Con Nos A Siña Kristi Stima Dios

NOS yiu mohe, Kristi, a nace na 1977. Poco despues, nos docter a duna nos masha mal noticia: Kristi a nace casi completamente sordo y cu un forma leve di paralisis celebral. Nos no por a imagina ki efecto esaki lo tawatin riba nos bida.

Un par di luna despues, ami cu mi esposo Gary, a cuminsa asisti na un les special den e stad di Melbourne, Australia, caminda nos a siña con pa trata cu nos yiu mohe. Tambe nos a bishita e Laboratorio Acustico Nacional na Melbourne. Einan nan a duna Kristi, cu e tempo ei tawatin 10 luna, aparatonan chikito di oido. E no tawatin lei cu e aparatonan, y como cu nan tawatin waya pega na nan, e tawata ranca nan saca for di su horea asina cu nos hinca nan aden! Tambe e mester a bisti un harnas special pa wanta e baterianan cu tawata basta pisa.

Debi na e paralisis celebral, Kristi tawatin problema pa siña cana. Esei a pone cu e mester a haya varios tratamento pa siman di fisioterapia. Pa ora cu Kristi tawatin tres aña el a cuminsa cana su so, maske e tawata cai hopi biaha. E fisioterapia a sigui te ora cu e tawatin cinco aña. Entretanto, nos a muda pa Benalla, un stad djis pega, caminda Gary tawatin su negoshi.

Kristi Su Educacion

Un maestro di hende sordo a hala nos atencion na e echo cu Kristi lo tin mester di un educacion special. Esaki a rekeri un otro mudansa, e biaha aki pa Bendigo, un stad cu tawatin un scol pa mucha sordo. Como cu mi tawata na estado di nos di dos yiu, nos a pospone e mudansa aki te ora cu Kristi tawatin cuater aña y nos yiu homber cu a nace tawatin cinco luna. Na un hospital na Bendigo, Kristi a cuminsa haya terapia pa papia, un tratamento cu a dura pa e siguiente dies añanan. Ami cu Gary tambe a cuminsa siña idioma di seña.

Nos precupacion di mas grandi tawata Kristi su educacion spiritual. E cos ta cu ami cu Gary ta Testigo di Yehova, y nos tawata determina pa lanta Kristi ‘den e disiplina y instruccion di Yehova.’ (Efesionan 6:4) Pero con nos lo por a haci esei? E cabes di e scol caminda Kristi tawata bai a bisa: “Siña Kristi tocante Dios lo ta e concepto di mas dificil pa siña. Bo no por mira Dios, pues con lo bo splic’e ken Dios ta?” Ki un reto grandi tawatin nos dilanti! No a tarda hopi cu nos a haya sa cu pa siña Kristi lo a tuma hopi tempo, studio y pasenshi.

Na principio, nos a uza plachi y diagram, y a mantene nos lenguahe mas simpel posibel. Nos tawata lag’e compaña nos bai reunionnan cristian y tambe den e trabou di predica, maske apenas e tawata compronde ta kico ta pasando. Segun cu Kristi a siña domina e idioma di seña, un mundo nobo a habri p’e. Pero asina mes, tawatin hopi palabra, frase y concepto den Bijbel cu tawata dificil pa splica. Un di su bukinan faborito tawata Mi buki di relato bíblico,a skirbi specialmente pa mucha. E plachinan colorido—hunto cu algun diagram cu nos a traha—tawata un yudansa sumamente balioso. Cu tempo, un amor pa Dios a cuminsa crece den Kristi su curason.

Bondadosamente Kristi su cabes di scol a pone nos den contacto cu algun otro Testigo di Yehova cu tawatin yiu sordo. Un cos cu a yuda nos hopi ta ora nan a splica nos con hende sordo por predica na hende cu ta tende. Un manera ta door di entrega hende cu ta tende un carchi cu un mensahe biblico imprimi riba dje. Pues, ora cu Kristi tawata cla pa comparti berdadnan biblico cu otro hende, e por a haci esei facilmente! El a bira un publicado no batisa di e bon nobo cu 14 aña. Na 1994 el a batisa cu 17 aña.

Sinembargo, Kristi tawatin mester di asociacion sano, y tawata dificil pa e sera amistad cu Testigonan cu ta tende. Pesei ami cu Gary a cuminsa duna les di idioma di seña na miembronan di nos congregacion cu tawata interesa den yuda hende sordo. Algun di esnan cu a asisti na nos lesnan, despues a haya trabou di interpreta pa hende sordo. Pero mas importante, hopi di esnan cu a siña idioma di seña awor tawata gusta comunica cu Kristi. Tambe Kristi por a beneficia mas plenamente awor di nos reunionnan y asambleanan cristian. Te cu awe e ta participa activamente den nan. Kristi ta masha gradicido pa e amor y interes cu e rumannan ta mustra na dje.

Un dia Kristi a expresa na nos su deseo di bira un pionero regular, es decir, un predicado di tempo completo. Gary a yud’e saca su rijbewijs, y despues di regla algun otro asunto, Kristi a keda nombra como pionero regular na 1995. Na aña 2000, el a haya tambe un trabou part-time na un scol basico. Einan e ta yuda den e educacion di mucha sordo.

Awor nos tur, Kristi, Gary, nos yiu homber Scott, cu ami, tin e goso di sirbi como pionero regular. Nos ta masha contento di por dedica tempo na siña hende tocante nos Dios, Yehova!

‘E Deseonan di Nos Curason’

E echo cu Kristi ta sordo ta un reto constante pa nos tur. Tin biaha ora cu Kristi ta den e trabou di predica, no tin ni un hende pa interpreta p’e, ni un hende cu ken e por comparti loke e ta sinti of pensa. E ta bisa: “Mi ta sinti como si fuera mi ta biba den un pais caminda tur otro hende ta papia un otro idioma for di esun di mi.” Apesar di esei, nos tur a siña trata cu exito cu su situacion.

E palabranan di Salmo 37:4 ta consola nos: “Deleita bo mes den SEÑOR, y e lo duna bo e deseonan di bo curason.” Kristi su speransa di mas grandi ta pa un dia tende muziek y e zonidonan di naturalesa y di papia cu su boca cu su sernan keri. Ami ta anhela e dia ora cu Kristi lo por tende mi bos. Nos tin fe cu pronto nos lo ricibi e deseonan aki di nos curason, net manera Bijbel ta priminti.—Isaias 35:5.—Contribui.

[Nota]

[Plachi na pagina 14]

Kristi, ora e tawatin 14 luna, cu “Mi buki di relato bíblico”

[Plachi na pagina 15]

Kristi ta presenta e bon nobo haciendo uzo di un carchi imprimi

[Plachi na pagina 15]

Scott, Kristi, Gary y Heather Forbes awe