Weganan Olimpico Ta Bai Bek Caminda Nan A Origina

PIK cu shobel di arkeologonan a habri e caminda pa rebiba e Weganan Olimpico di tempo moderno. Descubrimentonan arkeologico na e antiguo Olimpia, Grecia, a impulsa e baron Frances Pierre de Coubertin pa bini cu e idea di cuminsa cu e weganan atrobe. Como resultado di esei, na 1896 a tene e prome Weganan Olimpico di tempo moderno na Atenas.

Den e añanan un poco prome cu 2004, bulldozer y jackhammer a yuda prepara e caminda pa e weganan bolbe bek caminda nan a origina. Segun cu tawata modernisando e capital di Grecia en preparacion pa e Weganan Olimpico, e stad tawata parce un sitio di construccion grandisimo.

E di XXVIII Olimpiada, manera e Weganan Olimpico pa 2004 ta ser yama oficialmente, ta programa pa tuma luga na Atenas for di 13 pa 29 di augustus. Rond di 10.000 atleta, for di un cantidad record di 201 pais, lo competi den 28 deporte. Lo tene eventonan deportivo na 38 sitio y nan lo culmina den mas cu 300 ceremonia di partimento di medaya na e ganadonan. E mas o menos 21.500 representantenan di medionan di comunicacion cu lo ta presente no ta nada na comparacion cu e rond di 55.000 miembronan diligente di personal di siguridad.

Un Careda Yen di Obstaculo

Pa hopi tempo caba Atenas a purba atrae e Weganan Olimpico pa bini bek caminda nan a origina. Aña 1996, e di shen aña di e weganan moderno, a parce e momento mas apropiado pa e Olimpiada regresa su pais di origen.

Sinembargo, e oferta cu Atenas a haci pa haya e weganan di 1996 no a duna resultado, pasobra e stad no tawatin e infrastructura necesario pa e dos simannan hopi exigente di e weganan.

Door di e rechaso ei Grecia y su capital a haya nan ta pone man na obra. Atenas a priminti di corigi e situacion. Na 1997, cu e miho intencionnan y algun plan bon hinca den otro, e stad a bolbe haci un oferta pa e Weganan Olimpico di 2004. E biaha aki si el a logra.

Atenas a prepara su mes pa un transformacion total. E deseo pa ta anfitrion di e weganan a genera bastante actividad y un desaroyo nunca bisto. Tur caminda ekipo pisa tawata coba pa pone fundeshi pa drecha e infrastructura y tambe pa traha caya- y localidadnan pa e weganan. Asta durante e weekendnan sumamente cayente meimei di zomer, tur caminda bo por a mira chubato, grua y hende ta traha duro.

Na maart 2001 e prome avion a aterisa na e aeropuerto internacional nobo nobo di Atenas, clasifica como un di e aeropuertonan mas principal den su categoria na mundo. Tambe nan a plania pa construi un total di 120 kilometer di caya nobo y drecha 90 kilometer di cayanan existente. Pa facilita e trafico, den e structura nobo di caya nan a inclui rond di 40 viaduct y brug. Tambe nan a crea pistanan nobo di metro, cu e posibilidad pa agrega 24 kilometer di pista pa tram. Hunto cu tur esei, nan a diseña un sistema di trein di 32 kilometer pa core den e stad, y hopi stacion di trein moderno, specialmente pa desvia trafico y reduci polucion di atmosfer.

Cu poco palabra, Atenas a purba pa den un par di aña transforma su mes den un stad nobo, cu mas area berde, un medioambiente mas limpi y un sistema di transporte nobo. Jacques Rogge, presidente di e Comite Olimpico Internacional, a remarca: “Hende cu tawata conoce Atenas prome cu e Weganan y cu lo mira Atenas despues di e Weganan lo no reconoce e stad.”

Un Maraton di Preparacion

Segun cu e fecha pa e ceremonianan di apertura di e weganan ta acercando, e trabounan a drenta un fase acelera. E presidente di e Comite Olimpico Internacional, Rogge, a compara e progreso di construccion y preparacion cu syrtaki, e baile tradicional di Grecia. Den forma di chansa, el a bisa: “Ami lo describie como un piesa musical, manera e syrtaki. E ta cuminsa masha slow, ta acelera constantemente, y na final, e ta bai asina lihe cu bo no por mantene e ritmo mas.”

Esei ta berdad pasobra e Village Olimpico—“wes’i lomba di henter e esfuersonan pa prepara pa Weganan Olimpico”—a spruit for di nada pa bira un di e suburbionan nort di Atenas. E compleho aki, den cua rond di 16.000 atleta y oficial di team lo hospeda durante e Weganan Olimpico, ta e mayor proyecto di acomodacion cu a yega di ser realisa na Grecia. Despues di e weganan lo e bira vivienda pa mas o menos 10.000 habitante di e stad.

