E Punto di Bista Biblico

Dios Ta Realmente Interesa den Mucha?

MIYONES y miyones di mucha ta sufri di abuso, maltrato y atake violento tur aña. Hopi di nan ta traha practicamente como catibo den condicionnan peligroso. Otronan ta ser secuestra y forsa pa bira solda of prostituta. Incest y otro actonan horendo di maltrato di mucha tambe a traiciona e confiansa di hopi di nan.

Claro cu e trauma cu muchanan ta pasa aden awe ta molestia hende sinsero cu si tin interes di mucha na pecho. Aunke algun ta admiti cu e causa principal pa e maltrato ei ta golosidad y degeneracion humano, toch nan ta haya cu ta duro pa acepta cu un Dios di amor ta permiti e inhusticia ei. Nan ta haya cu Dios a bandona e muchanan aki y cu kisas e no ta realmente interesa den nan. Esei ta e caso? E echo lamentabel cu otro hende ta abusa di mucha y constantemente ta maltrata nan ta nifica cu Dios no ta interesa den nan? Kico Bijbel ta bisa?

Dios Ta Condena Hende Cu Ta Maltrata Mucha

Nunca tawata e proposito di Yehova Dios pa mucha sufri na man di hende grandi sin escrupulo. Maltrato di mucha ta un di e consecuencianan mas lamentabel di e rebelion di humanidad den e hofi di Eden. E rechaso ei di e soberania di Dios a habri caminda pa hende abusa di su prohimo.—Genesis 3:11-13, 16; Eclesiastes 8:9.

Dios ta odia hende cu ta probecha di esnan debil y indefenso. Hopi nacion di antiguedad cu no tawata sirbi Yehova tawata sacrifica mucha na dios falso, pero Yehova a bisa cu esaki no ta ‘loke el a ordena, ni bin den su pensamento.’ (Yeremias 7:31) Dios a spierta su pueblo di antiguedad: “Si di un of otro manera bo afligie [e huerfano], y e sclama na mi, lo mi tende su sclamacion sigur; y mi rabia lo sende.”—Exodo 22:22-24.

Yehova Stima Mucha

E interes di Dios den mucha ta bisto den e instruccionnan sabi cu e ta duna mayornan humano. Muchanan cu a ser lanta den un ambiente sano na cas tin mas chens di bira adultonan maduro, bon desaroya. Pesei, nos Creador a institui matrimonio, un areglo di bida largo pa cua “un homber lo bandona su tata y su mama y lo uni cu su esposa. Y nan lo bira un carni.” (Genesis 2:24) Segun Bijbel, ta pareha casa so tin mag di tene relacion sexual; e yiunan cu nace e ora ei por ser lanta den un ambiente stabil.—Hebreonan 13:4.

Ademas, e Scritura ta enfatisa e importancia pa mayornan educa nan yiunan. Bijbel ta bisa: “Yiunan ta un herencia di SEÑOR; e fruta di bariga ta un recompensa. Manera flecha den man di un guerero, asina ta e yiunan haya den un hende su hubentud.” (Salmo 127:3, 4) Yiunan ta un regalo precioso di Dios, y e kier pa bai bon cu nan. Dios ta haci un apelacion fuerte na mayornan pa duna nan yiunan un bon guia den bida, mescos cu un tirado di flecha ta mik bon prome cu e tira. E Palabra di Dios ta duna e instruccion: “Tatanan, no proboca boso yiunan na rabia, ma lanta nan den e disiplina y instruccion di Señor.”—Efesionan 6:4.

Un otro manera den cua Yehova a mustra su amor pa mucha ta door di siña mayornan pa proteha nan yiunan contra hende sin escrupulo. Den Israel di antiguedad, asta “mucha” mester a scucha ora e Lei a ser lesa, pasobra e Lei a inclui reglanan di conducta sexual apropiado y loke ta inapropiado. (Deuteronomio 31:12; Levitico 18:6-24) Dios kier pa mayornan haci tur loke ta posibel pa proteha nan yiunan contra hende cu lo por abusa di nan of maltrata nan.

Un Speransa pa Mucha

Hesucristo, kende ta un refleho perfecto di e personalidad di su Tata, a demostra den un manera maraviyoso e amor duradero cu Yehova tin pa mucha. (Huan 5:19) Ora su apostelnan, pensando cu ta yuda nan tawata yuda Hesus, a nenga di laga mayornan trece nan yiunan chikito p’e, Hesus a keda indigna cu nan y a corigi nan. El a bisa nan: “Laga e muchanan bin serca mi.” Anto “el a tuma nan den su brasa y a bendiciona nan.” (Marco 10:13-16) Mucha no ta insignificante den bista di Yehova Dios ni den bista di su Yiu.

De echo, pa medio di su Rei nombra, Hesucristo, pronto Dios lo interveni pa alivia muchanan cu ta sufri maltrato. Lo e elimina hende golos sin escrupulo cu ta abusa di mucha y cu ta maltrata nan. (Salmo 37:10, 11) Pa loke ta e humildenan cu ta busca Yehova, Bijbel ta bisa: “E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.”—Revelacion 21:3, 4.

Mientrastanto, for di aworaki Dios ta mustra su amor door di ofrece yudansa spiritual y emocional na tur persona cu ta sufri di abuso y maltrato. E ta priminti: “Lo mi busca esnan cu ta perdi, trece bek esnan cu tawata dual, pone verband pa esnan cu ta herida, y fortifica esnan cu ta malo.” (Ezekiel 34:16) Pa medio di su Palabra, su spirito santo y e congregacion cristian, Yehova ta consola muchanan cu ta sufri di opresion y pobresa. Ta un goso en berdad pa sa cu awor, mescos cu den futuro, “e Tata di misericordianan y Dios di tur consuelo, . . . ta consola nos den tur nos afliccion.”—2 Corintionan 1:3, 4.

[Reconocemento pa Potret na pagina 26]

© Potretnan di Mikkel Ostergaard /Panos