Ora Precupacion cu Aparencia Bira un Obsesion

ORA mayoria di nos wak nos mes den spiel, nos ta mira algun cos na nos curpa cu nos ta haya cu lo por ta miho. Pues, nos ta drecha nos paña of nos cabei of nos ta uza un poco make-up y despues ta sigui cu nos rutina di dia. E precupacion ei cu nos aparencia ta normal y na su luga. Pero pa algun persona, precupacion cu nan aparencia ta bai den extremo, locual ta causa un condicion cu na Ingles nan ta yama body dysmorphic disorder, of BDD.

E buki The Merck Manual of Diagnosis and Therapy (Merck Su Manual di Diagnosis y Terapia) ta defini BDD como “demasiado precupacion cu un defecto den aparencia, locual ta causa hopi angustia of ta pone un hende aleha for di actividadnan social, ta interferi cu su empleo of cu otro areanan importante di funcionamento.”a Como cu hende cu ta sufri di e malesa aki kisas ta imagina nan mes cu nan tin cierto defecto of nan ta exagera un defecto chikito, nan ta kere cu nan ta masha mahos.

Profesor J. Kevin Thompson di Universidad di South Florida, Merca, a bisa cu BDD ta un malesa poco comun, “cu kisas ta afecta entre 1,0-2,0% di e poblacion general y 10-15% di pashentnan psikiatrico cu no ta interna den instituto.” Sinembargo, Thompson a agrega: “Algun investigado ta kere cu e cantidad di casonan ta aumentando, segun cu metodonan di diagnostica ta bira mas bon den detecta e problema y segun cu sosiedad ta bira mas y mas obsesiona cu aparencia.” Aunke e condicion por afecta hende di tur edad, por lo general e ta cuminsa den e periodo di teenager. Pa loke ta trata adultonan, parce cu e malesa ta afecta mes tanto hende homber como hende mohe. Esaki ta un contraste skerpi cu trastornonan di come, cu ta hopi mas comun serca hende mohe.

E obsesion perhudicial aki cu aparencia, cu ta un sintoma tipico di hende cu BDD, normalmente ta pone cu nan ta controla nan mes cu masha hopi frecuencia den spiel, y den algun caso, ta hiba asta na isolacion social. Piyo ainda, e “angustia y mal funcionamento asocia cu e trastorno por pone cu mester interna e personanan cada bes den hospital y por hiba tambe na comportacion suicida”, segun Merck Manual. No ta un sorpresa cu algun hende cu ta sufri di e obsesion aki ta purba haci cirugia plastico. Dr. Katharine Phillips, kende a skirbi un buki tocante BDD, a bisa: “Por lo general mi no ta recomenda cirugia plastico. Cirugia ta un cos permanente, y generalmente mayoria hende cu BDD ta haya cu toch e cirugia no a resulta bon.”b

De bes en cuando, BDD ta manifesta su mes na un edad hopi jong. E revista George Street Journalc a informa di un mucha homber di seis aña “cu tawata kere cu su djentenan ta geel, su stoma ta ‘grandi’, y cu su cabei no tawata keda bon. Ningun di su ‘defectonan’ tawata bisto pa otro hende. Tur mainta e tawata skeiro su cabei pa casi un ora, y si e no por a logra pa su cabei keda ‘bon’ e ta hinca su cabes den awa y bolbe cuminsa skeiro su cabei atrobe, locual hopi bes tawata pon’e yega scol laat.” Un dia, ora cu el a yega na un oficina di docter, el a asta sak abou pa wak su mes den e metal di e frame di stul.

No Laga Mundo Domina Bo Actitud

Revistanan yamativo, corantnan y propaganda na television ta bombardia hende cu imagennan di e figura ideal. E rasonamento di e hacidonan di propaganda ta facil: Presenta un cierto imagen como e norma, y hende lo gasta nan placa cu nan a traha duro p’e pa nan por logra e mesun aparencia ei. Si agrega na esei un poco presion di pareunan hunto cu podise un par di comentario cu ta refleha falta di consideracion di famia of amigo, anto no ta un sorpresa cu algun hende ta bira desbalansa pa cu nan aparencia.d Claro cu un actitud desbalansa no ta mescos cu un trastorno psikiatrico obsesivo.

Ta abnormal pa pensa cu si bo no ta bunita of no tin bon tipo, otro hende lo no ta interesa den bo. Y esei no ta berdad tampoco. Por lo general hende no ta scohe amigo of amiga a base di nan aparencia fisico. Ta berdad cu na prome instante e aparencia por ta un factor, pero e berdadero banchi cu ta mantene un amistad ta personalidad, y norma- y balornan moral. Den algun aspecto cada un di nos ta manera un buki; kisas e buki tin un bunita kaft, pero si su contenido ta laf, toch e lesadonan lo pon’e abou umbes. Sinembargo, con cu e kaft ta, si e buki ta interesante, hende lo keda cu ne y les’e. Pues pakico bo no ta consentra riba bo cualidadnan como persona? Esei ta loke Bijbel, e Palabra di Dios, ta anima bo pa haci.—Proverbionan 11:22; Colosensenan 3:8; 1 Pedro 3:3, 4.

Y laga nos ta franco, nos aparencia ta cambia segun cu nos edad ta subi. Si bida, amistad y felicidad a depende di un aparencia bunita y hoben, ki un futuro tristo lo a spera nos tur! Sinembargo, nos situacion por ta hopi distinto. Con esei ta posibel?

Beyesa Cu Lo Dura

Proverbionan 16:31 ta bisa: “Cabei blanco ta un corona di gloria; den e caminda di husticia e ta wordo haya.” Den bista di Yehova Dios—y den bista di tur persona cu ta comparti su punto di bista—hende cu keda sirbi Dios te ora nan bira bieu no ta bira menos atractivo. De echo, debi na nan registro di celo y debocion na Dios, nan cabei blanco ta ser compara cu un corona di beyesa. Tal personanan precioso merece nos amor y respet profundo.—Levitico 19:32.

Es mas, den e benidero mundo nobo cu Yehova a priminti, lo e deshaci di e efectonan cu pica hereda tawatin riba tur su sirbidonan fiel, hoben y bieu. Cada dia cu pasa, nan lo mira y sinti con nan curpa ta drecha, te ora cu finalmente nan ta bira completamente perfecto. (Job 33:25; Revelacion 21:3, 4) Esaki ta un perspectiva masha emocionante! Abo lo tin gana di ta entre nan? Si ta asina, no laga mundo su manera di pensa superficial—y hopi bes cruel—domina bo actitud, ma haci esfuerso pa consentra riba e beyesa cu realmente ta conta. Esei lo haci bo un persona hopi mas felis y atractivo.—Proverbionan 31:30.

[Nota]