UN MUNDO TURBULENTO

3 | Fortalece Bo Relacion cu Bo Sernan Keri

DICON E TA IMPORTANTE

Como cu mundo ta yen di turbulencia, hende por sinti nan mas y mas ansha, y sin cu nan sa, e ansiedad ey por afecta nan relacion cu otro hende.

Hende ta isola nan mes for di nan amigonan.
Parehanan casa ta pleita mas cu otro.
Mayornan casi no ta tuma tempo pa sa loke ta preocupa nan yiunan.

Loke Ta Bon pa Bo Sa

Ta importante pa nos tin amigo, pasobra nan ta yuda nos trata cu stress specialmente den tempo dificil.
E problemanan den mundo ta causa stress cu por afecta abo y bo famia den manera cu kisas bo no ta spera.
E noticia di cosnan malo cu bo yiunan scucha of mira, por afecta nan mas di loke bo ta pensa.

Loke Bo Por Haci Awor

Bijbel ta bisa: “Un berdadero amigo ta stima semper; e ta un ruman cu bo por conta cu ne den tempo dificil.”—Proverbionan 17:17.

Nos amigonan por yuda nos y duna nos bon conseho. Amigonan amoroso por yuda nos haya e forsa cu nos tin mester pa trata cu e dificultadnan di tur dia.

LOKE BO POR HACI—Algun Sugerencia Practico

Loke bo por haci pa fortalece bo relacion cu esnan cu bo ta stima den tempo di crisis y calamidad

FORTALECE BO MATRIMONIO

Fortalece bo matrimonio

Bijbel ta bisa: “Dos ta mihor cu un, pasobra ... si un di nan cay, e otro persona por yud’e lanta.” (Eclesiastes 4:9, 10) Parehanan casa mester traha como piloto y co-piloto riba e mesun avion cu ta bay den e un direccion, y no como dos avion di guera cu ta purba di tumba otro.

Sea determina pa no baha bo stress riba bo casa. Tene pasenshi cu otro.
Purba di papia cu otro, a lo menos un biaha pa siman, tocante cualkier problema cu presenta. Corda cu e meta ta pa resolve e problema y no pa ataca otro.
Aparta tempo pa haci cos hunto cu boso tur dos ta gusta.
Pensa riba e dushi tempo cu boso a yega di pasa hunto, kisas boso por wak potret di boso casamento of di otro ocasion special.

“Kisas no ta semper un pareha ta di acuerdo riba tur cos, pero esey no kiermen cu nan no por traha hunto como team. Un pareha por tuma decision hunto y despues traha hunto pa e decision ey por tin exito.”—David.

FORTALECE BO AMISTADNAN

Fortalece bo amistadnan

Nos amigonan ta apoya nos, pero nos tambe mester pensa riba manera cu nos por apoya nan. Ora bo fortalece otro hende, bo ta fortalece bo mes.
Tuma contacto cu algun di bo amigonan tur dia pa wak con ta cu nan.
Puntra bo amigonan con nan a trata cu dificultadnan cu ta similar na esnan cu abo ta pasando aden.

“Ora tormentanan pisa di adversidad ta stroba nos di mira cla, nos amigonan ta yuda nos sa unda nos ta y unda nos tin cu bay. Tin biaha, nan tin cu djis corda nos di cosnan cu nos sa caba. Bo amigonan ta stima bo, y nan sa cu bo tambe ta stima nan.”—Nicole.

APOYA BO YIUNAN

Apoya bo yiunan

Bijbel ta bisa: “Hende mester ta cla pa scucha, slow pa papia.” (Santiago 1:19) Na prome instante, kisas bo yiu ta duda si e mester laga bo sa kico ta dun’e miedo y kico ta preocup’e. Pero, si bo ta scuch’e cu pasenshi, lo ta mas facil pa e papia tocante su sintimentonan.

Haci sigur cu bo yiu ta sintie comodo pa expresa su mes. Tin mucha ta sinti cu ta mas facil pa nan papia ora cu nan ta relaha. Pues, kisas bo por purba di papia cu bo yiu ora boso ta core den auto of cana, en bes di djis sinta cara-cara cu ne.
Haci sigur cu bo yiu no ta mira demasiado noticia tocante cos cu por preocup’e.
Laga bo yiu sa ki plan boso a traha pa asina boso famia por ta safe.
Traha un plan pa ora tin emergencia y practic’e hunto cu bo yiu.

“Papia cu bo yiunan, y laga nan expresa con nan ta sinti. Kisas nan no ta bisa bo cu nan ta sinti miedo, ansiedad of rabia. Laga nan sa cu abo tambe ta lucha cu e mesun sintimentonan ey, y bisa nan con abo a trata cu e tipo di sintimentonan ey.”—Bethany.