Ainda Tin Bon Samaritano

DI UN ESCRITOR DI SPIERTA! NA MEXICO

Hopi di nos a yega di tende e relato biblico di e Bon Samaritano cu a yuda su prohimo. (Lucas 10:29-37) Den e comparacion aki Hesucristo a papia di e amor extraordinario cu un homber Samaritano a demostra pa su prohimo den necesidad. Ainda tin hende manera e bon Samaritano ei? E siguiente experencia cu ta bini di Mexico ta mustra cu si.

Riba caminda pa cas, Betuel y su famia tawata falta algun kilometer mas pa nan a yega ora nan a mira un teribel accidente di auto riba autopista. Nan a para pa ofrece yudansa. Un di e chauffeurnan envolvi, un docter, a pidi nan pa hiba su casa na estado y dos yiu mohe chikito na e hospital di mas serca pa nan haya tratamento. Esei ta loke nan a haci tambe, y despues Betuel a bolbe na e sitio di e accidente pa mira cu kico mas e por a yuda.

Betuel a conta: “Polis di trafico a yega y door cu un persona a perde su bida, nan tawatin cu detene e docter pa mas investigacion. Ora e docter a puntra mi pakico mi tawata yud’e, mi a splic’e cu nos ta Testigo di Yehova y cu nos a siña for di Bijbel cu nos mester stima nos prohimo. Mi a bis’e cu e no tawatin nodi precupa pa su casa y su yiunan, pasobra nos lo a percura pa nan. Cu lagrima di gratitud den su wowonan, el a duna mi e ora ei su cosnan di balor pa mi a warda nan p’e.”

Betuel y su famia a bai cas cu famia di e homber y a percura pa nan varios dia. Betuel a probecha di e oportunidad pa cuminsa un studio di Bijbel cu nan. Ora e docter a sali liber, el a expresa su gratitud y admiracion pa e Testigonan di Yehova. El a priminti di sigui cu e studio di Bijbel na e stad caminda e ta biba, y a bisa cu si su casa duna lus na un yiu homber, cu e lo a yam’e Betuel. Betuel a sigui bisa: “Awor, dos aña despues, nos a haya oportunidad pa bishita nan. Pa mi sorpresa, nan tawata studia Bijbel, y nan yiu homber chikito yama Betuel!”

[Plachi na pagina 30]

Betuel