Revistanan Cu Ta Lombra “Ata Mi Aki, Cumpra Mi!”

ATA nan ei, colorido y briyante, y tur ta purba haya bo atencion. Bo no tawatin intencion di para wak nan mes, pero awor nan exhibicion colorido na un kiosco ta atrae bo. Ta como si fuera e revistanan cu ta lombra na un kiosco ta bisando bo, “Ata mi aki, cumpra mi!” Y aunke por lo general bo no por husga un buki a base di su portada, mester admiti si cu potret riba revistanan cu ta lombra tin un impacto special riba posibel cumpradonan. Den hopi pais tin tur tipo di e revistanan aki riba mercado, y e competencia ta fuerte.

Por dividi revista den dos categoria principal: revistanan specialisa, esta revistanan pa un ramo spesifico di tecnologia of comercio—y revistanan pa e publico general. E di dos categoria aki ta cubri casi tur topico, pero hopi bes e editornan ta enfoca riba cierto grupo. Un revista no ta mescos cu un corant. Tanto e estilo como e contenido ta diferente. Ademas, un revista ta mas compacto y imprimi riba miho calidad di papel, loke por lo general ta dun’e un acabado cu ta lombra y cu ta hacie asina atractivo pa e cumprado. Pa loke ta contenido, distinto di corantnan, revistanan ta dedica menos atencion na susesonan y noticia cu ta cambia di un ora pa otro. Hopi bes nan tin diferente escritor cu ta contribui cu articulonan cu ta cubri un variedad amplio di informacion y opinion. Ademas, cada un tin nan estilo di skirbi; algun ta djis duna informacion di echonan, otronan ta mas personal of emocional.

Ora bo ta para wak revista na un kiosco, sin duda tin varios cos cu lo tin nan influencia riba loke bo ta scohe of asta yuda bo dicidi si bo ta cumpra of laga. Bo sexo sigur lo ta un factor clave, y tambe bo interesnan personal y talbes, mas cu tur cos, e prijs di e revista. Si, un revista cu ta lombra por ta bastante costoso, talbes tres of cuater biaha mas caro cu un corant. Sinembargo, pronto e corant djawe ta traha luga pa esun di mañan, mientras cu un revista si no ta bira bieu asina lihe. Bo por lesa esun cu bo ta scohe na un manera trankil, y bo por ward’e pa hopi siman of luna y kisas dun’e na un otro hende. Bibliotecanan sa ta interesa den ehemplarnan mas bieu di revista, y algun revista ta bira articulonan di coleccion.

Nan Ta Bal Nan Prijs?

Claro cu ta abo mester sa si un revista ta bal su prijs. E motibo principal pakico nan tin un prijs relativamente mas halto ta, cu ta costa basta pa produci nan. Un editor tin cu investiga un mercado extensamente prome cu e lansa un revista nobo riba un mercado cu ya tin hopi competencia. Awendia, algun di e casnan editorial grandi ta publica y imprimi mas cu 30 diferente revista y nan ta uza nan propio imprenta. Asina mes, e gastonan ta enorme, ya cu cada publicacion ta rekeri su propio personal.

Si bo wak parti paden di e kaft di un revista pa publico general, lo bo keda sorprendi pa mira cuanto redactor y gerente ta necesario. Cada un ta percura pa un seccion diferente di e contenido, y cada un tin su mes personal. Por lo general, e revistanan di mayor circulacion tin nan mes escritor- y fotografonan, aunke hopi escritor y fotografo ta traha riba nan mes of ta traha pa diferente compania mediante un agencia, loke ta nifica cu mester contrata nan riba un base regular of part-time.

Tur articulo cu escritornan manda ta ser controla cuidadosamente. Mayoria ta ser revisa casi completamente of cambia parcialmente door di e redactornan. Ya cu potretnan ta forma un parti importante di revistanan cu ta lombra, mester di diseñadonan grafico tambe. E compiladonan ta cuminsa traha e layout general. Ta nan ta dicidi kico ta aparece riba cada pagina. Mester presenta e texto y e plachinan den un manera cu ta atrae e lector; cada pagina mester ta yamativo. Mayoria cas editorial ta uza un buki di estilo, esta, un manual cu ta describi ki termino y estilo mester uza den nan publicacionnan. Esun cu tin e responsabilidad final ta e hefe di redaccion. Lo e tin cu tuma decisionnan rapido pa no tarda e publicacion. Prome cu imprimi e revista, ta prepara un muestra pa e directornan examina.