E organisadonan di e Weganan Olimpico no a lubida e conexion entre historia antiguo y e herencia di e weganan moderno. Algun di e ceremonianan lo tuma luga den Olimpia di antiguedad. Otro sitionan arkeologico principal tambe lo haya atencion special durante eventonan cultural cu lo tuma luga na mesun tempo den e dianan di e Olimpiada. Nan a traha un centro nobo di remamento banda di e sitio di e famoso bataya di Maraton. Y e coredonan di maraton por bisa cu nan a core e trayecto original. Pakico? Pasobra e organisadonan di e weganan a scohe exactamente e mesun ruta cu—segun leyenda—e solda di Atenas a sigui na aña 490 prome cu nos era, dia el a core e 42 kilometernan for di Maraton pa Atenas, pa anuncia e derota di Persia.

Y e Medaya di Oro Ta Bai pa . . .

Ora sende e vuurwerk na e ceremonia di apertura di e weganan, e Stadion Olimpico, cu capasidad pa 75.000 hende, lo ta e centro di atraccion. Pa hopi hende, e stadion renoba aki ta e “corona” di e facilidadnan Olimpico di Atenas. Loke ta haci e stadion aki unico ta su dak, inventa y diseña pa e famoso arkitecto Spaño Santiago Calatrava.

E dak ta un maraviya di ingenieria. E ta traha di panel di glas cu ta pisa un total di 16.000 ton y ta diseña pa cubri un area di 10.000 meter cuadra. Dos boog enorme, cu ta 304 meter largo y 80 meter halto, ta wanta e dak. Cada un di e tubonan di staal cu ta forma e boognan ta pisa entre 9.000 pa 10.000 ton y nan ta “asina hancho cu un bus por pasa door di nan”, segun un experto di construccion. Nan ta calcula cu e peso total di e dak lo por ta dos biaha e peso di Eiffel Toren na Paris.

Pakico mester di un dak asina enorme? Pensa riba e calor inmenso cu e solo di augustus ta produci na Atenas! E panelnan di glas tin un capa special cu ta refleha 60 porshento di lus di solo. Tin otro motibonan tambe. E diseño di e dak lo mester bira e ‘marca’ historico di e weganan. Manera e exminister di cultura di Grecia, Evangelos Venizelos, a bisa, “e ta e gran marca arkitectonico y e simbolo di e Weganan Olimpico di Atenas.”

Despues di e ceremonianan di clausura, e marcanan ei lo keda como recuerdo di tur e trabou y esfuerso cu tawata necesario pa sirbi como anfitrion di un evento monumental asina. E hendenan di Atenas ta spera cu henter e infrastructura prepara pa e Weganan Olimpico lo yuda mehora e calidad di bida den nan stad. Y manera semper, nan lo sigui trata cu nan retonan den bida sin precupa nan cabes masha.

[Cuadro na pagina 23]

Idealnan Poni na Prueba

E organisadonan di Weganan Olimpico ta gusta enfatisa e idealnan asocia cu e weganan, cuanan ta: “competencia noble, deporte, pas, cultura y educacion.” Pero e otro banda di medaya ta inclui politica, nacionalismo, comercio y corupcion.

Tradicionalmente, e Weganan Olimpico a atrae miyones y miyones di televidente y a genera contractnan lucrativo di propaganda. Door di esei e patrocinio rond di e weganan ta brinda un tremendo oportunidad pa haci propaganda comercial. E investigado Australiano Murray Phillips a bisa cu “aworaki Weganan Olimpico ta un negoshi grandi, y hopi decision cu ta ser tuma ta basa riba motibonan comercial strategico.”

Otro hende ta critica e nacionalismo flagrante cu ta ser manifesta den e weganan. Tin esfuersonan pa introduci un tregua olimpico, un paro na e hostilidadnan y guera den e temporada di e weganan. Sinembargo, fuera di su nificacion simbolico, un medida asina lo no duna resultado a menos cu elimina e motibonan di e conflictonan. “E Weganan ta un arena pa poder politico”, segun e profesor di ciencia Brian Martin. El a agrega: “Den Olimpiada, competencia entre atletanan a para bira un competencia entre estado. Atletanan no por participa si nan nacion no ta participa. Victoria di individuonan y teamnan ta ser trata como victoria nacional, simbolisa pa bandera y himno . . . [E Weganan Olimpico] a simplemente percura un otro arena pa e continuacion di violencia entre individuonan den eventonan deportivo y entre estadonan den e lucha pa poder y prestigio. . . . E movemento olimpico no tin poder pa realisa su meta original di promove pas.”

[Plachinan na pagina 23]

Compleho deportivo di e Olimpiada na Atenas

Diseño di medaya pa 2004

[Reconocemento]

Potret di ariba: AP Photo/Thanassis Stavrakis; diseño di medaya: © ATHOC

[Plachinan na pagina 24]

Metro di Atenas

Aeropuerto internacional di Atenas

[Reconocemento]

© ATHOC

[Plachinan na pagina 25]

Village Olimpico den construccion

Centro di deporte acuatico Agios Kosmas

[Reconocemento]

© ATHOC/Potret: K. Vergas

[Plachi na pagina 24, 25]

Dak di e Stadion Olimpico den construccion

[Plachi na pagina 25]

Un modelo miniatura di e dak completa

[Reconocemento]

© ATHOC

[Reconocemento pa Potret na pagina 22]

© ATHOC