UN MUNDO TURBULENTO

4 | No Perde Speransa

DICON E TA IMPORTANTE

E problemanan cu ta tuma luga rond mundo por causa ansiedad cu ta afecta hende fisicamente y emocionalmente. Hopi hende cu a ser afecta pa e problemanan aki a perde speransa cu cos lo mehora un dia. Kico ta e resultado?

Algun hende no kier ni pensa tocante futuro.
Otro ta uza alcohol of droga pa nan no pensa riba nan problemanan.
Algun hende ta pensa cu no ta bale la pena pa sigui biba. Pues, nan ta cuminsa pensa pa kita nan bida.

Loke Ta Bon pa Bo Sa

Algun di e problemanan cu bo ta enfrenta por ta temporal, y e situacion por mehora diripiente.
Hasta si bo situacion no cambia, tin cos cu bo por haci pa yuda bo trata cu ne.
Bijbel ta duna berdadero speransa, un solucion permanente pa tur e problemanan di humanidad.

Loke Bo Por Haci Awor

Bijbel ta bisa: “No sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.”—Mateo 6:34.

No preocupa awe pa e cosnan di mañan. No ansha asina tanto tocante futuro cu bo no por haci e cosnan cu bo tin cu haci awe.

Si bo keda preocupa tocante e cosnan negativo cu kisas por tuma luga, ta mas stress so lo bo haya, y bo por cuminsa perde speransa cu lo tin un mihor futuro.

LOKE BO POR HACI—Algun Sugerencia Practico

TENE UN PUNTO DI BISTA POSITIVO

Bijbel ta bisa: “Pa hende cu ta sufri, tur dia ta un mal dia, pero hende cu curason alegre semper ta contento.” (Proverbionan 15:15) Un punto di bista negativo por stroba bo di wak un solucion cu ta bo dilanti. En cambio, un punto di bista positivo por yuda bo pensa riba diferente manera pa soluciona un problema.

Pone un limite na e cantidad di tempo cu bo ta dedica na wak of scucha noticia.
Na final di cada dia, pensa riba dos of tres cos cu bo ta agradecido p’e.
Traha un lista di solamente e cosnan cu bo tin cu haci awe. Dividi tarea grandi den tareanan mas chikito pa bo por mira resultado di bo esfuerso na final di dia.

BUSCA YUDANSA

Bijbel ta bisa: “Hende cu ta isola nan mes ... ta rechasa bon conseho.” (Proverbionan 18:1) Bo no por sali for di un buraco hundo riba bo mes. Pero si bo haya yudansa, bo por logra.

Pidi miembronan di bo famia of amigo pa yudansa.
Ademas, busca manera cu abo por yuda nan. Ora bo haci cos pa yuda otro hende, bo por haya un punto di bista balansa di bo mes problemanan.
Si bo a perde speransa y ta sinti cu no ta bale la pena pa sigui biba, kisas lo ta bon pa bo bay un dokter. Ora nos ta sinti asina, esey por ta un indicacion cu nos tin un problema di salud, manera depresion. Hopi hende a haya yudansa ora nan a busca tratamento.a

a Spierta! no ta recomenda ningun tratamento medico en particular.

Bijbel Ta Duna Berdadero Speransa

Un salmista di antiguedad a bisa den oracion na Dios: “Bo palabranan ta un lampi cu ta guia mi pia y un luz cu ta ilumina mi caminda.” (Salmo 119:105) Wak con Bijbel, Dios su Palabra, ta haci exactamente esey.

Riba un anochi scur, un lampi por yuda nos sa unda pa cana. Di mes manera, Bijbel tin sabiduria practico cu por yuda nos tuma bon decision.

Un luz ta ilumina nos caminda pa asina nos por wak kico tin nos dilanti. Na un manera similar, Bijbel por yuda nos mira e speransa pa un mihor futuro cu tin nos dilanti.

Bijbel no ta djis un buki sagrado cu ta conta e historia di humanidad, sino tambe e ta duna berdadero speransa pa futuro. E ta contesta e siguiente preguntanan:

Con?

Con sufrimento a cuminsa? Bijbel ta bisa: “Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.”—Romanonan 5:12.

Dicon?

Dicon hende no a logra soluciona nos problemanan? Bijbel ta bisa: “No ta keda na un persona pa e mes dirigi su pasonan.” (Jeremias 10:23) E problemanan cu nos ta mira rond mundo awe ta mustra cu loke e texto aki ta bisa ta berdad.

Kico?

Kico Dios lo haci pa soluciona tur problema? Bijbel ta bisa: “Lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.”—Revelacion 21:4.