E costo di un revista ta pa cubri gasto di imprenta y distribucion, y tambe salario di personal. Por lo general e rebendedonan ta haya un porsentahe di e prijs pa cada ehemplar cu nan bende. Loke no bende di e cantidad cu nan ricibi, nan ta entrega bek na e cas editorial. Ta berdad cu e prijs riba mercado no ta cubri e costo di produccion. De echo, si no ta pasobra gran parti di e revista promedio pa publico ta dedica na propaganda, lo e no por keda riba mercado. E edicion resien di un revista yamativo internacional di 200 pagina tawatin mas cu 80 pagina completo na propaganda. E companianan cu ta haci propaganda sa cu un aviso comercial riba papel cu ta lombra di calidad na cuater color ta un bon promocion pa nan producto.

Segun calculonan na Australia, cada individuo ta dedica un promedio di 1,2 minuut pa dia na lesa un revista. Na comparacion cu esei, cada hende ta dedica un promedio di 1,1 minuut pa dia na bai cine of 0,7 minuut pa dia na scucha muziek. Sin duda, esaki ta un motibo pakico revista ta un medio lucrativo pa haci propaganda.

Kico Ta Atrae Bo na Nan?

Aunke nos no por analisa delaster un revista cu ser publica, nos por tira un bistaso breve riba revistanan pa hende mohe. Ultimamente a cuminsa investiga e contenido di revistanan pa hende mohe, pasobra aunke algun hende ta considera nan inofensivo, otronan ta haya cu nan ta probecha di hende mohe. Un cos ta sigur: nan ta fasinante y atractivo, y esaki ta contribui na nan benta. Sinembargo, den e ultimo añanan revista pa hende mohe a cambia bastante. Algun di nan cu tawata trata solamente cu asuntonan di cas, awor ta presenta mas articulo tocante celebridadnan. Articulonan tocante salu tambe a bira popular. Un tempo hende mohe tawata gusta cuenta cortico, y hopi biaha ta e serienan cu tawata continua den e siguiente edicion tawata subi e benta. Pero awor ta un par di revista cu ta lombra so tin cuenta cortico y serienan.

Kico ta pone revistanan cu ta lombra bende awe? Aparentemente ta loke tin riba portada ta pone e revista bisa: “Ata mi aki, cumpra mi!” Si tin un hende mohe riba e portada, e mester ta famoso of bunita. Ademas, e modelo riba e kaft mester ta jong y delega, y ahustenan digital ta pon’e luci mas riba e potret. Kico di e palabranan riba e portada? Claro cu esaki mester varia segun e gruponan di edad y estilonan di bida riba cua e revista ta enfoca. Algun portada di revista ta resalta moda. Otronan ta ofrece premionan pa gana. Hopi bes e portada ta duna bo un indicacion kico tin den e revista.

Revistanan Cu Ta Lombra Por Influencia Nos?

Publicadonan di revista ta bisa cu nan sa kico hende mohe kier. Y ta berdad cu nan ta haci hopi estudio di mercado pa por haya sa kico hende mohe por lo general kier. Pero ta bon pa puntra: Nan ta satisfaciendo un necesidad cu di berdad ta existi, of ta nan mes a crea un necesidad pa nan satisface? Laga nos considera den ki manera hopi revista cu ta lombra pa hende mohe ta influencia hende su manera di pensa. Prome, tuma por ehempel e manera continuo cu nan ta expone estilo di bida y opinion di celebridadnan. Kisas esaki ta loke e publico kier lesa, pero por tin peligernan scondi? Den su buki About Face (Tocante Cara), Jonathan Cole, un neurofisiologo clinico na e Universidad di Southampton, Inglatera, ta spierta cu ora bo conoce un cara sin nunca a topa e persona mes of a tende su stem, esei por crea un afecto artificial. Tambe tin e gran cantidad di informacion skirbi tocante celebridadnan. Esei ta yuda nos compronde e fenomeno moderno di e tristesa profundo cu publico ta manifesta ora un hende cu nan no conoce muri, pero kende su potretnan nan a mira cu frecuencia den revistanan cu ta lombra. Claro cu informenan di television y corant tambe por contribui na e afecto artificial aki.

Un otro asunto cu ta hayando atencion actualmente ta e potencial cu revistanan tin pa influencia actitud di hende mohe pa loke ta un figura ideal. Aunke normanan ta varia di pais pa pais, e mensahe general cu ta bini atrabes di e revistanan djawe pa hende mohe den paisnan desaroya ta cu loke ta in ta un figura delega. Algun maestro, mayor y asta modelo mes ta censura esaki, y ta bisa cu e imagennan constante mustra den revistanan pa hende mohe ta parcialmente responsabel pa e aumento den iregularidadnan cu comemento y e constante caprichonan di dieta cu hende mohe, specialmente esnan mas jong, tin.

