For di Nos Lectornan

Perfeccionismo Mi kier yama boso danki pa e articulonan “Hobennan Sa Puntra . . . Dicon Mi Ta Sinti Cu Mi Mester Ta Perfecto?” y “Con Mi Por Stop di Purba di Ta Perfecto?” (8 di augustus 2003 y 8 di september 2003) Mi obsesion pa haci tur cos perfecto, a bira un peso cu mi no por a carga mas; e tawata kita tur mi goso. Door cu mi tawatin miedo di haci fout, mi tawata asta evita di duna comentario na reunionnan cristian. Mi ta masha gradicido na Yehova pa e articulonan aki. Nan ta yudando mi pa tene mi pensamentonan negativo bou di control.

S. M., Italia

E articulonan ta net loke mi tawatin mester pa yuda mi trata cu un problema cu mi tawatin pa 50 aña largo. Mi a pensa cu no tin nada malo den purba di ta perfecto, mi unico intencion tawata pa duna Yehova lo miho. Pesei, mi tawata puntra mi mes con bin mi tawata haya asina tanto problema cu mi yiunan, coleganan di trabou y rumannan cristian. Awor mi ta realisa cu tin bes mi manera di mira cosnan tawata desbalansa y no tawata cuadra cu Yehova su manera di pensa. Door di ta “demasiado husto”, mi a causa problema pa mi mes y pa otronan. (Eclesiastes 7:16) Aunke lo no ta facil pa mi vence e problema aki, cu yudansa di Yehova mi ta dispuesto pa purba.

C. H., Merca

Loke e articulo a bisa, esta, cu perfeccionismo por stroba un persona di logra cierto cosnan, ta berdad! Segun añanan tawata pasa mi tawata sinti mi frustra pasobra mi no por a logra cosnan cu mi tawatin asina tanto gana di logra. Y mi tawata puntra mi mes ta dicon. Relaciona cu e puntonan tocante amigo, mi por bisa cu den mi caso hopi bes tawata parce cu ningun hende no tawata kier ta den mi compania, pero mi no por a compronde ta dicon. Awor mi sa cu mi tin un lucha largo y duro mi dilanti y cu Yehova lo yuda mi.

L. R., Merca

Mi tin hopi aña ta lucha cu e problema aki. Nunca mi no ta satisfecho cu loke mi ta haci. Ta un gran alivio pa sa cu mi no ta e unico persona cu ta lucha cu perfeccionismo.

A. B., Canada

Mi mente ta bisa mi cu ningun hende no ta perfecto, pero mi sintimentonan ta pusha mi pa busca perfeccion. Mi a sinti mi hopi anima ora mi a lesa cu Yehova no ta spera perfeccion for di nos y cu loke ta di balor p’e ta loke tin den nos curason. Mi ta masha gradicido pa e articulonan aki.

S. K., Alemania

Miedo di faya hopi bes a stroba mi di tuma accion. Mi a siña cu perfeccionismo ta causa rabia cronico, pesimismo, depresion y un falta di balor propio. Ainda mi no a resolve mi problema completamente, pero awor mi sa cu mi kier desaroya e habilidad di no tuma mi fayonan mucho na serio.

A. I., Japon

Mi a sufri masha hopi mes di stress y ansiedad. Mi tawata rabia cu mi mes y bisa: “Mi no ta bal nada.” Boso articulonan a presenta un punto di bista practico y a duna mi un animacion caloroso. E carga pisa cu mi tawatin na mi curason, esta, e sintimento cu mi mester ta perfecto, a bira mas leve. E textonan a yuda mi cambia mi actitud y cultiva un punto di bista mas positivo.

M. N., Japon