MONDI

Kico Ta Pasando cu Nos Mondinan?

Tur aña, hende ta kap miles di miyones di palo; mayoria di bes ta pa cultiva tera, esta, prepara e tera pa planta. For di mas o menos 75 aña pasa te cu awor, mitar di mundo su mondinan caminda hopi awa ta cay a disparce.

Ora un mondi ser destrui, tur e beneficionan di su sistema ecologico y tur loke e mondi ta produci ta ser destrui hunto cu ne.

Nos Planeta A Ser Diseña pa Sobrevivi

Hasta na luga caminda hende a kap mayoria di e palonan, e palonan por bolbe cuminsa crece y e mondi por recupera. Algun ecologo a keda sorprendi ora nan a observa recientemente con lihe un area caminda hende a kap hopi palo a logra bira un mondi atrobe. Wak algun ehempel:

• Algun investigador ta observando kico ta pasa den e areanan caminda hende ta kap e palonan di un mondi pa cultiva e tera pero despues nan ta stop di cultiv’e y ta bandona e area. Un estudio di 2.200 diferente area na America y West Africa, cu a pasa den un situacion similar, ta mustra cu e areanan por bolbe na nan estado original denter di dies aña.

• Segun un estudio cu e revista Science a publica, e investigadornan ta calcula cu den mas o menos 100 aña, e mondinan por bira bek manera nan tabata prome cu a kap e palonan.

• Recientemente, algun cientifico na Brazil a haci un estudio pa wak si un mondi ta bolbe bek na su estado original mas lihe si hende haci esfuerso pa planta palo eynan atrobe. National Geographic a bisa lo siguiente tocante e investigadornan cu tabata envolvi den e estudio ey: “Nan tabata masha contento pa haya sa cu no tabata necesario pa hende planta palo.” Den apenas cinco aña, e areanan caminda nan a haci investigacion tabata “yen di palo di e area ey atrobe” sin cu mester a planta palo.

Loke Hende Ta Purba di Haci pa Resolve e Problema

Rond mundo, hende ta haci esfuerso pa proteha e mondinan y pa restaura esnan cu a sufri daño. Kico tabata e resultado? Segun un fuente di Nacionnan Uni, durante e ultimo 25 añanan “hende ta kap 50 porciento menos palo di mondi rond mundo.”

Pero esey no ta suficiente pa salba nos mondinan. Un informe cu e organisacion Global Forest Watch a publica ta bisa cu “e cantidad di mondi tropical cu ta ser destrui no a cambia masha den e ultimo añanan.”

E companianan cu ta kap palo pa uza den construccion sin permit di gobierno ta gana miles di miyones di dollar. Anto ta e golosidad aki pa ganashi ta e motibo principal pakico mondi tropical ta ser destrui.

Ki Speransa Bijbel Ta Duna Nos?

“Jehovaa Dios a planta tur sorto di palo cu tabata mustra masha bunita y cu tabatin bon fruta pa come.”—Genesis 2:9.

E Creador di tur mondi a diseña mondi di tal manera cu nan tin e capacidad pa recupera di e daño cu hende ta causa na nan. E kier proteha y sostene nos mondinan y e maraviyoso sistema ecologico cu tin den nan.

Bijbel ta mustra cu Dios lo pone un fin na e manera egoista cu hende ta maneha nos Tera su recursonan, y e ta priminti cu nos planeta y e bida riba dje lo sobrevivi. Wak e articulo “Dios Ta Priminti Cu Nos Planeta Lo Sobrevivi”, na pagina 15.