Pa aberigua si e afirmacionnan ei ta valido, un edicion Australiano di un revista internacional a realisa un encuesta entre su lectornan y a invita un panel di experto pa comenta riba e resultadonan. Mas cu 2.000 hende mohe a tuma parti; 82 porshento di nan tawatin entre 16 pa 29 aña di edad. Nan a consulta un tabel di peso recomenda, esta, peso di acuerdo cu haltura, edad, etcetera. Rond di 60 porshento di e hende mohenan a haya cu nan tin peso di mas, aunke solamente 22,6 porshento tawata pisa mas cu e peso recomenda. Mientras cu 59 porshento di e personanan cu tawata pisa menos di e peso recomenda a pensa cu nan tawatin un peso normal, 58 porshento cu a ser describi como normal a pensa cu nan tawata pisa demasiado. Ta 12 porshento so tawata satisfecho cu nan peso. Algun hende a critica e tabel cu e Departamento di Salu di e Mancomunidad Australiano a suministra, afirmando cu e ‘range’ di peso duna riba e tabel pa cada haltura tawata mucho grandi. Ademas, 67 porshento a admiti cu constantemente nan tawata envidia curpa di otro hende mohe, y 1 di cada 8 persona a admiti cu sea e tin of tawatin un iregularidad obsesiona cu comemento.

Fiona Pelly, e experto di nutricion den e panel, a bisa: “Ta obvio cu peso ta birando un prioridad principal den bida di hende mohe.” Y dr. Janice Russell, directora di un clinica di iregularidad cu comemento na Sydney, a comenta: “Loke ta mas dañino ta cu sintimento manera culpa y envidia ta factornan importante [den e encuesta]. No ta saludabel pa keda cana henter ora cu e tipo di sintimentonan ei.”

Sinembargo, e loke mas a resalta ta cu aunke algun di e personanan entrevista a admiti cu nan a imita actornan di pelicula, 72 porshento a bisa cu e modelonan cu ta aparece den revista a influencia nan mas. Un señora jong, cu a haya yudansa di un clinica di dieta, a bisa cu e tawata sinti su mes orguyoso cu e tawata pisa 55 kilo, pero el a admiti: “Ainda mi ta sinti e presion di medionan di comunicacion, revista- y celebridadnan.” Otro encuestanan realisa otro caminda a produci e mesun resultadonan.

Dos Revista di un Otro Categoria

Un di e revistanan mas saludabel y informativo disponibel ta esun cu bo tin den bo man, Spierta! No ta na un kiosco bo a cumpr’e. Kisas ta un persona riba caya a ofrece bo e, of talbes un persona a trec’e pa bo na cas. Trahadonan boluntario ta publica, imprimi y reparti e revista aki rond mundo sin cobra p’e. Escritornan di Spierta! ta manda articulonan for di tur parti di mundo, y nan tambe ta trahadonan boluntario, mescos cu tur e pintornan y traductornan. E revista Spierta! a aparece pa prome biaha na 1946. Prome cu ne tawatin Consuelo y e Epoca di Oro, cu a cuminsa ser publica na 1919. Semper a publica e revistanan sin ningun tipo di propaganda paga. Actualmente ta imprimi Spierta! den 87 idioma. Hopi di nan ta sali dos bes pa luna, y e tin un circulacion mundial di mas cu 22 miyon ehemplar.

E Toren di Vigilancia, e revista compañero di Spierta!, tin un record mas impresionante ainda. Actualmente e ta ser imprimi den 148 idioma. Di cada edicion di E Toren di Vigilancia ta imprimi mas cu 25 miyon ehemplar y e ta den circulacion for di aña 1879. Entre nan dos, e revistanan aki a duna un tremendo aporte na informa publico encuanto asuntonan importante di bida, y nan ta di interes pa tanto hende homber, mohe como hoben rond mundo.

Nos tur tin cu medita riba e echo cu nos no a nace cu conocemento. Nos ta haya sabiduria y conocemento segun cu nos ta crece y desaroya, y hopi bes nos ta forma nos opinionnan y desaroya un estilo di bida a base di loke nos ta lesa. Pa e motibo ei ta masha importante pa selecta material cu ta edificante y bale la pena pa lesa.

[Plachi na pagina 17]

Revistanan por influencia actitud tocante figura di hende

[Plachi na pagina 18]

Aunke nan no ta revista cu ta lombra, E Toren di Vigilancia tin un circulacion di mas cu 25 miyon ehemplar den 148 idioma y e Spierta! tin un circulacion di mas cu 22 miyon ehemplar den 87 idioma