo habilidadnan y balota bo mes. En bes di ignora nan sugerencianan, ta sabi pa “paga tino na instruccion.” (Proverbionan 8:33) Michael a splica: “E ta pa bo mes bon. Nan kier pa bo bira mas miho, pa bo progresa. Tum’e como un reto.”

Pero kico bo tin cu haci si bo ta sinti cu loke bo mayornan of otro hende ta exigi ta echt irasonabel y cu lo bo fracasa sigur? E ora ei lo ta sabi pa papia cu nan—cu respet, pero na un manera franco—y laga nan sa con bo ta sinti. Hunto boso lo por pone algun meta cu ta mas realistico.

“Fracasonan” Ora di Cumpli cu Responsabilidadnan Spiritual

Hobennan entre Testigonan di Yehova tin e reto pa cumpli cu nan asignacionnan como ministernan di Dios. (2 Timoteo 4:5) Si bo ta un cristian hoben, kisas algun biaha bo ta sinti cu bo no ta suficiente capas. Podise bo ta sinti cu bo comentarionan na e reunionnan no ta dje bon ei. Of kisas bo tin problema pa splica e mensahe di Bijbel na otro hende. Jessica por ehempel, a studia Bijbel cu un otro mucha mohe teenager. Pa un tempo e studiante di Bijbel a progresa bon. Pero diripiente e mucha mohe ei a dicidi cu e no kier sirbi Dios. Jessica ta corda: “Mi a sinti como si fuera mi a faya.”

Con Jessica a trata cu e sintimentonan ei? Prome, e tawatin cu realisa cu ta su studiante a rechasa Dios y no e. Loke tambe a yud’e ta meditacion riba e ehempel biblico di Pedro, un homber temeroso di Dios cu tawatin varios debilidad. Jessica a splica: “Bijbel ta mustra cu Pedro a vence su debilidadnan, y Yehova a uz’e den hopi manera pa promove interesnan di Reino.” (Lucas 22:31-34, 60-62) Claro cu si bo tin cu mehora bo habilidadnan como maestro, ta bon pa bo haci mas esfuerso pa logra esei. (1 Timoteo 4:13) Sea dispuesto pa ricibi yudansa serca rumannan maduro den e congregacion cu por siña bo y entrena bo.

Pero kisas ta e sirbishi di cas pa cas ta loke bo ta haya mas dificil. Jason ta admiti: “Cada bes cu un doño di cas keda sin scucha ta como si fuera mi a fracasa.” Con e ta trata cu e sintimento aki? “Mi tin cu corda cu no ta ami realmente a faya.” Si, el a logra haci loke Dios a mand’e haci—predica! Y aunke nos tin cu admiti cu no ta facil ora hende rechasa bo, no ta tur hende lo rechasa e mensahe di Bijbel. “Ora mi topa un persona cu ta scucha”, segun Jason, “mi sa e ora ei cu tur mi esfuerso ta bale la pena.”

Erornan Grave

Kico si bo a comete un eror grave, of asta un pica serio? Ana di 19 aña a comete un fayo asina.a E ta admiti: “Mi a faya cu e congregacion, mi famia y specialmente cu Yehova Dios.” Pa bo recobra, bo tin cu repenti y busca yudansa spiritual serca e ancianonan den e congregacion. (Santiago 5:14-16) Ana ta corda e palabranan di consuelo di un anciano: “El a bisa cu apesar di tur e cosnan robes cu Rei David a haci, toch Yehova tawata dispuesto pa pordon’e, y David a recobra. Esei a yuda mi.” (2 Samuel 12:9, 13; Salmo 32:5) Bo tambe tin cu haci tur loke bo por pa edifica bo mes spiritualmente. Ana a bisa: “Mi ta lesa e buki di Salmonan bes tras bes, y e textonan cu ta anima mi, mi ta skirbi den un schrift.” Cu tempo un persona por recobra di un fayo grave. Proverbionan 24:16 ta bisa: “Un hende husto ta cai shete bes, y ta lanta atrobe.”

Recobra di Bo Fayo

Ta claro cu asta fracasonan relativamente chikito por haci dolor. Kico por yuda bo recobra di nan? Prome cu tur cos, enfrenta bo fayonan realisticamente. Michael ta recomenda: “En bes di djis pensa cu bo ta un fracaso completo, wak kico ta bo fayo y kico ta e causa. Asina bo por mehora e proximo bes.”

Tambe bo por evita di tuma bo mes mucho na serio. Tin “un tempo pa hari”—y podise esaki por nifica hari bo mes tambe! (Eclesiastes 3:4) Si bo ta sinti bo desanima, haci algo cu bo por haci bon, manera un hobby of un deporte. Ora bo ta “rico den bon obra”—manera comparti bo fe cu otro hende—esaki por yuda bo pensa mas positivo tocante bo mes.—1 Timoteo 6:18.

Por ultimo, corda cu “Yehova ta misericordioso y compasivo . . . Lo e no sigui señala falta pa semper.” (Salmo 103:8, 9, NW) Jessica ta bisa: “Mi ta sinti cu mas mi hala serca Yehova Dios, mas sigur mi ta sinti mi di su apoyo y yudansa den tur loke mi ta pasa aden.” Si, ta un consuelo pa sa cu apesar di bo fayonan bo tin balor den bista di bo Tata celestial.

[Nota]

[Plachi na pagina 14]

Si bo ta sinti bo aplasta door di e exigencianan cu hende ta pone riba bo, busca un manera respetuoso pa expresa loke bo ta sinti

[Plachi na pagina 15]

Trahando riba cosnan cu bo por haci bon por yuda kita sintimentonan di cu bo a fracasa