Por Salba Planeta Tera!

E ARTICULONAN anterior a mustra bon cla cu hende no por sigui gasta e recursonan natural di tera riba e ritmo actual. Ta berdad cu lidernan di mundo a haci esfuersonan admirabel pa reduci polucion, rosamento di mondi y otro problemanan ambiental. Cuminsando cu e Conferencia di Nacionnan Uni Riba Medioambiente Humano na 1972, y sigui pa otro conferencianan cada tanto tempo, un total di 163 nacion a bini hunto pa respalda e plannan di accion. Pero kico tawata e resultado? David Hunter, director ehecutivo di e Centro pa Lei Ambiental Internacional, ta bisa: “Desafortunadamente, apesar di tur e tratadonan, e plannan di accion y otro instrumentonan aki, toch no a logra para e deterioro mundial di nos medioambiente.” De echo, Hunter ta agrega, “casi tur e indicacionnan principal cu medioambiente ta dunando awe ta cu cosnan ta piyo cu den e tempo di e Conferencia di Nacionnan Uni na 1992.”

Pakico tawatin asina poco progreso despues cu hende tin mas cu 30 aña caba ta trata cu problemanan di medioambiente? Un motibo ta e necesidad pa crecemento economico. Economia di e nacionnan ta depende di cuanto consumidonan ta gasta. Mester tin empresanan cu ta produci, locual na nan turno, ta rekeri materia prima. Ta un circulo vicioso den cua e medioambiente ta sali como e perdedo. Kico ta e solucion anto?

Pasonan Mal Dirigi

Bijbel ta splica pakico hende su esfuersonan pa dirigi nan mes a resulta den un fracaso total. Profeta Yeremias a bisa: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.” (Yeremias 10:23) E palabranan ei ta masha cierto!

Bo a yega di bishita un hardin of un parke? Ta dushi pa mira e gran variedad di palo-, mata- y flornan bunita! Pero un hardin nechi drecha no ta bini di su mes. Ta hardineronan bon entrena ta dedica oranan largo pa snui e palonan, corta e yerbanan y mantene e flornan pa nan keda bunita. Imagina bo con nos hogar terenal lo tawata si henter e planeta a ricibi e mesun tipo di cuido amoroso cu un hardin ta haya.

En realidad, e proposito di nos Creador tawata pa nos planeta a ricibi e tipo di cuido ei. Segun e relato di creacion den e Palabra inspira di Dios, “SEÑOR Dios a cohe e homber y a pon’e den e hofi di Eden pa cultiv’e y cuid’e.” (Genesis 2:15) Ademas, e famia humano a ricibi e encargo pa no solamente cuida Eden sino tambe extende e Paradijs original ei te ora e cubri tera completo.—Genesis 1:28.

Lamentablemente, pa motibo di e desobediencia di Adam cu Eva, nan a bira imperfecto y a perde e oportunidad pa cuida y extende e fronteranan di Paradijs. (Genesis 3:1-6, 23) Como desendientenan di e prome pareha humano ei, nos a hereda nan pica y imperfeccion. (Romanonan 5:12) Mal maneho di e recursonan natural di tera ta djis un ehempel di hende su esfuersonan mal dirigi pa guia nan mes. Bo por mira bon cla cu hende no ta capas pa soluciona nan problemanan. Mester di yudansa di un otro fuente.

E Caminda Cu Ta Hiba na Recuperacion

Tempo cu Hesus tawata riba tera, el a siña su disipelnan pidi den oracion: “Cu bo reino bin. Cu bo boluntad sosode na tera mescos cu den shelo.” (Mateo 6:10) Bijbel ta siña nos cu bou di e Reino celestial di Dios, tera lo bira un paradijs. (Salmo 37:10, 11) Na e tempo ei palo- y matanan lo duna nan fruta plenamente den un ambiente limpi. (Salmo 72:16) Bou di guia di Dios, lo elimina tur polucion for di tera, y humanidad lo siña con pa biba na harmonia completo cu e medioambiente. Con nos por ta sigur di esei?

Wel, Bijbel ta bisa cu tera lo “no kita [“tambalia”, NW] for di su luga nunca mas.” (Salmo 104:5) Na e debido tempo di Dios, tur hende cu ta na bida lo disfruta di bendicionnan eterno manera bon salu, alimento na abundancia y vivienda adecuado. Lo bo kier siña mas tocante e proposito di Dios? Papia cu cualkier Testigo di Yehova. Nan lo ta contento pa yuda bo mira for di Bijbel con planeta Tera por—y lo—wordo salba!

[Plachinan na pagina 10]

Bou di e guia di Dios, humanidad lo biba na harmonia cu e medioambiente

[Reconocemento]

Mucha mohe y cunukero: © Jeremy Horner/Panos Pictures